Maa ti dátiǹ ŋkúm
88
1 Koora dicaŋkun yab di ŋmàn̄ nlan nee ki tīī bilaŋgaaliibi kpiliu. Eeman un sá Seera naantiiuee di dàkā nlan gbanti.2 Ti-Dindaan Unimbɔti m-Fiiliu,
m kūuntí ki yíì-si ŋwiimpu nì kunyeeu.
3 Yàntī m-wimmeem ń bàń-si,
kpòon̄ a-tafal kí pīlifì m-gbaamii.
4 Di sá yii agìń ŋma poon ní m bí,
ní maa ti dátiǹ ŋkúm.
5 Bi kàaǹ-mi ki kútí bin bí dikaakulinee pu ní,
m bí kii unil un wuntin mpɔn dóòyee.
6 M-paaŋŋu kíǹ ki bí bitaŋkpiibi kansikin ní,
m kpántì kii bin bi kūū bi dɔ̄ dikaakulinee ní,
aa ti téetí bíǹ pu,
di sá yii aa ti ŋáań tiba kí tīī-bi.
7 A dū-mi ki bíl̀ dikaakulin taapu taapu,
laakin dibɔmbɔŋkpaandi bée.
8 A-ŋuul nyìm̀ m-pu,
a dū a-nyiŋgbanti kɔkɔ ki léeǹ m-pu.
9 A jìn̄ bin m nyée ki wāatì-mi,
m kíǹ ki cáá-bi titantan ní.
M kpántì usarkadaan ní,
maa ti ŋūǹ kí nyā.
10 Falaa ŋmɔ́ ki bíil̀ m-nimbiliŋ.
Baabadalee, m kūuntí ki yíì-si ní, m-Dindaan,
m yòontí m-ŋalii yilpu ki túl̀ a-watil pua.
11 Bitaŋkpiibi ní a làá ŋá maamaacib kí tīīii?
Bin dɔ̄ bi-ŋalii puee làá yīkì kí nyɔ̄ŋkì-saaa?
12 Dikaakulin ní unil ŋūǹ kí sòoǹ a-neeŋkpaandi puɔɔɔ,
ditaŋkpiilin ní u ŋūǹ kí sòoǹ a-deedeeu pu níb?
13 Ŋma nyí a-maamaacib pu dibɔmbɔndi gbanti poon?
Ŋma nyí a-deedee tuuŋŋi pu binib bin pu bi súntèe tiŋkin?
14 Ama mamee, sii ti-Dindaan ní m gbáà ibiil ki yíì,
kutaafaauee, m-wimmeem bàń a-nimbiin.
15 Ti-Dindaan, ba pu ní a dū-mi ki fá,
kaa ti là kí wāl̀-mi ní?
16 Doooo m-biyatin ní m gbí falaa kaa dátiǹ ŋkúm,
a kɔ́ǹ-mi dinyoondin ní maa ti nyí tin poon m bée.
17 A-ŋuul din fòol̄ lìblibee jítì m-pu,
a-nyoondi nāaǹ-mi kɔkɔ.
18 Dì māntìi tú-mi baabadal kii nnyimee,
di māntìi tú-mi an kɔkɔ pu.
19 A yāntì m-bɔɔbi nì m-jutiibi dū-mi ki fá.
Dibɔmbɔndi baba di kíǹ ki nyí-mi.