Ilan 112

Deedeedambi naam!

112

1 Aleeluya, nyɔ̄ŋkìmaan ti-Dindaan!

Unil un fàŋkí ti-Dindaan

ní ki néeń u-marab tikpilee bí mmɔnneeee!

2 U-naantiibi làá nīn sá bin cáá mpɔn kitiŋ puee ní.

Ti-Dindaan bìintí bin pɔbiliŋ bí dibee maaliŋu pu ní.

3 Tigaajawan nì tigaajati bí u-dumpu,

ní u yú nì ti-Dindaan deedee kí nīn cá jaanjaan.

4 Dibɔmbɔndi poonee, ŋwalifi nyēē ní

ki ŋmíntí bin pɔbil bí dibee.

Ti-Dindaan sá ulaŋŋaŋfiti

ní u-poon mɔ̄ ní u sá deedeedaan.

5 An ŋān̄ unil ń sɔ̄ isaa kí nīn pìntí,

kí nīn tūǹ u-tuuŋŋi ki nóó nì marab!

6 Tiba kaa pée ŋūǹ kí cìŋkì deedeedaan,

u-kpátam boonee, binib làá nīn pée téetí u-pu ní.

7 Waa fàŋkí kubɔbiiu,

u máká ti-Dindaan pu ní u-pɔbil sɔ̀m̀.

8 U-mákal bá ki pɔ̄ɔ̄ ní waa fàŋkí tiba,

ní ki cí kí ká u-nannanliibi lítitam.

9 U pūǹ bifalaadambi tiwan nì tiniti,

ní u-deedeeu bí ki cá jaanjaan^a.

U-pɔŋŋu yíkí yilpu nì tinyool.

10 Unikpiti yaa ká-uee ní ú gíí diŋuul,

u ŋmóò u-nyiŋŋi ní u-wunti ń yɔ̀tī.

Unikpiti nín dàkafī puee dāa kúntí fám ní.