Ilan 79

Unimbɔti, fīī a-nibul Isirayeel yab

1 Asaafi di ŋmàn̄ nlan nee.

Unimbɔti, binicambi dɔ́miń ki gbáb́ ki bīiǹ a-tiŋki pu,

bi kɔ́ǹ a-circir diiku tijɔkɔndi,

bi yāntì Jeerusaleem kpántì adigbuŋkati ŋma^a.

2 Bi dū a-tɔntɔnliibi bin bi kūūyee wunti

ki tīī inoon in ŋàaǹ kutaa puee í jī,

bin sí nì si deedeeyee di kpántì ipeel jinti.

3 Bi kpáatì bin bi kūūyee fatikuu ki fá kii nnyimee,

ki māntìi tú Jeerusaleem tiŋki,

ní baa ti kpáàa cáá ubɔ ń síb́-bi^b.

4 A yāntì ti-kɔŋkɔnaatɔb sìí-ti,

ní bin māntìi tú-tee bèel̄-ti ki lāā.

5 Ti-Dindaan, kí cáá sāā ŋyunti ŋulɔŋu

ní diŋuul din a gíí jaanjaan nee làá gbèen̄,

a-bum min fòol̄ lìblib kii ŋŋmi nee làá gbèen̄ ní?

6 Kpáatí a-bum kí sìtī atimbun ŋin kaa nyí-see pu,

abee ŋin poon baa jáaḿ-see pu.

7 Di sá yii, ŋi tɔ̄ntì Jaakɔb naantiibi,

ki bíil̀ bi-tiŋki.

8 Taa téetí ti-baabi kpitii pu kí dáaĺ ti-tafal,

á yàntī a-saasɔl ń lìntī ti-nyɔkɔpu malaa,

di sá yii ti-wunti kɔkɔ kpíì.

9 Unimbɔti ti-fiiliu, a-yindi nyooti puee,

dāá jòoń-ti.

Fīī-ti kí dū ti-kpitii kí pɔ̄-ti a-yindi pu.

10 Ba pu ní a làá yàntī atimbun ń lì yii:

«Bi-Nimbɔtiuee bí la ní^c?»

Yàntī atimbun ń béé a nín làá tɔ̀

a-tɔntɔnliibi kúm pɔntooŋyi puee ti-nimbil ń ká!

11 Yàntī bisarkadambi timinsii ń bàń-si.

Dū a-ŋal pɔŋŋu kí fīī binib bin an sá yii bi lēē kí kpɔ̀ee.

12 Ti-Dindaan, téeǹ anibul ŋin māntìi tú-tee,

asiibil ŋin ní bi sīī-see ŋfunyɔm miluli pu.

13 Ama timbi bin sá a-nibulee,

kupicaŋkpuŋu kun ní a kpàáyee,

ti làá nīn pée gà ilan ní ki nyɔ́ŋkí-si,

kí nīn jáaḿ-si abin abin.