Yeesaya 15

Tin ti-Dindaan sòon̄ Moowaab tiŋki puee

(Ayil 15-16: kpèè Yeer 48)

1 Tin ti-Dindaan sòon̄ Moowaab tiŋki puee sɔ̀.

Kunyabambaantiiu ní bi nāaǹ Aari tiŋki kin bí Moowaabee,

an pée dóò ki-pu dee!

Kunyabambaantiiu ní bi nāaǹ Kiiri tiŋki kin bí Moowaabee,

an pée dóò ki-pu dee^a!

2 Diibɔn tiŋkin yab jɔ́m̀ bi-waatootipaaŋyi pu kí sɔ̄.

Moowaab yab jɔ́m̀ Neeboo jool pu

nì Meedeeba tiŋkin kí yāliŋkì.

Bi-kɔkɔ kōol̀ abaakpan ní ki cáń bi-nyimpuliŋ.

3 Bi pēē kpɔsatab ki còom̄ adan pu.

Adiin ŋin bi bɔ̀b̄ee yilpu nì kpacantib puee,

bi gà ikpiisilan ní báà ŋma sūǹ^b.

4 Eesbɔn nì Eelalee timmu yab bíi gbáà ibiil,

bi tin gbìl̀ bi-neen pu doooo Yakaasi tiŋkin ní.

An pu ní Moowaab janjaliibi bí ki kūuntí,

bi-wunti yɔ̄tì^c.

5 M bíi nyàab̀ un làá jòoń Moowaab tiŋkee.

Ki-nib biba sáǹ ki bàn̄ Soowaar tiŋkin,

ní biba bàn̄ Eegilati Seeliisiya tiŋkin.

Bi sūǹ ki dàb̀ Luwiiti gbantaŋki,

ki gbáà ibiil nì kunimbaau

ki tàkā Ooroonayiim saŋŋu pu^d.

6 Niimriim buŋŋu fóotì.

Timool kūń kaa ti nyēē,

timɔsɔn kaa ti pée bí.

7 An pu ní binib kóoǹ bi-wanti tin kíǹ-bee

ki kpáàa sáǹ ki dūtì peepiliiyee sufii buŋŋu.

8 Ibiil di pée tùm̀ dàii Moowaab tiŋki kɔkɔn.

Bi gbìl̀ iyaliŋki pu Eegilayiim tiŋkin,

bi gbìl̀ i-pu doooo Beer-Eeliim.

9 Mbun ŋun jītí Dimɔn tiŋkinee máǹ fatiku,

ní m làá kūtì Dimɔn yab nnaabu ŋubɔ mun.

Gbikinti ubɔ làá cūtì Moowaab yab

bin kíǹ bi-tiŋkin kaa kpíìyee.