Ilan 81

M-nibul kaa pílifì m-nyɔkɔ

1 Asaafi^a di ŋmàn̄ nlan nee ki tīī bilaŋgaaliibi kpiliu. Bi gà-ŋu nì Gaati yab beeku ní.

2 Fáámaan iwiliili kí tīī Unimbɔti un sá ti-pɔŋŋuee,

kúum̀maan nì dipɔɔpindi kí nyɔ̄ŋkì Jaakɔb Nimbɔtiu.

3 Tóoḿmaan nlan, bɔ̀ɔ̀maan ŋgaŋgamu,

bɔ̀ɔ̀maan kubeeu nì saŋgu án nīn mɔ̄.

4 Búḿmaan ŋyin uŋmapɔɔn jiŋaaliu wiiŋŋu,

nì uŋmal yaa jɔ́m̀ee jiŋaaliu wiiŋŋu.

5 Di sá yii dibɔkpaal ní an sá ki tīī Isirayeel yab,

Jaakɔb Nimbɔtiu nín yóoǹ bí nīn ŋáań puee dee.

6 U yóoǹ Jooseefi naantiibi mara,

ŋyunti ŋun u nyáń kí já nì Eejipiti tiŋkee.

- M gbìl̄ nneen ŋun maa nyée sòon̄ nì mi yii:

7 M túutì-si ditúndi din a túee,

m fōō-si diwaŋgul din nyìm̀ ki kā a-ŋaanee.

8 Ŋyunti ŋun a nìn bí dinimbinaamandinee,

a nìn kúuǹ ki yíiń-mi ní m fīī-si.

Ditaadundi poon ní m nìn kíí-si.

M nìn cɔ́ŋkì-si Meeriiba nyim caŋin^b.

9 M-nibul, pīlifiǹ-mi, m làá kpāafì-si.

Isirayeel, a yaa bàà làá pīlifiǹ-mi!

10 Aa máaǹ kí nīn cáá unimbɔticaan ubɔ a-cee!

Á máaǹ kí gbàan̄ unimbɔticaan ubɔ taapu kí jāam̀-u!

11 Di sá yii man di sá a-Dindaan a-Nimbɔtiu

un di nyántìń-si Eejipiti tiŋkinee^c.

Wàan̄ a-nyɔkɔ bàaa ní ḿ gbéeǹ-kì.

12 Ama m-nibul kaa nìn pílifì m-nyɔkɔ,

Isirayeel kaa nìn là m-bɔti.

13 Niinee ní m dū-bi ki líiǹ bi-pɔɔgbifiŋŋu

bí nīn ŋáań bi nín là puee.

14 M-nibul yaa bàà nìn pílifíǹ-mi,

Isirayeel yab yaa bàà nìn nóó m-saŋŋu,

15 án kaa bàà làá sūŋkì ní ḿ sìntī bi-nannanliibi taapu,

ní kí bàà já nì bi-pulincɔntiibi.

16 Man ni-Dindaan nannanliibi bàà làá gbàan̄

m-nimbiin kí nīn kíǹ ki tɔ́-mi,

ní an nīn kíǹ ki bí-bi míǹ ki cá jaanjaan.

17 M làá dū tijimmɔntiil kí kpíiǹ Isirayeel yab,

ní kí tīī-bi ditaŋkpalin siiti bí ŋmɔ́ kí díkí.