Ilan 82

Unimbɔti sòoǹ binib bɔti nì ibaamɔn

1 Asaafi^a di ŋmàn̄ nlan nee.

Unimbɔti yáatìi yúl̀ yilpu kpafilin,

inimbɔti kansikin, ki sòon̄ binib bɔti yii:

2 «Kí cáá sāā ŋyunti ŋulɔŋu ní ni làá nīn pɔ̀ gandi,

kí nīn tìì dibɔkpil dambi ibaamɔn ní?

3 Sòom̀maan uwɔfi nì ditaŋkpiibil bɔti deedee,

kí sòoǹ unandaan nì ufalaadaan bɔti nì ibaamɔn.

4 Fīīmaan uwɔfi nì usoodaan,

fīīmaan-bi kí nyāntí binikpitib ŋaan.

5 «Baa nyí kaa gbìl̀ tibɔti taapu mun.

Bi còom̄ dibɔmbɔndin ní.

An di yì-tì ní kitiŋ nyeel cīŋkì.

6 Man nìn lī yii ni sá inimbɔti ní^b,

yii ni-kɔkɔ sá Yilpu Fɔ́ŋŋŋ Nimbɔtiu jipɔmbi ní.

7 Ama ni làá kpú kii binifantantiibee ní,

ni làá kúntí kii abɔtibilee ní.»

8 Yīkìm̄, Unimbɔti! Sòoǹ duulinya bɔti,

di sá yii sii di yì atimbun kɔkɔ.