Yeesaya 49

Ti-Dindaan tɔntɔnliu (nlanliliiti)

1 Ntimu mun nnyim māntìi túee yab,

ní pīlifìmaan-mi.

Nimbi bin kóòń ntindandatimunee,

ní kpòon̄ ni-tafal kí pīlifì.

Baa láá màl̄-mi

ní ti-Dindaan yíiń-mi.

Doooo m-na poon

ní u yíiń m-yindi^a.

2 U yāntì m-nyɔkɔ kpántì kii kitàataajiki kin jītée^b.

U dū u-ŋal ki bīiǹ m-pu.

U dū-mi ki kpántì mpiin ŋun cɔ́m̀ee,

ní ki dū-mi ki bál̀ u-baatandi poon.

3 U tùkū-mi yii:

«Isirayeel, sii di sá m-tɔntɔnliu.

Sii pu ní m làá dī

kí dàkà m-nyooti.»

4 M bí ki lì m-ban yii:

«Man gīī digìńdi fám ní,

m bɔ̄ɔ̄ abaa ki tīī kutaa.»

Ama ti-Dindaan di làá pɔ̀-mi,

u kpáafì m-paati ki cíitì-mi.

5 Kɔŋkɔnnee ti-Dindaan sòon̄.

Úǹ di máń-mi

ki tākaǹ m-na poon

ḿ nīn sá u-tɔntɔnliu.

U là yii ḿ fàtīí gíiǹní

Jaakɔb naantiibi u-cee,

ḿ kóoǹ Isirayeel nibul kí kpāfì.

M ká disíndi ti-Dindaan nimbiin,

di sá yii m-Nimbɔtiu di sá m-pɔŋŋu.

6 U bí-mi yii: «Á nīn sá m-tɔntɔnliu

kí yòon̄ Jaakɔb naakɔti yilpu,

ní kí gíiǹní Isirayeel yab bin ŋmátèe.

Ama an kaa dóò.

M lēē-si á nīn sá atimbun walifiŋu,

kí cáá difiil kí bànnì

kitiŋ gbeennyɔkɔ^c.»

Bin bínní kuyuŋuee kɔkɔ gítintam

7 Ti-Dindaan Ufiil,

Isirayeel Circir Nimbɔtiu

nín sòon̄ puee sèé.

Sii un ní bi kpèé fámee,

sii un báà ubɔ kaa là kí wāl̀ee,

sii un sá biwɔ́biliibi yumbuuee,

u bí-si yii: «Bibɔtiibi yaa láa wál̀-see,

bi làá dāá yīkì bi-beejaliŋ pu kí yūĺ.

Abɔtibil yaa láa ká a páaǹnée,

bi làá dāá gbàan̄ a-nimbiin ní.

Ti-Dindaan un sá deedeedaanee pu,

Isirayeel Circir Nimbɔtiu un lēē-see pu

ní bi làá dāá ŋá míǹ.»

8 Ti-Dindaan nín lī puee sèé:

«M-niti yuntiŋuee, m nìn pílifiǹ-si,

ní difiil wiiŋŋuee, m nìn tútuǹ-si.

Man di máń-si kí ŋmā kí dī a-pu

kí ŋá mpèé nì dinibul nee.

M làá fàtīí fōō kitiŋ nee

ní kí fàtīí yàkatī

atinjan ŋin dɔ̄ ki bíil̀ nee.

9 M bí bisarkadambi yii:

<Nyānnímaan!>,

nimbi bin kóò dibɔmbɔndinee:

<Nyānnímaan mpaampiin pu!>

Bi làá dāá ká tijin

asaŋkaŋkpil pu kí jī,

kí dāá ká ŋgbantamu kɔkɔ pu

tijin kí jī.

10 Ŋkùm kaa dāa gíti cútí-baaa,

nnyinnyoo kaa dāa gíti cútí-bi.

Nnantantum kaa dāa gíti sèetī-baaa,

ŋwìiń mun kaa dāa gíti píl̀-bi.

Di sá yii m làá dū dineendi ní kí kpòotī-bi,

ní kí cáá-bi kí cùnnì inyimbul

in sɔ̀m̀ee laŋki bí nyɔ̀^d.

11 M làá tɔ̄ m-jooŋŋi kɔkɔ pu isan,

ní kí dāá ŋāŋkì m-daŋŋi kɔkɔ tiŋan.

12 Kpèè, bíǹ di nyánní ndandati ki dòońee.

Biba nyánní ŋgan pú

ní biba mun nyánní ŋwìiń nyalaŋki pú,

ní biba nyánní Eejipiti tiŋki ŋgiil pú.»

13 Yilpu, nín̄ tátí ki fàal̀!

Kitiŋ, nín̄ kūuntí nì dipɔɔpindi!

ajoon, fáámaan iwiliili!

Di sá yii ti-Dindaan bíi sɔ̀ŋkī u-nibul pɔbil,

u bíi dàkà binandambi u-neendi.

Man kaa súntì a-pu

14 Siiyɔn nìn bí ki lì yii:

«Ti-Dindaan dū-mi ki fá,

m-Dindaan súntì m-pu.»

15 Ama ní ti-Dindaan kíí yii:

Unimpu súntí u-bipɔŋki puɔɔɔ?

U ŋūǹ kí taa ti dàkà u-poon biki dineendaaa?

Báà u yaa súntì ki-pu,

man kaa làá súntí a-pu!

16 Kpèè, m ŋmàn̄ a-yindi m-ŋal poon,

ŋyunti kamaa m wāĺ a-guŋŋi m-nimbiin.

17 Jeerusaleem tiŋki, bin làá fàtīí mā-see

di sánní malaa malaa ki dòońee.

Bin nìn kpéelikì-si ki nāaǹ-see

làá sāǹ kí wàatī-si.

18 Yáatí kí kpèè kí màntīí tū:

a-biyaamu kɔkɔ kóoǹ ki kpáfì

ki dòoń a-cee.

Man ni-Dindaan un bí dimaŋfalinee

di lī yii,

a làá dū-bi kí léeń

kii tiléeŋkaalee,

kí dū-bi kí gbìn̄

kii ubɔnti nín fùul̀ nnyim pu

kí dū dambala kí cúú puee.

19 Di sá yii a-tiŋki kin bi nāaǹ

kì kpántì adigbuŋkati

ubɔ kaa ti kóò ki-puee

kaa làá dāá nīn gíti wāā

kí bà a-nib ń kɔ́.

Ama bin nìn nāaǹ-see

làá sāǹ kí búntí ndan kí wàatī-si.

20 A-jipɔmbi bin a nìn dākafì yii baa ti bée,

a làá dāá gbìl̄ bi lì yii:

«Mpaan kaa wāā ki tīī-mi.

Sútí fiii ma mun ń ká mpaan kí kɔ́».

21 Niinee ní á dāá bàlifì a-ba yii:

«Ŋma di kalin màl̄ mbiyaamu nee ki tīī-mi dee?

Maa nìn cáá mbiyaamu,

m nìn sá uŋmaŋŋmanti ní.

Bi nìn cúú-mi kuyuŋu ní ki dū-mi ki fá.

Kin bin bí nee, ŋma di nín lōō-bi dee?

Ŋyunti ŋun m nìn kíǹ m-babee,

bíǹ nìn bí la dee?»

22 Ti-Dindaan Unimbɔti nín lī puee sèé:

«Kpèè, m làá dúkutí m-ŋal kí túĺ

atimbun watil pú kí tīī-bi kudaaŋŋu.

Bi làá dāá ŋúbiń a-jipɔmbi

bi-ŋalii poon kí gíiǹní,

kí dāá túnní a-bisalib

bi-gbigbil pu kí gíiǹní.

23 Bibɔtiibi di làá dāá nīn dàkà a-biyaamu,

ní bɔtiisalib ń dāá nīn lòó-mu.

Bi làá dāá gbàan̄ a-nimbiin

bi-yigbeeŋi tūū kitiŋ.

Bi làá dāá líntí a-taaŋi kpɔŋkpɔm.

Niinee ní a làá dāá béé yii

man di sá ni-Dindaan,

ní bin kɔkɔ máká m-puee,

icoo kaa jīǹ-bi.»

24 Bi ŋūǹ kí fōō ubaatandaan cee

tiwan tin u jáń ki fōōyee u-ŋaanaaa?

Bi ŋūǹ kí cúú usarkadaan

kí fōō uwɔ́bil ŋaanaaa?

25 Ti-Dindaan nín lī puee sèé:

«Toooo! m làá fàtīí fōō ubaatandaan cee

un u cúuń kujaaunee,

kí fōō uwɔ́bil cee

tiwan tin u jáń ki fōońee!

Man di làá já nì bin di jáà nì see,

mama m-ba di làá fīī a-biyaamu.

26 M làá yàntī bin sàantí-see

ń fàtīí ŋmɔ́ bíǹ bi-ba nanti.

Bi làá dāá nyɔ̀ bíǹ bi-ba fatikuu kí gbí

kii bi nín yaa nyùn̄ ndapɔm bi gbéè puee.

Niinee, unifoo kamaa làá dāá béé yii

man di sá a-Dindaan un fìil̄-see.

Man di dá-si ki líì,

man Jaakɔb Nimbɔtikpaaŋwu!»