Sii un kpàá Isirayeel yabee, pīlifì!
80
1 Asaafia di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ kubeeu ní ki gà-ŋu.2 Sii un kpàá Isirayeel yabee, pīlifì.
Sii un kpòotī Jooseefi naantiibi kii kupicaŋkpuŋuee,
sii un bí keerubimbi kansikinee,
lēē a-ba kí dàkà.
3 Eefiraayiim nì Beenjameen nì Manasee naakɔti nimbiinee,
nyàatī a-pɔŋŋu kí dāan̄ kí fīī-ti.
4 Unimbɔti, fàtīí gíiǹní-ti,
bútí ti-pu nnimbiin ní tí ká difiil.
5 Ti-Dindaan, Unimbɔti Mpɔŋkɔdaan,
kí cáá sāā ŋyunti ŋulɔŋu ní a-nibul wimmeem
làá nīn kɔ̄ntí-si diŋuul ní?
6 Nnyinnyim di kpántì bi-jinti,
a ŋmāntì nnyinnyim tikpil ki tīī-bi bi nyùn̄.
7 A yāntì ti-puee, bin māntìi tú-tee bíi jáà,
ní ti-nannanliibi bí ki lāā-ti.
8 Unimbɔti Mpɔŋkɔdaan, fàtīí gíiǹní-ti,
bútí ti-pu nnimbiin ní tí ká difiil.
9 A cóotìń fiinyi subu Eejipiti tiŋkinb,
ní ki jìn̄ atimbun ki dū-bu ki cóoǹ.
10 A ŋātì ki tāntì kitiŋ ki tīī-bu,
ní bu báaǹ inyaan ki kpátì ki gbí kitiŋ nee kɔkɔ.
11 Bu-booŋŋu bīī ajoon pu,
ní bu-paŋŋi bīī seedir sukpaŋkpaaŋyi pu.
12 Bu tɔ́ bu-paŋŋi ki tin bàn̄ Meediiteeranee tiŋkuu,
ní bu-pambiyaamu tin bàn̄ Eefiraati mɔɔl.
13 Ba pu ní a yāntì digundi din māntìi tú-buee bátì bátì ki lítì,
ní bisanjitiliibi kɔkɔ kìtī bu-biliŋ?
14 Kubambaŋŋun gbeetiu ŋàfī-bu,
ní ipeel ŋmóò-bu.
15 Unimbɔti Mpɔŋkɔdaan, fàtīí gítiń!
Gbóoń doooo yilpu kí kpèè tin bíi jītée.
Dāá fīī bufiinyisubu gbanti,
16 busubu bun ní sii a-ba cóoǹee,
- a-jipɔɔn un ní a tīī mpɔnee.
17 Bi sēē-bu ŋŋmi ki gāā-bu ki lúkú.
Tāā kí bīikì ní bí kpú kí céetí.
18 Dū a-ŋal kí páań unil un bí a-ŋaŋgiil púee pu,
kinibiki kin ní a tīī mpɔnee pu.
19 Niinee taa ti làá sútí kí wàatī-si.
Yàntī tí nīn bí dimaŋfalin ní kí nīn nyɔ́ŋkí-si.
20 Ti-Dindaan, Unimbɔti Mpɔŋkɔdaan, fàtīí gíiǹní-ti.
Bútí ti-pu nnimbiin ní tí ká difiil.