Ilan 109

Unil un bi bíi kɔ́kɔĺee bíi yíì Unimbɔti ń jòoń-u

109

1 Daafiidi di ŋmàn̄ nlan nee ki tīī bilaŋgaaliibi kpiliu.

Unimbɔti un m nyɔ́ŋkée, taa nín̄ ŋmí míǹ,

2 di sá yii binikpitib nì binyimɔndambi kɔ́kɔĺ-mi,

bi sòoǹ ki bíiĺ-mi.

3 Bi nín ná-mi ki sòoǹ tiŋyee māntìi tú-mi an kɔkɔ pu,

maa ŋá-bi tiba ní bi jáà nì mi.

4 M yaa bíi dàkà-bi m-neendee ní bíǹ bí ki kɔ́kɔĺ-mi,

ama ní m mèé ki tìì-bi.

5 M yaa ŋá-bi tiŋanee, tikpitil ní bi dùú téeǹ-mi,

ní m yaa tí dàkā-bi dineendee, bí dū kináŋ kí téeǹ-mi.

6 Bi sòoǹ m-pu yii: «Tí lēē unil ubɔ ú jáǹ-u,

ukɔkɔli ubɔ ń yūĺ u-ŋaŋgiil pú^a.

7 Bi yaa sòon̄ u-bɔtee, ú jī dibɔkpil,

ní u-wimmeem ń kpántí-u ikpiti.

8 U-maŋfal wiiŋyi ń bàtī,

ubɔ ń fōō u-tundi^b.

9 U-jipɔmbi ń kpántí ataŋkpiibil

ní u-nimpuu ń kpántí ukpiipu!

10 U-jipɔmbi ń kpántí naayeekub kí nīn mèé ki jīǹ,

bí nīn nyēē bi-digbuŋkatiŋ poon ki mèé ki jīǹ!

11 Un u jíń dipɔndee ń dāá kóoǹ u-wanti kɔkɔ,

ní binicambi ń dāá fūkul̀ u nín túń ditundi ki ká tiŋyee.

12 Ubɔ ń taa dàkà-u kulaŋŋaŋfitiiu,

ubɔ ń taa sɔ̄ u-taŋkpiibiliŋ saai!

13 U-naantiibi ń kúntí

bí taa ti gbìl̄ bi-yiŋŋi pu abin ŋin dòońee poon!

14 Bí téetí ti-Dindaan u-baabi kpitii pu,

tiba ń taa pítí u-na kpitii!

15 Ti-Dindaan ń nīn pée téetí bi-kpitii pu

ní kí yàntī bí taa ti téetí bi-pu kitiŋ pu!

16 Di sá yii kijapaai nee kaa pée dākafì kí ŋá tiŋan,

ama ní ki sāaǹ ki tin kūū ufalaadaan nì unandaan

un wunti yɔ̄tèee.

17 U nìn néeń ki tòó binib mbusu,

mbusu ń gítí u-pu.

Waa nìn pée néeń dibiindi bɔti,

dibiindi ń sāǹ kí wàatī-u.

18 U nìn dū mbusu ki pēeǹ kii dibɔkutikpaandee,

dí kɔ́ u-poon kii nnyimee^c

ní kí kɔ́ u-kpabiŋin kii ŋkpamee.

19 Dí nīn bīī u-pu kii tiwampeeŋkaalee,

kí nīn pée gbìn̄ u-caŋ kii dambalee!»

20 Ti-Dindaan nín làá pà bin kɔ́kɔĺ-mi

ki sòoǹ ki bíiĺ-mee puee dee!

21 Ama sii ti-Dindaan m-Nimbɔtiu,

a-yindi puee, ŋá-mi tiŋan,

a-neeŋkpaandi ŋanti puee, fīī-mi.

22 Di sá yii ufalaadaan nì unandaan ní m sá,

m-poon kaam cɔ́tì.

23 M bíi cá dee kii mboon nín wáŋkí puee,

bi bíi jì-mi kii unaakitoonee.

24 M bóob́ kinyɔkɔ áli m-tabiŋyiliŋ kíǹ ki jìkì,

ní m dúntì ki kíǹ akpab ŋma.

25 Bi bèel̄-mi,

ní bi yaa ká-mee, bi gbákafí bi-yiliŋ.

26 Ti-Dindaan m-Nimbɔtiu, jòoń-mi,

a-neeŋkpaandi puee, fīī-mi.

27 Yàntī bí béé yii sii di ŋá,

sii ti-Dindaan di ŋá míǹ ki tīī-mi.

28 Bi tòó mbusu, ama ní sii bìintí.

Bi yaa bíi jáà nì mi, icoo làá cúú-bi,

ní man a-tɔntɔnliu ń nīn fàal̀.

29 Yàntī icoo ń cúú bin kɔ́kɔĺ-mee,

bí dū bi-cooi kí bìin̄ bi-ba pu kii dibɔkutikpaandee!

30 M làá gāā ilan mpɔn kí jāam̀ ti-Dindaan,

m làá nyɔ̄ŋkì-u kunipaau kansikin.

31 Di sá yii u yú ufalaadaan ŋaŋgiiliŋu pú

kí fīī-u kí nyāntí bin bíi kù u-bɔtee ŋaan.