Ilan 83

Binannanliibi māntìi tú Unimbɔti nibul

1 Asaafi^a di ŋmàn̄ nlan nee.

2 Unimbɔti, taa pée ŋùŋfì báà fiii,

taa nín̄ kā ki ŋmí kaa bíi ŋáań tiba.

3 Kpèè a-nannanliibi cáá bi-ba ki yāŋkí an kɔkɔ pu,

bin ná-see bíi gántí ayil.

4 Bi bíi bɔ́ntí kí ŋá a-nibul tikpitil,

bi kpáfì kinyɔkɔ kí ŋá bin pu aa mɔ̄ee tikpitil.

5 Bi bíi lì yii: «Dāam̄maan tí kúntí bi-timbundi,

bí taa ti téetí dalba dalba Isirayeel pu!»

6 Bi sòon̄ ki ŋá kinyɔɔbaantii,

bi ŋá mpèé kí já nì si.

7 An sá Eedoom yab nì Isimaayeel yab,

Moowaab yab nì Agaar naantiibi,

8 Geebaal yab nì Amɔn yab nì Amaleeki yab,

Fiiliistii yab ní kí kūtì bin kóò Tiir tiŋkinee.

9 Ki kpáaǹ Asuur yab kútì bi-pu,

kí tūtuǹ Looti yab.

10 Ŋá-bi kii a nín nìn ŋá Madiyan yab puee,

kii a nín nìn ŋá Siseela nì Jabiini Kiisɔn buŋŋun puee.

11 A nìn nāaǹ-bi Eeni-Dɔɔr,

ní bi wūtì ki tīī kitiŋ ntiŋkpam.

12 Ŋá bi-bɔtibiliŋ kii a nín nìn ŋá Ooreeb nì Seeb puee,

ní kí ŋá bi-kpilib kii a nín nìn ŋá Seeba nì Saalmuuna puee.

13 Binib gbanti di nìn lī yii:

«Tí fōōmaan Unimbɔti nakpaapɔɔku.»

14 M-Nimbɔtiu, yàntī bí kpántí ntam

min kunaakpaabuŋŋu yòontée,

àá tifeel tin kubuŋu yòontí ki féeńee.

15 Kii ŋŋmi nín wù kupɔɔu puee,

kii aŋmilimbil nín fòol̄ ajoon pu puee,

16 dū a-buŋku kí jà-bi,

dū a-buŋkpaaŋku kí fàaǹ-bi.

17 Ti-Dindaan, yàntī icoo ń cúú-bi,

án nín làá ŋá pu ní bí nyàab̀-see!

18 Yàntī icoo nì dinyoondi ń nīn táá-bi ki cá talku,

bí fá bi-jilimau kí kpú!

19 Yàntī bí béé yii sii ní bi yíì ti-Dindaan,

sii un baba sá Yilpu Fɔ́ŋŋŋ Nimbɔtiu kitiŋ kɔkɔ puee!