Babiloon waaŋi nì Unimbɔti un sá ubaamɔnee
46
1 Diwaal Beeli kpōoǹ,diwaal Neeboo lítì.
Bi dū ŋi-naŋku ki túǹ tiwaŋkuti.
Dooooyee, bi yaa nìn tòotī-ŋee, bi nìn dúkutí-ŋi ní.
Kɔŋkɔnnee, ŋíǹ di kpántì diwaŋgul din nyìm̀ee
tiwaŋkuti tú ki gīīyee.
2 Awaa kpōoǹ,
ŋi-kɔkɔ lítì dicilpu.
Ŋaa ŋúń ki fīī ŋi-naŋku,
bi cáǹ ŋíǹ ŋi-ba kuyuŋu.
3 Pīlifìmaan-mi, Jaakɔb naantiibi,
nimbi bin kíǹ Isirayeel nibul poonee,
nimbi bin ní m ŋúb́ doooo ni-na poonee,
nimbi bin m ŋúb́ doooo ŋyunti ŋun bi màl̄-nee.
4 M làá nīn pée bí míǹ ní áli ni-putin.
M làá nīn pée ŋúb́-ni ní áli ni-yikpiti ń pīil̀.
Man di máń-ni,
man di làá ŋúb́-ni.
M làá kpèè-ni
ní kí fīī-ni.
5 Ŋma ní ni ŋūǹ kí dū-mi kí ŋmàntīǹ ní?
Ŋma ní ni ká yii man nì u ŋmà ní?
Ŋma ní ni làá dū-mi kí nántíǹ
ní kí ká yii man ní u náań ní?
6 Binib fùtīń sindaariya bi-lɔtin.
Bi ŋmàntī animbil kúti saniya pu.
Bi cáa tìì goosimiiti yii ú mɔ́ɔ́-bi diwaal.
Boonee ní bi gbàantí di-nimbiin ki jáaḿ-dì.
7 Bíǹ di yòontí-dì kí páań bi-gbigbipati pu,
kí cáá-dì kí cùnnì kí síiń mpaan ŋubɔ pu.
Laakin ní bi síiǹ-dèe, niin ní dì pée sí.
Unil yaa kúuǹ ki yíiń-dàaa, dàa kíikí,
unil yaa tí kɔ́ dinimbinaamandinaaa, dàa fìil̄-u.
Difiil tóobiń
8 Téetímaan tin bí nee pu kí ká kunyannyaau!
Pɔɔgaatib, ní kɔ́maan ni-ban kí dàkafì!
9 Ní téetímaan tibɔkpikil tin nìn jítèe pu.
Man di sá Unimbɔti, ubɔ pée gíti kpá.
Unimbɔti ubɔ kaa ti pée bí kii mamee.
10 Doooo ŋkilkaamin ní m báakì tin làá dāá bàńee.
Doooo cannaaku ní m sòon̄ tin kaa láá ŋée pu.
M bí yii: «M nín yóoǹ kí ŋá puee làá dāá ŋá.
M yaa là puee, míǹ ní m ŋáań.»
11 M yíiń ukaabu ubɔ
doooo ŋwìiń nyalaŋki pú.
Úǹ di làá dāá ŋá tin m bɔ́ntì ki síiǹee.
U làá dāá nyānní kitiŋ kin dátèe ni.
M yaa lī puee, míǹ ní m ŋáań.
M nín bɔ́ntì kí ŋá puee, m làá ŋá míǹ.
12 Ní pīlifìmaan-mi, bipɔɔgbifindambi,
nimbi bin dátiǹ difiilee.
13 M làá cáań m-baamɔŋyi,
iaa ti pée dátiǹ-ni báà fiii.
M-fiil kaa làá sūŋkì ní kí bàń.
M làá yàntī Siiyɔn ń ká m-fiil,
m làá tīī Isirayeel m-nyaaŋku.