Ti-Dindaan, tin kɔkɔ a nìn pōoǹ Daafiidee bí la?
89
1 Eetan un sá Seera naantiiuee di dàkā nlan nee.2 Ti-Dindaan, a-ŋanti puee, m làá nīn gà ilan ki nyɔ́ŋkí-si baabadal,
m làá sòoǹ kí yàntī binib ń béé a-baamɔŋyi kí nīn cá jaanjaan.
3 Di sá m lī yii: «A-ŋanti bí ní baabadal,
a dū a-baamɔŋyi ki ŋá yilpu ní.»
4 A lī yii: «M pūtì ki pōoǹ un m lēēyee dipoondi,
m pūtì ki tùkū m-tɔntɔnliu Daafiidi yii:
5 A-naantiibi kansikin ubɔ làá nīn pée sá ubɔti ní,
m làá tīī a-beel mpɔn dí nīn bí ki cá jaanjaana.»
6 Yilpu tuuŋyi nyɔ́ŋkí a-maamaaci tuuŋŋi,
nì a-baamɔŋyi circirdambi kpafiŋin.
7 Ti-Dindaan, ŋma sá a-juti yilpu?
Si nì ŋma náań inimbɔti kansikin?
8 Unimbɔti, circirdambi kpafil poonee,
bi fàŋkí-si ní yɔ́kɔ́ yɔkɔ.
A sá kuwambiiu ki jítiǹ bin kɔkɔ māntìi tú-see.
9 Ti-Dindaan Unimbɔti Mpɔŋkɔdaan,
ŋma di cáá mpɔn kii siiyee?
A-baamɔŋyi māntìi tú-si.
10 Sii di cáá tiŋku un cáá dilambilee pu mpɔn,
u-nyiŋgbanti yaa yíkèe, sii di yàntī tí dòon̄ soooo.
11 Sii di nàn̄ Raabb kupeebiliŋŋu kun a kūūyee,
nì a-kpabil ní a dūu gbáń ki yāaǹ a-nannanliibi.
12 Sii di yì yilpu, sii di yì kitiŋ mun,
sii di tí náań duulinya nì tin kɔkɔ bí u-puee.
13 Sii di náań ŋgan pú nì ŋgiil pú,
Tabɔɔr nì Eermɔn jooŋŋi gà ilan ki nyɔ́ŋkí a-yindi.
14 Sii di yì ŋŋal ŋun cáá mpɔnee,
ŋŋaŋgiil ŋun a yōoǹ yilpu kí dàkà a-kpabilee.
15 A-beejal tɔ́kɔ́ deedee nì tin tèen̄ee pu ní,
ní dineendi nì ibaamɔn līī a-nyɔkɔpu.
16 Ti-Dindaan, binib bin nyí bi nín nyɔ́ŋkí-si puee bí mmɔnneeee!
Bi còom̄ a-nimbiin walifiŋun ní.
17 A-yindi puee, bi fàal̀ ní baabadal,
a-deedeeu puee, bi-yindi yíkí yilpu.
18 Sii di sá ti-pɔŋkpaaŋŋu,
a-ŋanti pu ní ti còom̄ ti-yil gáań.
19 Tiŋman ti-Dindaan di yì ti-gbampɔɔl,
Isirayeel circir Nimbɔtiu di yì ti-bɔtiu.
20 A sòon̄ dalba dileedakal diban
ki tùkū bin sí nì si deedeeyee yii:
«M tútuǹ ubaatandaan ubɔ,
m yōoǹ m-nibul kansikin unaacimpɔɔn ubɔ yilpu.
21 M ká Daafiidi m-tɔntɔnliu,
m bātì m-circir kpam ki sītì u-yil puc.
22 M-ŋal làá nīn ŋúb́-u gbīŋgbim,
m-ŋal làá tīī-u mpɔn.
23 Unannanli ubɔ kpá kí túuǹ-u,
unikpiti ubɔ mun kpá kí já kí pɔ̄ɔkiǹ-u.
24 M làá nà u-nannanliibi dúsi dusi u-nimbiin,
m làá kpɔ̀ bin kɔkɔ ná-uee.
25 M-baamɔŋŋu nì m-neeŋkpaandi làá nīn bí u-cee,
m-yindi puee, u làá nīn còom̄ u-yil gáań.
26 M làá dū tiŋku kí ŋá u-ŋaan,
u làá nīn cáá ibun pu mpɔn.
27 U làá dāá yíiń-mi yii:
<M-baa, sii di sá m-Nimbɔtiu
nì kutaŋkpanaakoou kun fìil̄-mee!>
28 M làá yàntī ú kpántí m-jipɔŋkpiliu,
kí nīn sá ukpaan ki jítiǹ kitiŋ pu bɔtiibi kɔkɔd.
29 M làá dàkà-u m-neeŋkpaandi kí nīn cá jaanjaan,
ní ki kpá kí kpìtī dipoondi din m pōoǹ-uee.
30 U-naantiibi kansikin ubɔ làá nīn pée sá ubɔti ní,
ní u-beel ń yúntí kii kutagbɔŋu nín làá yúntí puee.
31 «Báà u-naantiibi yaa dū m-marab ki fá
kaa nóó m-saŋŋu,
32 bi yaa yīntiǹ m-bɔkpaaŋi
ní kaa ŋúb́ m-koobiliŋee,
33 m làá dū ndɔ kí gbá-bi bi-yìntitam pu
ní kí dū dinaalabil kí dáaĺ bi-tafal bi-kpitii pu.
34 Ama maa làá ŋmìntī-bi m-neeŋkpaandi,
kaa tí làá fàtī m-boon kí tīī m-poondi.
35 Maa làá kpèè m-poondi fám,
kaa tí làá kpántí tin nyáń m-nyɔkɔnee.
36 M pūtì m-circir yindi dibaba ja yii
maa làá mɔ̄ntì Daafiidi nnyimɔn.
37 U-naantiibi làá nīn bí ki cá jaanjaan,
ní u-beel ń nīn pée bí m-nimbiin baabadal kii ŋwìińee.
38 U-beel làá nīn bí ki pɔ̄ɔ̄ ki cá jaanjaan kii uŋmal
un bí atagban poon ki sá deedee seeradaaŋwuee.»
39 Ama a fātì a-boon ki tīī ubɔti un a lēēyee ki dū-u ki fá,
ní ki gíí u-pu diŋuul.
40 A nyáń dipoondi din a nìn pōoǹ a-tɔntɔnliuee boon,
ní ki dū u-beefuuliiki ki lúkú kitiŋ ki kɔ́ǹ-kì tijɔkɔndi.
41 A yāntì digundi din māntìi tú u-tiŋkee bátì bátì ki lítì,
u-tiŋki kin bi máń digundi ki túee kpántì adigbuŋkati.
42 Bisanjitiliibi fúkúl̀-u pílpil,
ní u-kɔŋkɔnnaatɔb bèel̄-u.
43 A tīī u-nannanliibi mpɔn,
a yāntì u-pulincɔntiibi bí ki fàal̀.
44 A fātì u-tàataajiki ki túĺ-u
kaa tútúǹ-u kujaaun.
45 A yāntì u fá u-nyooti,
ní ki téé u-beejal ki lúkú.
46 A bātì u-naacimpɔnti wiiŋyi pu,
ki kɔ́ǹ-u icoo.
47 Ti-Dindaan, kí cáá sāā ŋyunti ŋulɔŋu
ní a làá dū a-ba kí báĺ-ti ní?
Kí nīn cáa cá jaanjaanaaa?
Kí cáá sāā ŋyunti ŋulɔŋu ní a-ŋuul din fòol̄ lìblib
kii ŋŋmi nee làá gbèen̄ ní?
48 Téetí m-pu, unil maŋfal wiiŋyi kaa náaǹ!
A náań nisaal kí kúntíǹ fám ní.
49 Unil ulɔu di bí kaa làá kpú dalba dalba,
ki làá ŋmā kí fīī u-maŋfal kí taa kɔ́ ditaŋkpiilin?
50 Ti-Dindaan, dineeŋkpaandi din a nìn dàkā doooo cannaaku,
din a nìn pūtì ki pōoǹ Daafiidee bí la?
51 Ti-Dindaan, téetí a-tɔntɔnliibi siibiliŋ pu,
asiibil ŋin ní anibul tikpil sīī-mee.
52 Ti-Dindaan, a-nannanliibi bí ki sìí-mi,
man ubɔti un a lēēyee yaa jītée bi tíiĺ timɔtan ní.
53 Tí nyɔ̄ŋkìmaan ti-Dindaan kí nīn cá jaanjaan!
Án ŋá míǹ, án lafun ŋá míǹ!