Ilan 108

M làá péeǹ kutaa kí fìntī

(B. 2-6. kpèè 57.8-12, b. 7-14. kpèè 60.7-14)

108

1 Nlan. Daafiidi di ŋmàn̄ nlan nee.

2 M cáá dimákal, m-Nimbɔtiu,

m làá gāā nlan kí nyɔ̄ŋkì-si nì m-naŋki kɔkɔ.

3 Iŋmii saalaa beeku nì saŋgu, fìntīmaanee,

m làá péeǹ kutaa kí fìntī.

4 Ti-Dindaan, m làá nyɔ̄ŋkì-si anibul kansikin,

m làá gāā ilan kí pàkà-si atimbun kansikin.

5 Di sá yii a-neeŋkpaandi wīikí ki jítiǹ kutagbɔŋu,

ní a-baamɔŋyi wīikí ki tin sāā atagban.

6 Unimbɔti, a sá ukpaan ki jítiǹ kutagbɔŋu,

yàntī a-nyooti ń gbí kitiŋ kɔkɔ!

7 Dū a-pɔŋkpaaŋŋu kí fīī-ti kí fōō ti-wimmeem,

án nín làá ŋá pu a-nib bin a néeńee ń ká difiilee.

8 Unimbɔti sòon̄ u-circir diiku poon.

M jáń ki jíń! M làá yàkatī Siikeem tiŋki,

ní kí ŋmàntī Sukooti tantakal.

9 Man di yì Galaadi, man di tí yì Manasee mun.

Eefiraayiim di sá man janjafuuliiki,

ní Juuda sá m-beel pɔŋŋu.

10 Moowaab sá kusampeeu kun poon m fùul̀ee ní.

M tákatì m-naatakal ki lúkú Eedoom tiŋki pu^a,

m fátí dijajil kuŋkuuntii Fiiliistii tiŋki pu.

11 Ŋma di làá cùnnì-mi kitiŋ kin

bi máń digundi ki túee poon ní?

Ŋma di làá cùnnì-mi Eedoom tiŋkin,

12 an yaa kaa sá sii Unimbɔti un di dū-ti ki fá,

kaa ti cēentí ti-janjakitiŋee?

13 Dāá tūtuǹ-ti tí já nì unannanli,

di sá yii unil tūtuntam sá fám ní.

14 Unimbɔti yaa bí ti-ceeyee, ti làá já kí jī,

úǹ di làá tāā kí mátí ti-nannanliibi.