Ilan 85

Ti-Dindaan sòoǹ ŋgbansɔŋfi pu

1 Koora dicaŋkun yab di ŋmàn̄ nlan nee ki tīī bilaŋgaaliibi kpiliu.

2 Ti-Dindaan, a dàkà a-tiŋki a-neendi,

a fātìi gíiǹní Jaakɔb naantiibi bin nìn bí kuyuŋuee.

3 A pítì a-nibul yìntitam,

a dū di-kpitii kɔkɔ ki pú-dì.

4 A nín nìn gíí ti-pu diŋuul diŋyee kúntì,

a páatì ti-pu mbum min a nìn fōō ti-puee.

5 Unimbɔti ti-Fiiliu, fàtīí gíiǹní-ti,

kúntí diŋuul din a gíí ti-puee.

6 A làá gíí ti-pu diŋuul kí nīn cá jaanjaanaaa?

A-bum kaa bí ki làá gbèen̄ dalba dalbaaa?

7 Kéè a làá fàtīí tīī timbi a-nibul dimaŋfal,

kí yàntī tí fàtīí nīn fàal̀ a-pueeee?

8 Ti-Dindaan, yàntī tí ká a-neeŋkpaandi,

ní kí tīī-ti a-fiil.

9 M làá pīlifì tin ti-Dindaan Unimbɔti sòoǹee,

di sá u bí yii u làá tīī u-nibul,

nì bin sí nì u deedeeyee ŋgbansɔŋfi,

ama bí taa ti fàtīí gítí digbaandin.

10 Tiŋman u-fiil kaa ti dátiǹ bin fàŋkí-uee,

ní tinyool làá nīn bí ti-tiŋkin.

11 Tiŋan nì ibaamɔn làá kpāfì,

ní deedee nì ŋgbansɔŋfi ń kpàl̄ tɔb.

12 Ibaamɔn làá nyānní kitiŋin kii iwamboolee

ní deedee ń nyānní yilpu kí kpákatiń.

13 Ti-Dindaan di lafun tìì tin ŋān̄ee,

ní ti-tiŋki lòoǹ tikpaajin.

14 Deedee līī ti-Dindaan nyɔkɔpu,

ní ki ŋàtī nsan ŋun pu u còom̄ee.