Ti-Dindaan, an ŋān̄ tí nyɔ̄ŋkì-si
92
1 Inyɔŋki laŋŋu ŋun bi gà ŋwiŋŋuŋfikaa dalee.2 Ti-Dindaan, an ŋān̄ yii tí nyɔ̄ŋkì-si,
kí gāā ilan kí tīī sii Yilpu Fɔ́ŋŋŋ Nimbɔtiu yindi tinyool!
3 An ŋān̄ yii kutaafaauee tí sòoǹ a-neeŋkpaandi pu,
ní kunyeeuee, tí sòoǹ a-baamɔŋyi pu,
4 kí bɔ̀ɔ̀ iŋmii saalaa beeku nì saŋgu kí nyɔ̄ŋkì-si.
5 Ti-Dindaan, a-tuuŋŋi tìì-mi mmɔn,
atuun ŋin a ŋée puee, m làá gāā ilan kí fàal̀.
6 Ti-Dindaan, a-tuuŋŋi sá akpaaneeee,
a-landɔkɔi nyóò tikpil!
7 Un kaa dàkafēe kaa nyí míǹ,
ugbaan kaa ŋūǹ kí gbìl̄ taapu.
8 Binikpitib nyēē ki bí fàlfal kii timoolee,
an bútí bikpitiŋaliibi,
ama an kaa làá sūŋkì, bi làá kpú kí céetí.
9 Ama sii ti-Dindaan di tɔ́kɔ́ tikɔkɔ pu
kí nīn cáa cá jaanjaan.
10 Kpèè a-nannanliibi, ti-Dindaan,
kpèè a-nannanliibi kɔkɔ làá kpú kí céetí,
bikpitiŋaliibi kɔkɔ làá yàl̄.
11 A tīī-mi upɔɔnaa pɔŋŋu,
a bātì ŋkpam min sɔ́fèe ki sītì m-pu.
12 M-nimbil ká m-nannanliibi lítitam,
m-tafal gbìl̄ bin jáà nì mee biilii pu.
13 Deedeedaan wīintí kii bubabuee ní,
u fɔ̀kɔntí kii Leebanɔn subu bun bi yíì seediree.
14 U bí kii busubu bun bi cóoǹ kunimbɔtidiinee ní,
bu pɔ̀kɔtī ti-Nimbɔtiu cindin.
15 Báà bu yaa púĺaaa, bu gbíntìi lòoǹ ní,
bu cáá ŋkpiim ní ki sɔ̀m̀.
16 Bu sòoǹ ti-Dindaan deedeeu pu yii:
«U sá m-taŋkpanaakooku ní!
Baa kāntí tin kaa bí deedeeyee u-ni!»