Yeesaya 45

Siirusi, un ní Unimbɔti lēēyee

1 Ti-Dindaan sòon̄ nì Siirusi,

ubɔti un ní úǹ u-ba lēēyee yii:

«M cúú a-ŋal

kí dū atimbun kí ŋá a-ŋaan.

M làá cúú bibɔtiibi pɔŋyi kí fōō bi-ŋaan,

ní kí pìitī ntimu punyɔmmu mun pīīyee a-nimbiin.

2 Mama m-ba làá nīn līī a-nyɔkɔpu,

m làá cúú aganlaka kí làkatī a-saŋŋu pu,

kí gbá kí wìil̀ tasa kúti punuubi

ní kí gbá kí bīil̀ tikúti kpàlkaati.

3 M làá tīī-si tigaajawan tin bí dibalinee,

tigaajati tin bi dūu bál̀ee.

Niinee a làá béé yii man di sá ni-Dindaan.

Siirusi, m yíiń a-yindi, man di sá Isirayeel Nimbɔtiu.

4 M-tɔntɔnliu Jaakɔb nibul pu,

Isirayeel nibul din m lēēyee pu

ní m yíiń a-yindi ki tīī-si jilma,

nì min kɔkɔ saa nyí-mee.

5 Man di sá ni-Dindaan, ubɔ pée gíti kpá.

Báà unimbɔti kaa ti pée bí ki kútì man pu.

M dū dambala ki gbìn̄ a-caŋ kí tīī-si mpɔn

nì min kɔkɔ saa nyí-mee.

6 Kí yòon̄ ŋwìiń nyalaŋki pú

kí cáá sāā ŋu-jeetilaŋki púee,

báà ŋma làá béé yii

tiba kaa ti pée bí ki kútì man pu.

Man di sá ni-Dindaan, ubɔ pée gíti kpá.

7 Man di mɔ́ɔ̀ ŋwalifi

ní ki nāantí dibɔmbɔndi,

man di nyāntí nnaam

ní ki cāabìń nnaabu.

An sá man ni-Dindaan

di ŋáań tíǹ gbanti kɔkɔ.

8 «Yilpu, yàntī dipɔ̀ńdi ń nyānní kutaa pu kí tɔ̄ń.

Atagban ń yàntī deedee ń sìtīń kitiŋ pu kii utaayee.

Kitiŋ ń wàan̄ kinyɔkɔ,

difiil ń púkuḿ

ní deedee ń nyā.

Man ni-Dindaan di náań

tíǹ gbanti kɔkɔ.»

Kuyɔkɔu nì uyɔɔmaati

9 Mbusu dɔ̄ ki cí unil un kpākantí un máń-uee.

Unil sá kii aboon kansikin dibee ní.

Kuyɔkɔu bàlifī uyɔɔmaati yii:

«Ba ní a ŋáańeeee»?

Tiwan tin bi máńee kaa lì un máń-tèe yii:

«Waa nyí ditundi tiŋan^a.»

10 Mbusu dɔ̄ ki cí un di yaa lī ubaati yii:

«Ba ní a màl̄ nee ní?»,

àá un di yaa lī umati yii:

«Ba ní a màl̄ nan ní?»

11 Ti-Dindaan, Isirayeel Circir Nimbɔtiu

nín sòon̄ u-nibul din u máńee puee sèé:

«Ni bàlifī-mi tin làá bàń m-biyaamu puee.

Ni làá tīī-mi mara ditundi din m túńee puɔɔɔ?

12 Man di ŋá kitiŋ

ní ki náań inifunaan ki-pu.

Man nì m-ŋalii ní m dūu kpátì yilpu ki dāntì,

ní iŋmalbijaa in bí niinee kɔkɔ bí m-taapu.

13 Man di lūkutìń unil nee ki nóó nì deedee saŋŋu,

ní ki làá cúú aganlaka kɔkɔ kí làkatī u-saŋŋu pu.

Úǹ di làá fàtīí mā m-tiŋki, Jeerusaleem

ní kí gíiǹní m-nib bin cūtì kuyuŋuee.

Baa dāa cáá tiba kí pàaa, kaa làá tīī tiba mun.»

Ti-Dindaan Mpɔŋkɔdaan di lī míǹ.

Isirayeel, Unimbɔti bí a-cee

14 Ti-Dindaan nín lī puee sèé:

«Eejipiti yab tundi paati,

Kuusi yab bantiliibi nimbiliŋ

nì Seeba yab tijawɔkɔlee,

tíǹ kɔkɔ làá kɔ́ a-ŋaan

á nīn kíǹ ki yì.

Binib gbanti kɔkɔ làá dāá nīn gbìn̄ ikusaka

ki pá a-boon.

Bi làá dāá gbàan̄ a-nimbiin

kí dāá mèè ŋwimmeem kí lì yii:

<Sii baba cee ní Unimbɔti bí,

báà ubɔ kaa ti pée bí ki kútì u-pu!>»

15 Isirayeel Nimbɔtiu, sii un di fìil̄ee,

a lafun sá Unimbɔti un bál̀ee ní.

16 Icoo làá cúú bin kpítí awaayee kɔkɔ,

ní sòoǹ kí bīil̀ bi-yindi.

Bi còom̄ dicilpu ki cá bi-yiliŋ tīī.

17 Ama ti-Dindaan fīī Isirayeel nibul,

u fīī-bi kí nīn cáa cá jaanjaan.

Nimbi bin sá u-nibulee,

icoo pée gíti kpá kí cúú-ni,

ní ni-yindi pée gíti kpá kí bīil̀ jaanjaan.

Difiil din pu bi sòon̄ an cántì tiŋanee

18 Ti-Dindaan nín lī puee sèé.

Ti-Dindaan di náań yilpu,

úǹ Unimbɔti di máń kitiŋ,

ki nyántì-kì ní ki yāntì kì bá ki pɔ̄ɔ̄.

Waa náań-kì kí nīn dɔ̄ fám,

u máń-kì yii binib ń nīn kóò ki-pu ní.

U bí yii: «Man di sá ni-Dindaan,

ubɔ kaa ti pée bí ki kútì man pu.

19 Maa sòon̄ dibalin,

dibɔmbɔndi poon laaba.

Maa lī Jaakɔb naantiibi yii:

<Ní nyàab̀maan-mi kubuŋu pu.>

Man di sá ni-Dindaan,

m sòoǹ tin bí deedeeyee ní,

m lì tin sá mbaamɔn ki cáá dikílee ní.»

Atimbun làá kpántí ŋi-ba

20 Ní kpāfìmaan kí dāan̄,

nimbi bin ŋmátì ki nyáń atimbunee.

Ní sútí kí pìl̄maan dicilpu.

Binib bin tú bi-waakpitikaaŋi,

ki mèé unimbɔti

un kaa ŋūǹ kí fīī-bee,

bidambi kaa nyí tiba.

21 Sòom̀maan, ní cáaḿmaan kun dàkà yii ni-bɔti ŋān̄ee.

Ní kpāfìmaan kí sòoǹ dicilpu.

Ŋma di sòon̄ tin bíi jītí kɔŋkɔnnee pu ŋkilkaamin?

Ŋma di nìn dū-tì ki nāatì doooo cannaaku?

An kaa sá man, ni-Dindaanaaa?

Unimbɔti ubɔ kaa ti bí ki kútì man pu.

Man boonee deedee Nimbɔtiu,

Unimbɔti un fìil̄ee ubɔ pée gíti kpá.

22 Nimbi bin kɔkɔ kóò kitiŋ kúntilaŋkee,

ní fàtīí gítiḿmaan m-cee, ni làá ká difiil,

kun puee man di sá Unimbɔti,

ubɔ kaa ti bí ki kútì man pu.

23 M pūtì m-ba yii

ibaamɔn di làá nyā m-nyɔkɔn,

m-nyɔɔbundi kpá ki làá kpántí:

Ditabiŋyil kamaa làá dāá gbàan̄ m-nimbiin,

dilimbil kamaa làá dāá pùtī kí lì yii^b:

24 «Ti-Dindaan baba cee

ní ibaamɔn nì mpɔn bí.»

Bin kɔkɔ nìn pée jáń nì mee

làá dāá dāan̄ m-cee nì icoo.

25 Ama ti-Dindaan puee,

bi làá sòoǹ kí pɔ̀ Isirayeel naantiibi kɔkɔ,

ní bí dāá nīn bí ki fàal̀.