Agìń poonee, m téetí a-tuŋkpaaŋŋi pu
77
1 Asaafia di ŋmàn̄ nlan nee ki tīī bilaŋgaaliibi kpiliu Yeedutun.2 Unimbɔti ní m kūuntí mpɔn ki yíì,
Unimbɔti ní m yíì ní u làá pīlifiǹ-mi.
3 M yaa bí dinimbinaamandi poonee, ti-Dindaan ní m nyàab̀.
Kunyeeuee, m yòontí m-ŋalii ki túl̀ u-watil pú kaa gì,
ní kaa kíikí bí ŋméeǹ-mi.
4 M yaa téetì Unimbɔti puee ní m yáliŋkí,
m yaa bíi dàkafēe ní m-fam tìfī.
5 Ti-Dindaan, aa kíikí ḿ ŋúb́ ní kaa nín gèen̄,
inaatuu kɔ́-mi ní maa ti nyí tin m làá sòoǹee.
6 M dàkafī iyunti in jítèe pu,
abin ŋin jítì boon boonee pu.
7 M téetí m-laŋŋu pu kunyeeu,
m dàkafī m-pɔbilin ní ki bàlifī m-ba yii:
8 «Ti-Dindaan làá dū-ti kí fá talku níii?
Waa ti làá pée dàkà-ti u-laŋŋaŋfitiikuɔɔɔ?
9 U-neeŋkpaandi din u cááyee wáŋkì jaanjaan níii?
Waa ti làá sòoǹ kí nīn cá jaanjaan níii?
10 Unimbɔti kalin súntì kí sɔ̄ ti-saai níii?
Diŋuul kalin fōō u-poommɔŋŋu paaŋŋu níii?»
11 Ní m bí ki lì yii: «Tin wù-mee di sá yii
Yilpu fɔ́ŋŋŋ Nimbɔtiu kaa ti tútúǹ-ti nì u-ŋaŋgiil.»
12 Ti-Dindaan, m téetí a-tuuŋŋi pu.
Tiŋman, m téetí a-maamaaci tuuŋŋi ŋin a nìn ŋáaǹee pu.
13 M dàkafī tin ní a ŋée kɔkɔ pu,
m dàkafī a-tuŋkpaaŋŋi pu.
14 Unimbɔti, a-tuuŋŋi bí circir ní,
unimbɔti ulɔu di sá ukpaan kii sii Unimbɔti?
15 A sá Unimbɔti un ŋáań maamaacibee ní,
a dàkā anibul ŋin kíǹee a-pɔŋŋu.
16 A dū a-ŋal pɔŋŋu ki dá a-nibul ki líì,
Jaakɔb nì Jooseefi naantiibi.
17 Unimbɔti, inyiŋfi wál̀-si,
inyiŋfi wál̀-si ní ki fāŋkì,
ní tiŋku taapu taapu mun cīŋkì.
18 Atagban yāntì ŋi-nyim còol̄,
kutagbɔŋu yāntì bi gbìl̄ ku-neen pu,
ní a-piiŋyib ŋàan̄ an kɔkɔ pu.
19 A-taadundi nìn gà kuwoou ki màntī,
utaa nìn ŋmóò ki ŋmíntí duulinya,
ní kitiŋ fāŋkì ki cīŋkì.
20 Tiŋkun ní a cátì a-saŋŋu,
ní ki cōom̀ ki jítì nnyim min nyóòyee poonc,
ní ubɔ kaa ká a-tabɔbiliŋ.
21 A nìn dī Mooyiisi nì Aarɔn pu
ki kpōotì a-nibul kupicaŋkpuŋuee.