M-nimbinaamandi poonee, m kūuntí ki yíì-si
86
1 Daafiidi wimmeem.Ti-Dindaan, kpòon̄ a-tafal kí pīlifiǹ-mi,
fōō m-wimmeem, di sá yii m sá unandaan nì ufalaadaan ní.
2 Wúń m-pu di sá yii m sá deedeedaan,
sii m-Nimbɔtiu, fīī man a-tɔntɔnliu
un di máká a-puee.
3 Ti-Dindaan, sɔ̄ m-saai,
di sá yii sii ní m kūuntí ki yíì baabadal.
4 Ti-Dindaan, sii ní m fātì m-ba ki túĺ,
m gbàam̄-si ní, fàtīí tīī man a-tɔntɔnliu mmɔn.
5 Di sá yii sii ti-Dindaan ŋān̄ ní ki pūǹ ikpiti,
a-neendi wīikí ki tīī bin yíì-see.
6 Ti-Dindaan, kpòon̄ a-tafal kí pīlifì m-wimmeem!
Pīlifì m-gbaamii.
7 M-nimbinaamandi poonee, m kūuntí ki yíì-si,
kun puee a fòol̄ m-wimmeem.
8 Ti-Dindaan, inimbɔti kansikinee, ubɔ kaa bí kii siiyee,
ubɔ kaa ŋúń ki ŋá tin a ŋá nee.
9 Atimbun ŋin kɔkɔ a náańee
làá dāan̄ kí gbàan̄ sii ti-Dindaan nimbiin,
ní kí nyɔ̄ŋkì a-yindia.
10 Di sá yii a sá ukpaan ní ki ŋáań maamaaci tuuŋŋi,
sii baba di sá Unimbɔti!
11 Ti-Dindaan, dàkà-mi a-saŋŋu,
ní ḿ còom̀ a-baamɔŋŋu poon.
Yàntī ḿ nīn fàŋkí-si nì m-pɔbil kɔkɔ.
12 Ti-Dindaan m-Nimbɔtiu, m làá nīn nyɔ́ŋkí-si nì m-pɔbil kɔkɔ,
ní kí nīn pée tìì-si tinyool baabadal.
13 Di sá yii a-neendi wīikí m-pu,
a fīī m-naŋki ki nyántìń ditaŋkpiilin.
14 Unimbɔti, bilambidambi jáà nì mi,
bin néeń tipɔmbɔtee dikitil nyàab̀ kí kpɔ̀-mi,
baa pée dū-si ki yíiń tiba.
15 Ama sii ti-Dindaanee,
a sá Unimbɔti un poon mɔ̄ ki cáá kulaŋŋaŋfitiiuee ní,
aa gífí diŋuul malaa, ní a-neendi wīikí tikpilku ní a sá deedeedaan.
16 Fàtī a-ba kí túĺ-mi kí sɔ̄ m-saai,
tīī man a-tɔntɔnliu a-pɔŋŋu,
fīī man un sá a-tɔntɔnliu jipɔɔnee.
17 Tīī-mi a-ŋanti daaŋku
bin ná-mee ń ká ní icoo ń cúú-bi.
Di sá yii sii ti-Dindaan di jòoń-mi ki ŋmēentí-mi.