Kí téetí ti-Dindaan maamaaci tuuŋŋi pu
111
1 Aleeluya, nyɔ̄ŋkìmaan ti-Dindaan!M làá nyɔ̄ŋkì ti-Dindaan nì m-pɔbil kɔkɔ
deedeedambi kpafil kansikin.
2 Ti-Dindaan tuuŋŋi sá akpaan,
bin kɔkɔ néeń-ŋee dàkafī ŋi-pu ní.
3 U-tuuŋŋi sá tinyool nì jilma ní.
U-deedeeu bí ní ki cá jaanjaan.
4 U là yii tí nīn téetí u-maamaaci tuuŋŋi pu.
Ti-Dindaan sá ulaŋŋaŋfiti ní u-poon mɔ̄.
5 U tìì bin fàŋkí-uee tijin bi jīǹ,
waa súntí u-poondi pu jaanjaan.
6 U dàkā u-nibul u-tuuŋŋi pɔŋŋu
ŋyunti ŋun ní u fōō atimbun aba timmu ki tīī-bee.
7 Tin u ŋáańee sá ibaamɔn nì deedee ní.
Unil ŋūǹ kí nīn máká u-bɔkpaaŋi pu.
8 Ŋaa kpántí dalba dalba.
Ibaamɔn nì deedee ní u dūu náań-ŋi.
9 U fīī u-nibul ki líì
ní ki pūtì ki pōoǹ-bi talku poondi.
U-yindi bí circir ki cáá tifaandi.
10 Á fàŋkì ti-Dindaanee di sá iciin kílilaŋkia.
Bin fàŋkí-u mimmee wálifì ní.
Ti-Dindaan nyɔŋkii bí ní ki cá jaanjaan.