Ilan 78

Isirayeel yab ń taa súntí tin jítì bi-puee pu

1 Asaafi^a di ŋmàn̄ nlan nee.

M-nibul, pīlifì m-dàkatam tiŋan,

kpòon̄ a-tafal kí pīlifì tin m cáá kí tùkù-see.

2 M làá dū tibɔŋmantikaal kí sòoǹ,

m làá sòoǹ tin jítì ki bí dibalinee pu^b.

3 Kun ti gbìl̄ ki nyée,

kun ti-baabi nìn máafì-tee,

4 taa làá dūú báĺ ti-biyaamu,

ama ti làá māafì bin làá páań ti-boonee

kun pu bi máaǹ kí nyɔ̄ŋkì ti-Dindaanee.

Ti làá māafì-bi u-pɔŋŋu nì u-maamaaci tuuŋŋi ŋin u ŋée.

5 U tīī Jaakɔb naantiibi abɔkpaa,

u yóoǹ marab Isirayeel tiŋkin.

U nìn tīī ti-baabi mara yii

bí dū tibɔti gbanti kí dàkà bi-biyaamu.

6 An yaa ŋá mimmee, bin làá páanní boonee,

mbiyaamu mun bi làá dāá màal̀ee

làá dāá yīkì kí béé-tì kí dūú nàatī bíǹ bi-ba biyaamu.

7 Mimmee bi làá dū bi-mákal kí páań Unimbɔti pu,

kí taa súntí u-tuŋkpaaŋŋi pu

ní kí nīn tɔ́ u-marab.

8 Niinee baa làá nīn bí kii bi-naanjab

bin pɔbiliŋ nìn pɔ̄ɔ̄ bi-yiliŋ gáatèe.

Bi-pɔbiliŋ kaa nìn bí diba nì Unimbɔti

ní baa nìn pée máká u-pu.

9 Eefiraayiim yab nìn bàl̄ abaatan ki tòó ipiin,

nì míǹ kɔkɔee bi sáǹ ki kátì kujaaun.

10 Di sá yii baa nìn ŋúb́ Unimbɔti poondi,

bi nìn yíì kaa tɔ́ u-marab.

11 Bi nìn súntì u-tuŋkpaaŋŋi

nì u-maamaaci tuuŋŋi ŋin u nìn ŋá ki dàkā-bee pu.

12 Bi-naanjab nimbiin ní u nìn ŋá maamaacib^c

Eejipiti tiŋkin, Soowan satin.

13 U nìn cátì nsan tiŋkun bi cōom̀ ki jítì,

u nìn yāntì nnyim gāā digundi^d.

14 U nìn dū ditagbandi ki kpōotì-bi ŋwiimpu,

ní ki dū ŋŋmi walifiŋu ki kpōotì-bi kunyeeu^e.

15 U nìn búkutì ataŋkpee kuteeun

nnyim nyáń ki pùub̄ tikpil tikpil ní bi nyùn̄.

16 U yāntì kibùmbiki nyáń ditaŋkpalin

ní nnyim pùub̄ kii ibuŋkpaanee^f.

17 Ama bi nìn pée gbíntìi yìntīǹ-u,

ní ki jáà nì Yilpu Fɔ́ŋŋŋ Nimbɔtiu kuteeun.

18 Bi nìn lēē bi-pɔbilin kí cɔ̄ŋkì Unimbɔti kí kpèè

ní ki bālifì-u ú tīī-bi tijin tin fáatiǹ-bee.

19 Bi nìn nyáń Unimbɔti pu ki lī yii:

«Unimbɔti lafun ŋūǹ

kí tīī-ti tijin kuteeu nee poon tí jāaa?

20 Tiŋman u fáá ditaŋkpal

nnyim nyáń ki pùub̄ tikpil tikpil.

Ama u ŋūǹ kí tīī u-nibul tijin bí jī,

kí tīī-bi tinan bí ŋmɔ́ɔɔ?»

21 Ti-Dindaan nín gbìl̄ anyɔɔbun gbantee ní u gíí diŋuul.

U nìn gíí Jaakɔb naantiibi pu diŋuul,

u nìn fōō Isirayeel yab gbanti pu mbum.

22 Di sá yii baa nìn fōō Unimbɔti ki kíí,

baa nìn máká u-pu yii u làá ŋmā kí fīī-bi.

23 U nìn tīī kutagbɔŋu kun dàn̄ nee mara,

ní ki cúú yilpu punuubi ki pīitì.

24 U nìn yāntì maana nyánní yilpu ki lítì

kii utaa nín nì puee bi jíń,

u nìn tīī-bi yilpu jinti^g.

25 Báà ŋma nìn jíń Unimbɔti tuuŋyi jinti,

u nìn tīiń-bi tijin bi jíń ki díkí.

26 U nìn yāntì ŋwìiń nyalaŋki pú buŋku jítì yilpu,

u nìn dū u-pɔŋŋu ki cáań ŋgiil pú buŋku.

27 U nìn yāntì tinan nyánní yilpu ki lítì kii utaa nín nì puee,

ki wīikí tikpil kii ntamee.

Inoon nìn lítì ki wīikí tikpil kii tiŋku gbandi bulee.

28 U nìn yāntì i lítì bi-naapaal kansikin,

ki māntìi tú bi-kɔŋkooŋyi.

29 Bi nìn jíń ki díkí tiŋan,

di sá yii ti-Dindaan nìn tīī-bi kun bi lèe.

30 Baa nìn dá láá jíń ki bál̀,

tijin nìn dáá gbí bi-nyɔkɔn,

31 ní Unimbɔti ŋuul jéetì bi-pu.

U nìn kūū bi-kansikin bin cáá dikpabilee,

ní ki lúkufì Isirayeel nipɔmbi^h.

32 Nì míǹ kɔkɔee, bi nìn gbíntìi yìntīǹ-u.

Baa nìn máká u-maamaaci tuuŋŋi pu.

33 Niinee ní u kúntì bi-maŋfal wiiŋyi kii kubuŋuee,

ki yāntì bi-biŋŋi kúntì dinyoondin.

34 Unimbɔti yaa nìn bíi kù-bee ní bi kíǹ ki nyàab̀-u.

Bi nìn kpántí bi-ba ní ki nyàab̀ u-jòońdi.

35 Bi nìn téetí yii Unimbɔti di sá bi-taŋkpanaakooku,

yii Yilpu Fɔ́ŋŋŋ Nimbɔtiu di sá bi-fiiliu.

36 Ama bi nìn cáá bi-nyɔmmu ki ŋmàtíǹ-u,

bi nìn cáá bi-limbiliŋ ki mɔ́ntí-u.

37 Bi-pɔbil kaa nìn bí diba nì u,

baa nìn fōō u-poondi ki kíí.

38 Ama Unimbɔti úǹ poon nìn pée mɔ̄ ní,

u nìn cáá bi-kpitii ki pūǹ-bi, kaa nìn nàantí-bi.

Iyunti tikpilee, u nìn cútí u-ba u-ŋuul poon,

kaa nìn fòol̄ mbum tikpil.

39 Waa nìn súntí yii bi sá binib nì nniwuŋgban,

bi sá kubuŋu kun cá kaa ti gítińee.

40 Miŋa pu ní baa nìn jáń nì u kuteeun,

kaa nìn táká-u laakin binib kaa kóòyee!

41 Bi nìn pée cɔ́ŋkí Unimbɔti ní,

ki nìn kɔ̄ntí Isirayeel Nimbɔtiu Circirdaan kunimbaau.

42 Baa nìn téetí tin u nìn ŋá ki tīī-bi

ŋwiin ŋun u nìn fīī-bi ki nyántì unannanli ŋaanee.

43 U nìn ŋá maamaaci tuuŋŋi Eejipiti tiŋkin,

u nìn ŋá maamaaci tuuŋŋi Soowan tiŋkin.

44 U nìn yāntì bi-buŋyi nyim kpántì fatiku,

baa nìn gíti ŋūǹ kí nyɔ̀ bi-bùmbiyaamu nyimⁱ.

45 U nìn dū isii in júntée ki tɔ́ bi-pu i nyùn̄ bi-fatikuu,

ki dū kpaabi ki tɔ́ bi-pu bi bíil̀ tikɔkɔ^j.

46 U nìn dū bi-kpaajinti ki líì nì inaakitoon,

ki dū bi nín túń ditundi ki ká tiŋyee ki líì nì inaaki^k.

47 U nìn yāntì ataanyiŋkumbil lítì ki bíil̀ bi-fiinyi sati,

ní ki yāntì utaaja nìn̄ ki bíil̀ Siikoomɔɔr sufii.

48 U nìn yāntì ataanyiŋkumbil kūū bi-naai nì bi-piii,

ki yāntì utaa tɔ́ ki kūū bi-waŋkuti.

49 Kí kúntée ní Unimbɔti dū u-ŋuukpaandi

nì u-bum nì dinimbinaamandi ki tɔ́ bi-pu

kii nnaabu tuuŋyee.

50 U nìn gíti cúú u-ba u-ŋuul poon,

kaa nìn fīī-bi ki nyántì ŋkúm ŋaan,

ama u nìn dū-bi ki líì nì bìlbil kúm ní.

51 U nìn kūū Eejipiti yab jipɔŋkpilib kɔkɔ,

u nìn kūū Kaam^l naantiibi biseebiyaamu bi-tantibin.

52 Boonee, u nìn nyántì u-nibul kii kupicaŋkpuŋuee,

u nìn péetì-bi ki cūnnì kuteeun kii apibilee^m.

53 U nìn kpōotì-bi ŋgbansɔŋfin ní baa nìn fāŋkì,

ŋyunti ŋun nnyim nìn gbí ki léeǹ bi-nannanliibi pueeⁿ.

54 Míǹ boonee ní u cáá-bi ki kɔ́ǹ u-circir tiŋkin,

dijool din u dū úǹ u-ba pɔŋŋu ki fōōyee.

55 U nìn jìn̄ atimbun ŋin nib kóò niinee ki wāatì-bi,

ki nìn dū kitiŋ ki yākatì-bi an kpántì bi-fakal.

U nìn fōō Kanaan yab tiŋki ní ki dū Isirayeel naakɔti ki kāaǹ^o.

56 Ama bi nìn cɔ́ŋkì Yilpu Fɔ́ŋŋŋ Nimbɔtiu,

ki nìn jáń nì u, ní kaa tɔ́ u-bɔkpaaŋi^p.

57 Bi nìn fātì bi-boon ki tīī-u

ki nyáń u-boon kii bi-naanjab nín nìn ŋá puee.

Kii butɔbu bun gíì ki gbàkēe,

baa ŋūǹ kí nīn cáá bi-pu dimákal.

58 Bi nìn máń iwaatootipaan ŋgbantamu pu

ki gbítì ti-Dindaan ŋuul.

Bi nìn dū bi-waaŋi ŋin bi kpítèe

ki kɔ́ǹ-u ipoompoon.

59 Unimbɔti nìn ká míǹ ní ki gíí diŋuul,

u nìn dū Isirayeel ki fá kɔkɔ.

60 U nìn dū u-kɔŋkooŋŋu ŋun bí Siiloo tiŋkinee,

tanti un bi nìn gāā-u ú nīn kóò binib kansikinee ki fá^q.

61 U nìn dū u-pɔŋŋu ki líì nì kuyuŋu,

ki dū u-nyaaŋku ki ŋá binannanliibi ŋaan^r.

62 U nìn yāntì bi dū kitàataajiki ki kūū u-nibul,

u nìn gíí binib bin sá u-yabee pu diŋuul.

63 Ŋŋmi wùn̄ bi-naacimpɔmbi,

baa ti gà bisapɔmbi ilan^s.

64 Bi nìn dū ntàataajimu ki kūū bi-saraaŋaliibi

ní bi-kpiipoobi kaa gāā ikpiisilan ki súń.

65 Niinee ti-Dindaan cúu fīntì kii unil un gèen̄ee,

a lì kii ubaatandaan un nyùn̄ ndaam ní an nyāatì-uee.

66 U fáá u-nannanliibi bi-boon pú,

ní ki kɔ́ǹ-bi icoo kí nīn cáa cá jaanjaan.

67 U nìn dū Jooseefi dicaŋku ki fá,

kaa nìn lēē Eefiraayiim naakooku,

68 ama Juuda naakooku ní u lēē,

Siiyɔn jool din u néeńee.

69 U máń u-Circir kɔŋkooŋŋu niin kii yilpuee,

u máń-ŋu ŋú nīn bí ki cá jaanjaan kii kitiŋee.

70 U nìn lēē u-tɔntɔnliu Daafiidi,

kunaabakaun ní u nìn lēeń-u.

71 Ipii boon ní u páatìń-u ki cáań

ki dū-u ki kpántì un kpàá u-nibul Jaakɔb naantiibee,

dinibul din di sá u-yalee^t.

72 Daafiidi nìn kpāā-bi nì dipɔbil diba,

ki nìn dū dinyil ki kpōotì-bi.