Ilan 91

Yilpu fɔ́ŋŋŋ Nimbɔtiu di sá kibalilaŋ

1 Unil un sáǹ ki kɔ́ Yilpu Fɔ́ŋŋŋ Nimbɔtiuee,

Mpɔŋkɔdaan booŋŋu taapu ní udaan ŋùŋfī.

2 M tùkù ti-Dindaan yii:

«Sii di sá m-balilaŋki nì m-taŋkpanaakooku,

ki sá m-Nimbɔtiu un pu ní m mákée!»

3 - Ti-Dindaan di làá fīī-si kí nyāntí

ukpan taliŋkun

nì bìlbil kúm ŋaan.

4 U làá dū u-kuti kí bīiǹ a-pu,

ní á sāǹ kí kɔ́ u-feeŋyi taapu.

U-baamɔŋyi sá digbampɔɔl nì tijanjawan ní.

5 Aa làá fàŋkì dinyoondi din bí kunyeeueeyaaa,

kaa làá fàŋkì ipiin in ŋàaǹ ŋwiimpueeyaaa,

6 kaa làá fàŋkì bìlbil kúm min yìiǹ dibɔmbɔndineeyaaa,

kaa làá fàŋkì kuweeŋkpiiu kun bìlim̄ kuwiŋkaŋu puee mun.

7 Báà binib kutuku yaa lítì ki kpíì a-caŋin,

ní binib kutukub saalaa yaa lítì a-ŋaŋgiil pú,

tiba kpá ki làá ŋá-si.

8 Nì a-nimbibulii ní a làá ká

Unimbɔti nín làá pà binikpitib tipaal tiŋyee.

9 - Tiŋman, sii ti-Dindaan ní m sáǹ ki kɔ́.

A yaa yāntì Yilpu Fɔ́ŋŋŋ Nimbɔtiu kpántì a-balilaŋkee,

10 tikpitil tiba kaa làá bàń-si,

nnaabu ŋubɔ kaa làá sútí kí pìlīǹ-si.

11 Di sá yii ti-Dindaan làá tīī u-tuuŋyi mara

í nīn cí-si laakin kamaa a làá cùee.

12 I làá nīn tíkí-si i-ŋaaŋyin,

án nín làá ŋá pu a-taal ń taa gbéetí ditaŋkpalee^a.

13 A làá tāā gbikinti nì ukoowaati pu kí còom̀,

ki làá yáká digbikintipɔmbil nì ukoobu ditaal^b.

14 Ti-Dindaan bí yii: «U nín dū u-ba ki nákáǹ-mee puee,

m làá fīī-u.

U nín nyí-mee puee, m làá wúń u-pu.

15 U yaa kúuǹ ki yíiń-mee, m làá kíí-u.

Man m-ba làá nīn bí u-cee dinimbinaamandi poon,

m làá fīī-u ní kí tīī-u tinyool.

16 M làá tīī-u mmaŋfafɔkɔn,

ní kí dàkà-u yii man di sá u-fiiliu.»