Yeesaya 48

Ti-Dindaan làá ŋá tibɔpɔn

1 Pīlifìmaan tin bí nee, Jaakɔb nibul,

nimbi bin bi yíì Isirayeel yab

ní ni nyánní Juuda nyeeŋunee.

Ni pòontí ipoon ti-Dindaan yindi pu,

ní ki mèé ki yíì Isirayeel Nimbɔtiu,

ama ní kaa ŋáań míǹ nì ibaamɔn nì deedee poon.

2 Ni yíì ni-ba yii

<Circir tiŋki yab>,

ní ki máká Isirayeel Nimbɔtiu pu,

úǹ un bi yíì yii

<Ti-Dindaan Mpɔŋkɔdaanee>.

Ní pīlifìmaan tin bí nee.

3 M sòon̄ tibɔkpikil pu

ki síiǹ an yúntì.

Tì nìn nyáń m-nyɔkɔn,

ní m nìn yāntì ni gbìl̄-tì.

Dicilpu dicilpuee ní m yāntì tì dɔ́miń.

4 M nyí a-pɔɔgbifiŋŋu pu.

Di sá yii a-pɔbil tīlifì

ní a-yil pɔ̄ɔ̄.

5 An pu ní m nìn sòon̄ nì si

tibɔti gbanti pu ki síiǹ dooooyee.

M nìn yāntì a gbìl̄-tì

ki wāatì ní tì nín bāań.

Maa là yii á dāá lì yii:

«An sá m-waal di túń an tundi,

m-waakpitikaal àá m-waamɔ́ɔkaal

di tīī mara ní ki yāntì an ŋá míǹ.»

6 Ni nìn gbìl̄ tin m nìn sòon̄ ki yóoǹee,

ní ni ká tin kɔkɔ dɔ́miń ki jítèe.

Mimmee nimbi kaa béè mimmaaa?

Kí yòon̄ kɔŋkɔnnee kí nīn cée,

tibɔpɔn pu ní m làá sòoǹ.

M nìn dū-tì ki bál̀

ní naa nìn dáá nyí-tì.

7 An kaa sá tiwan tin nìn bí dooooyee,

ama kɔŋkɔnnee ní m làá nín náań-tì.

Kí yòon̄ kí dāá sāā díǹ wiiŋŋu nee,

naa láá pée gbìl̄ bi sòon̄ ti-pu dalba dalba.

Maa là ní dāá lì yii:

8 Naa nìn pílifì, kaa nìn béè,

ni-tafaliŋ pée kpá ti-pu an yúntì.

M nyí ni nín sá bin nyēē bi-jutiibi boonee,

ní bi yíì-ni yii:

<pɔɔgaatib doooo ni-na poon>.

9 M-yindi pu ní m tāaǹ m-ŋuul ni-pu,

m-nyooti pu ní m ká kimɔtii ni-pu,

án nín làá ŋá pu ḿ taa kúntí-nee.

10 Kpèè, m cɔ́ŋkì-ni ŋŋmin,

ama an kaa nín sá kii

ŋŋmi ŋun bi cáa cɔ́ŋkí animbil kútee,

nnaabu ŋmiŋun ní m cɔ́ŋkì-ni.

11 An sá man m-ba yindi pu.

Tiŋman ní, man m-ba yindi pu

ní m ŋá míǹ.

Di sá yii maa kíikí bí bīil̀ m-yindi.

Maa kíikí kí dū m-nyooti kí tīī ubɔ.

Un di làá ŋá tin ti-Dindaan bɔ́ntèe

12 Pīlifìmaan-mi, Jaakɔb nibul,

sii Isirayeel nibul din m yíińee.

M pée gbíntìi sá ubaantee ní,

man di sá upeepeekaa ki sá uluŋkikaa.

13 Man m-ba ŋal ní m dūu máń kitiŋ,

nì m-ŋalii ní m dūu kpátì kutagbɔŋu.

M yaa yíiń tiwan gbanti liitilee,

tì dòoń ní dicilpu dicilpu.

14 Ni-kɔkɔ ń kóoǹní kí kpāfì kí pīlifìmaan:

M cáá ubɔti ubɔ.

U làá ŋá Babiloon tiŋki m nín là puee,

u làá dàkà Babiloon yab m-pɔŋŋu.

Ni-kansikin ŋma di sòon̄ tibɔti nee ki yóoǹ.

15 An sá m-baba nì m-baba di sòon̄.

Man di yíiń-u,

ki yāntì u dɔ́miń.

M làá yàntī ú ŋmā kí tɔ̄ u-tundi.

16 Ní sútiń kí pìl̄maan-mi

kí pīlifì tin bí nee!

Doooo ŋkilkaaminee,

maa sòon̄ dibalin.

Ŋyunti ŋun ní tibɔti nee nìn jítèe,

man nìn bí ní.

- Ama kɔŋkɔnnee ti-Dindaan Unimbɔti

di dū-mi ki tú nì u-Fam -.

Áù, a yaa bàà nìn pílifiǹ-mi!

17 Ti-Dindaan un dá-si ki líìyee,

Isirayeel Circir Nimbɔtiu nín lī puee sèé:

«Man di sá ni-Dindaan a-Nimbɔtiu.

Man di dàkà-si

tin làá ŋmā kí kèetī-see.

Man di kpòotī-si

nsan ŋun a còom̄ee pu.

18 Áù, a yaa bàà nìn pílifì

tin m nìn kpáafì-see tiŋanee,

a-gbansɔŋfiŋu bàà làá nīn sá

kii dimɔɔlee,

ní a-deedeeu ń bàà nín̄ bí

kii tiŋku nyiŋgbantee.

19 A-naantiibi bàà làá nīn wīikí

kii dibulee,

ní a-nibooliŋu ń bàà nín̄ wīikí

kii itaŋkpabiitee^a.

Bi-yindi bàà kpá kí wāŋkì

m-nimbiin jaanjaan!»

Unimbɔti nibul nyáń Babiloon tiŋkin

20 Ní nyāmaan Babiloon tiŋkin^b!

Ní sām̀maan-kì!

Ní bāakìmaan tibɔti nee

nì ifaal poon,

ní yàntī tí gbìtī

kí tin bà kitiŋ kúntilaŋki.

Ní lìmaan yii: «Ti-Dindaan fīī

u-tɔntɔnliu Jaakɔb ki líì.»

21 Kuteeu kun pu u nìn dū Isirayeel yab ki dēe,

nnyinnyoo kaa nìn cúú-bi.

Bi-puee, u nìn yāntì

nnyim nyáń ditaŋkpalin,

u búkutì ditaŋkpal

ní nnyim pùubìń^c.

22 Ti-Dindaan bí yii:

«Binikpitib kpá kí ká ŋgbansɔŋfi.»