Ilan 90

KUGBƆNNANAATIIU

Unimbɔti bí kí nīn cá jaanjaan

1 Unimbɔti niliu Mooyiisi wimmeem.

Ti-Dindaan, sii di sá ti-balilaŋki

doooo abin abin.

2 Kí wàatī ajoon ń nīn bée,

kí wàatī á náań kitiŋ nì duulinyee,

sii di nìn sá Unimbɔti ní ki làá nīn pée sá Unimbɔti.

3 A yàntī unil fàtīi gítí ntamin^a,

di sá a lī yii: «Nisaal, fàtīí gítí laakin a nyánnée.»

4 Sii ceeyee, abin kutuku sá kii ŋwiin ŋubɔee ní,

a lì kii fool un jítì nee,

àá ŋyunti ŋun bijanjaliibi dūú sīĺ sintil kunyeeuee ní^b.

5 A kúntí unil maŋfal wiiŋyi.

I bí kii ŋgeemee ní,

ní kutaafaauee í wāŋkì kii kumoouee.

6 Kutaafaauee kumoou màtī ní kí wíiǹ,

kujoouee ní kú fáaḿ kí kpā.

7 Tiŋman, a-ŋuul púntí-ti,

a-bum fàantí-ti.

8 A dū ti-yìntitam ki bíl̀ a-nimbiin,

a-walfiŋu ŋmíntì ti-kpitii in ti ŋáań dibalinee pu.

9 A-ŋuul pu ní ti-maŋfal wiiŋyi kúntí,

ti-maŋfal wiiŋyi kúntí malaa kii diniindee ní.

10 Unil yaa tin yúntèe di sá u bàn̄ abin imuŋku ita nì saalaayee.

Un pɔ̄ɔ̄yee di bà abin imuŋku inaa.

Ama kun ti kāntí ŋi-poonee di sá agìń nì falaa.

Ti-maŋfal wiiŋyi jītí malaa ní tí búntí.

11 Ŋma di ŋūǹ kí béé a-ŋuul pɔŋŋu?

A-bum sá ŋkpaami kii an nín máaǹ bí fàŋkì-si puee ní.

12 Yàntī tí béé yii ti-maŋfal wiiŋyi kaa náaǹ,

án nín làá ŋá pu tí ká iciin ti-pɔbil poonee.

13 Ti-Dindaan fàtīí gítiń,

kí cáá sāā ŋyunti ŋulɔŋu ní a-ŋuul làá nīn gbíntìi bí ti-pu ní?

Sɔ̄ timbi a-tɔntɔnliibi saai.

14 Dàkà-ti a-neendi kutaafaau,

ní tí nīn gà ilan ki fàal̀ ti-maŋfal wiiŋyi kɔkɔ poon.

15 Yàntī tí fàal̀ iwiin in nyɔkɔm a sīntiǹ-ti taapuee,

abin ŋin nyɔkɔm ti ká nnaabuee.

16 Yàntī timbi a-tɔntɔnliibi ń ká a-tuŋkpaaŋŋi,

ní ti-biyaamu ń ká a nín sá ukpaan puee.

17 Ti-Dindaan ti-Nimbɔtiu,

yàntī a-saasɔl ń nīn bí ti-pu,

yàntī án bútí-ti ti-tuuŋŋi kɔkɔ poon,

tiŋman, yàntī án bútí-ti.