Unimbɔti nì u-nibul kaa yākatì tɔbin
50
1 Ti-Dindaan nín lī puee sèé:«Ni lì yii m jìn̄ ni-na Jeerusaleem.
Too, dàkàmaan-mi kugbɔŋu
kun dàkà yii m jìn̄-uee!
Ni gíti lì yii m dū-ni
ki nyáfì kii iyumbuee
kí ŋmā kí pà m-pɔɔŋŋia.
Too, tùkùmaan-mi un ní
m dū-ni ki nyáfíǹee?
Kpèèmaan, an sá ni-kpitii pu
ní bi dū-ni ki nyáfì,
an sá ni-yìntitam pu
ní bi jìn̄ ni-na ki nyántì!
2 M nín dɔ́mińee,
ba pu ní maa ká báà ubɔ?
M nín yíińee,
ba pu ní báà ubɔ kaa kíí?
Mimmee m-ŋal kaa fɔ̀kɔ̀
kí ŋmā kí fōō-ni kí líí níii?
Maa cáá mpɔn kí ŋmā kí fīī-naaa?
Ní kpèè, m yaa pée kpìl̄ tiŋkuee,
see ú kpā,
ní kí yàntī amɔɔ ń kpántí kuteeu.
Nnyim kpátam puee,
ní nnyinnyoo ń kpɔ̀ ijɔm,
ní í sūū kí nūukì.
3 M tí ŋūǹ kí dū dibɔmbɔndi
kí bìin̄ kutagbɔŋu pu,
ní kí pèen̄-ku tiwan
kii ku kā dikpoolee.»
Ti-Dindaan tɔntɔnliu (nlantataati)
4 Ti-Dindaan Unimbɔti dàkà-mi
tin m máaǹ kí lèe
ḿ ŋmā kí sɔ̀ŋkì
un wunti yɔ̄tèe pɔbil.
Kutaafaau kamaayee, u fìntī-mi
ní ki ŋátí m-tafal
ḿ nīn pílifí kii ubifilee.
5 Ti-Dindaan Unimbɔti ŋátì m-tafal,
ní maa mɔ́tí m-ba pu,
kaa sútí ki gítí boon.
6 M fātì m-boon ki tīī
binib bin gbáà-mee,
ki fātì m-taŋkpundi ki tīī
bin dátí ki fùkù m-nyimpulee.
Maa bál̀ m-nimbiin bin bèel̄-mi,
ní ki tíiĺ timɔtan ki sìtī m-puee ceeb.
7 Di sá yii ti-Dindaan Unimbɔti di tútúǹ-mi,
an pu ní bi-siibiliŋ kaa ká-mi.
M yàntī m-nimbiin ń pɔ̄ɔkì kii ditaŋkpalee.
M nyí yii icoo pée kpá kí cúú-mi.
8 Un di pɔ̀-mee bí ki kɔ́ĺ-mi.
Ŋma di làá táká-mi tibɔti?
Udaan ń nyā tí yūĺ ubɔsoonli nimbiin!
Ŋma di làá kɔ̄kɔl̀-mi?
Udaan ń nyānní kí yūĺ m-nimbiin!
9 Ti-Dindaan Unimbɔti di tútúǹ-mi,
kin ŋma di gíti ŋūǹ kí kpɔ̀ m-bɔtic?
M-nannanliibi kɔkɔ làá sátí
kii tiwampeeŋkaalee ní,
dikɔtuul di làá ŋmɔ́-bi.
Pīlifìmaan ti-Dindaan tɔntɔnliu
10 Ni-kansikin ŋma di fàŋkí ti-Dindaan?
Udaan máaǹ kí pīlifiǹ u-tɔntɔnliu.
Ŋma di cōom̀ dibɔmbɔndin
kaa ká ŋwalifi ní?
Udaan ń nīn máká ti-Dindaan pu,
kí dū u-ba kí fìtīǹ u-Nimbɔtiu!
11 Ama nimbi bin kpà ŋŋmi,
ipiin in fòol̄ lìblibee māntìi tú-nee,
ní kɔ́maan ni-ŋmiŋu ŋun fòol̄ lìblibee poon,
ipiin in ni tūū ŋŋmee kansikin.
An sá man ŋal pɔŋŋu di làá ŋá míǹ,
agìń poon ní ni làá dāá kpú.