Ilan 84

Bin cá kí jāam̀ Unimbɔtee laŋŋu

1 Koora yab di ŋmàn̄ nlan nee ki tīī bilaŋgaaliibi kpiliu. Bi gà-ŋu nì Gaati yab beeku ní.

2 Ti-Dindaan Mpɔŋkɔdaan,

a néeń a-kɔŋkooŋyeeee!

3 M-naŋki bíi fèefī ki nyàab̀

kí nīn bí a-cindin.

M làá gāā ilan nì m-pɔbil kɔkɔ kí tīī dimaŋfal Nimbɔtiu.

4 Ti-Dindaan Unimbɔti Mpɔŋkɔdaan,

m-bɔtiu nì m-Nimbɔtiu,

a-saraafaŋyi caŋinee,

seer kāntí laakin u làá kɔ́ee,

ní kikoosiyaakpaai kāntí ki-diiku kí kpàà ki-biyaamu.

5 Bin kóò a-diikun

ki nyɔ́ŋkí-si kaa gbèentée

bí mmɔnneeee!

6 Bin kāntí bi-pɔŋŋu a-cee,

ki lēē bi-pɔbilin kí cù Jeerusaleem kí jāam̀-see

bí mmɔnni!

7 Bi yaa còom̄ ki jītí Baka sufii tantakalinee,

bi yàntī an kpántí inyimbul ŋma ní,

ní ukpaasiitaa ń gbéeǹ-dì anyimbɔbil.

8 Bi yaa còom̄ ki cée ní bi mɔ̀tīi kāntí mpɔn,

ní kí tin nyā Unimbɔti nimbiin Siiyɔn jool pu.

9 Ti-Dindaan Unimbɔti Mpɔŋkɔdaan,

pīlifì m-wimmeem.

Jaakɔb Nimbɔtiu, kpòon̄ a-tafal kí pīlifì-mi.

10 Unimbɔti, kpèè un di sá ti-gbampɔɔlee^a,

bútí un a lēēyee pu nnimbiin.

11 Ḿ nīn bí a-diikun ŋwiin ŋubɔ

sɔ́ǹ ḿ nīn bí laaba fám iwiin kutuku.

M lēē kí nīn bí m-Nimbɔtiu diiku punyɔkɔpu,

míǹ sɔ́ǹ ḿ nīn kóò binikpitib dumpui.

12 Di sá yii ti-Dindaan Unimbɔti di sá Ŋwìiń nì Digbampɔɔl.

Ti-Dindaan dàkà kulaŋŋaŋfitiiu ní ki tìì tinyool.

Bin maŋfal pu baa kāntí tikpitil tibee,

waa ŋmìntī-bi nnaam.

13 Ti-Dindaan Mpɔŋkɔdaan,

unil un máká a-puee bí mmɔnneeee!