Yeesaya 47

Ti-Dindaan làá sìntīǹ Babiloon tiŋki taapu

1 Babiloon tiŋki,

kpákatí a-beejal pu kí kàl̄ ntampukumin.

Babiloon yab tiŋki,

kàl̄ kitiŋ.

Di sá yii dalba dalba baa làá ti pée yíiń-si

yii <Babiloon kinyannyaaŋŋi>,

<Babiloon tiŋki kin là ki-bee>.

2 Yòon̄ kunaau nì nnaamintidɔ

kí nà ŋyim.

Páatí a-ŋaabiiŋkaaŋu,

kí kóoǹ a-wɔndoou,

bìitī a-tapaŋŋi pu

kí dùtī ibun.

3 Binib làá ká a-cancaŋgbeel,

kí ká kun di kɔ̄ntí-si icooyee.

Man làá tɔ̀ ipɔntoon,

ní an kaa cáá yii ubɔ làá pìin̄-mi nsan.

4 Un di dá-ti ki líìyee,

bi yíì-u yii: «Ti-Dindaan Mpɔŋkɔdaan ní.»

Úǹ di sá Isirayeel Circir Nimbɔtiu.

5 Babiloon yab tiŋki,

tàtīí kàl̄ kí taa pée mūlifì tiba.

Kɔ́ kí báĺ dibɔmbɔndin.

Di sá yii baa ti làá pée yíiń-si dalba dalba yii:

<Un jīǹ abee kɔkɔ pu dinyandee>.

6 M nìn gíí m-nibul pu diŋuul ní.

M nìn dū bin m yèe ki fá,

ní ki nìn dū-bi ki ŋá a-ŋaan.

Ama ní aa súń bi-saai báà fiii,

a wɔ́b́ bijaŋkpilib an ti kpáàa jítì mara pu.

7 A nìn bí ki lì yii: «M làá nīn pée bí

kí nīn sá un jīǹ dinyandee ní ki cá jaanjaan.»

Aa dākafì a-pɔbil poon tibɔti nee pu,

kaa dākafì foolboon pu.

8 Kɔŋkɔnnee pīlifì tin bí nee, sii umɔnjil.

A pée kā a-beejal pu nì dimákal

ki lì a-pɔbil poon yii:

«Man baba di pée bí,

ubɔ kaa ti bí kii mamee.

Dalba dalba maa làá kpántí ukpiipu,

ní m-biyaamu mun kpá ki làá kpú.»

9 Tibɔti gbanti liitil làá bàń-si

dicilpu dicilpu ní, ŋwimbaanti.

A-biyaamu làá kpú ní á kpántí ukpiipu^a.

Bikpaŋkpantiibi nì bibɔɔbi kaa làá ŋmā

kí pìin̄ nsan tíǹ ń taa bàń-si.

10 A nìn máká a-tuŋkpitiŋ pu ní ki nìn lì yii:

«Ubɔ kaa wāĺ-mi.»

An sá a-ciiŋyi nì a-nyil di nìn kíil̀-si,

di sá yii a nìn lì a-pɔbil poon yii:

«Man baba di pée bí,

maa cáá juti!»

11 Nnaabu làá jēetí a-pu,

aa làá béé a nín làá ŋá puee.

Asaluu làá kɔ́-si,

aa dāa ŋūǹ kí wúń a-ba pu.

Dinimbinaamandi din pu aa bàà túkúee

làá jēetí a-pu dicilpu dicilpu.

12 Nín̄ pée gbíntìi nìkì ki ŋáań a-bɔɔtuuŋŋi

nì a-kpaŋkpantiiku.

Atuun gbanti pu ní a gīī doooo a-biyatin.

An yaa yíì a làá dāá páatí ŋi-pu,

an yaa yíì a làá ŋmā kí fàaǹ bin kíǹee ŋi-pu.

13 A bālifì dibalifil ki tin kpáàa gīī.

Bin cútí kutagbɔŋu kí yàkatī yàkatī,

ki kpèé iŋmalbijaa

ki nàatī tin làá jītí a-pu uŋmal kamaayee

ń dāan̄ kí fīī-si!

14 Bi làá dāá kpántí kii timɔkulindee ní,

ní ŋŋmi ń dāá wà-bi.

Baa làá ŋmátí kí nyā aŋmilimbilin.

An kaa dāa sá kii kpɔnɔŋmiŋu,

àá kii ŋŋmiwulkaayee!

15 Míǹ ní bibɔɔbi bin pu a nìn gīī

doooo a-biyatinee làá nīn sá ki tīī-si.

Kɔŋkɔnnee, bíǹ di tú ki yìiǹ an kɔkɔ puee,

ní bi-kansikin ubɔ kaa ŋūǹ kí fīī-si.