Ilan 107

KUGBƆŊŊMOOŊMOOTIIU

(Ilan 107–150)

Tí jāam̀ Unimbɔti ufiil

107

1 Tí Nyɔ̄ŋkìmaan ti-Dindaan, di sá yii u ŋān̄,

ní u-neeŋkpaandi bí kí nīn cá jaanjaan.

2 Bin kɔkɔ ti-Dindaan dá ki líìyee ń lì míǹ.

Bin ní ti-Dindaan dá ki nyántì unannanli ŋaanee,

3 bin u kóoǹní ntimu kɔkɔn,

ŋwìiń nyalaŋki pú nì ŋwìiń jeetilaŋki pú,

ŋgan pú nì ŋgiil pú ki kpáfèe ń lì míǹ.

4 Biba nìn tú ki yìiǹ kuteeun,

ki còom̄ ki cá kitiŋkuliŋŋin,

kaa nìn ká nsan ŋun cá kitiŋ kin poon binib kóòyee.

5 Ŋkùm nì nnyinnyoo nìn cúú-bi,

ní bi-wunti yɔ̄tì.

6 Bi-gìŋ́ŋi poonee, bi nìn fáá mbiil ti-Dindaan watil pú,

ní úǹ nìn fīī-bi ki nyántì bi-nimbinaamandi poon.

7 U nìn dū-bi ki tākaǹ nsan ŋun tèen̄ee poon

ki cūnnì-bi kitiŋ kin poon binib kóòyee.

8 Bí nyɔ̄ŋkì ti-Dindaan u-neeŋkpaandi

nì u-maamaaci tuuŋŋi ŋin u ŋáań ki tìì binibee pu!

9 Di sá yii un ní nnyinnyoo nìn cááyee, u tīī-u u nyùn̄,

ní ki tīī un ŋkùm nìn cááyee u jíń ki díkí.

10 Biba nìn kā dibɔmbɔndin nì ŋkúm jiliŋku booŋŋun,

bi nìn bí falaa sarkaun ní bi bóob́-bi ikusaka.

11 Di sá yii bi nìn jáń nì Unimbɔti marab,

bi nìn kpēē Yilpu Fɔ́ŋŋŋ Nimbɔtiu bɔkpaaŋi fám.

12 U nìn dū falaa ki sīntì-bi taapu,

bi nìn gbéetì ki làá lítí ní báà ubɔ kaa nìn tútuǹ-bi.

13 Bi-gìŋ́ŋi poonee, bi nìn fáá mbiil ti-Dindaan watil pú,

ní úǹ nìn fīī-bi ki nyántì bi-nimbinaamandi poon.

14 U nìn dáaĺ-bi ki nyántì dibɔmbɔndi

nì ŋkúm jiliŋku booŋŋuee poon

ní ki nìn tīfì bi-kusakai.

15 Bí nyɔ̄ŋkì ti-Dindaan u-neeŋkpaandi,

nì u-maamaaci tuuŋŋi ŋin u ŋáań ki tìì binibee pu!

16 Di sá yii u wīil̀ tasa kúti punuubi

ní ki nákatì tikpàlkaal tin sá tikútee^a.

17 Biba nìn kpántì bigbaambi ki jíń falaa bi-saŋkpitii pu,

bi-kpitii puee, bi nìn jíń falaa tikpil.

18 Tijin kɔkɔ nìn núutì-bi,

baa nìn gíti dátiǹ ŋkúm.

19 Bi-gìŋ́ŋi poonee, bi nìn fáá mbiil ti-Dindaan watil pú,

ní úǹ nìn fīī-bi ki nyántì bi-nimbinaamandi poon.

20 U nìn dū u-nyɔɔbundi ki cáaǹ-bi

ní ki fīī-bi ki nyántì ŋkúm ŋaan.

21 Bí nyɔ̄ŋkì ti-Dindaan u-neeŋkpaandi,

nì u-maamaaci tuuŋŋi ŋin u ŋáań ki tìì binibee pu!

22 Bí ŋá saraabi kí jāam̀ Unimbɔti,

bí fáá iwiliili kí dàntì-u u-tuuŋŋi pu.

23 Biba nìn kɔ́ meelab ki tɔ́kɔ́ tiŋku pu,

bi nìn bí tiŋku pu ki bàntī.

24 Bíǹ gbantee nìn ká ti-Dindaan tuuŋŋi

nì maamaacib bin u ŋáań tiŋku puee.

25 U sòoǹ ní kubuŋkpaaŋŋu ń kíĺ

ki yòontí tinyiŋgban.

26 Tinyiŋgbanee nìn yòontí bi-meelab ki tòó yilpu,

ní ki fàtīi dù-bi ki múl̀ nnyimin.

An nìn bíi ŋáań mimmee ní bi nyùn̄ ŋkpatim.

27 Bi-nimbiliŋ nìn bíi bɔ̀ntī ní bi kpìntī kii udanyɔgbilee.

Baa nìn gíti nyí tin bi làá ŋée.

28 Bi-gìŋ́ŋi poonee, bi nìn fáá mbiil ti-Dindaan watil pú,

ní úǹ nìn fīī-bi ki nyántì bi-nimbinaamandi poon.

29 U nìn yāntì kubuŋkpaaŋŋuee ŋmíl̀,

ní tinyiŋgban mun dōoǹ soooo.

30 An ŋmíl̀ mimmee ní an mɔ́ɔkiǹ-bi,

ní ti-Dindaan kpōotì-bi ki cūnnì meelayulilaŋki,

laakin bi nìn là kí cùee.

31 Bí nyɔ̄ŋkì ti-Dindaan u-neeŋkpaandi,

nì u-maamaaci tuuŋŋi ŋin u ŋáań ki tìì binibee pu!

32 Bí yòon̄ u-yindi yilpu samaa kansikin,

kí nyɔ̄ŋkì-u bitindaŋkpilib kpafil poon.

33 Úǹ di yàntī mbun ń fóotí kí kpántí kuteeu,

ní anyimbulnimbil ń gúń kí kpā,

34 kí yàntī kitiŋ kin cáá ntiŋkpamee ń kpántí kitiŋ kin kpíìyee,

binib bin kóò ki-puee tuŋkpitiŋ pu.

35 U tí ŋūǹ kí yàntī kuteeu ń kpántí kubɔɔu,

ní kí yàntī kitiŋkuliŋŋi ń kpántí anyimbulnimbil.

36 U cāabìń bin ŋkùm cááyee kí kàan̄ niin,

bí náań kitiŋ kí nīn kíǹ ki kóò ki-pu.

37 Bi kù akpaan kí bɔ̄l̀,

ní kí cóoń fiinyi sufii

ní kí dāá kìtī abil.

38 Ti-Dindaan bìintí bi-boon ní bi bùtī,

waa bàtī bi-waŋkuti wíiŋŋu pu.

39 Ama biba wíiŋŋu nìn bātì,

ní bi nìn dū diwɔ́bil nì nnaabu nì kunimbaau

ki nyīī-bi ki sīntì taapu.

40 Ti-Dindaan yāntì bi kíǹ ki kpèé abɔtibil fám.

U yāntì ŋi tú ki yìiǹ kuteeu kun pu nsan kpée.

41 Ama u nyāntí ufalaadaan u-falaaun,

ní ki yàntī bi-dicaŋŋi bùtī kii tiwaŋkutee^b.

42 Bin pɔbiliŋ bí dibee yaa ká mimmee, bi fàal̀ ní,

ama binikpitib kɔkɔ pìintí bi-nyɔmmu!

43 Ŋma sá uciŋfiti ní?

Udaan ń kpāafì tibɔti nee,

ní kí béé ti-Dindaan neeŋkpaandi!

Udaan ń béé yii ti-Dindaan ŋān̄.