Yeesaya 51

Difiil din kaa cáá dikúntilee

1 «Ní pīlifìmaan-mi, nimbi bin nyàab̀ ibaamɔnee,

nimbi bin bí ki nyàab̀ man ni-Dindaanee.

Ní kpèèmaan ditaŋkpal

din bi dūu kpítì-nee,

kí kpèèmaan mbòó ŋun poon

bi nyántìń-nee.

2 Ní kpèèmaan ni-baa Abraam,

kí kpèè Saara un màl̄-nee.

Abraam kaa nìn cáá kibiki

ŋyunti ŋun m nìn yíiń-uee.

Ama ní m bīiǹ u-boon

ki yāntì u kpántì ditimbuŋkpaandi naanja.»

3 Tiŋman, ti-Dindaan làá sɔ̄ Siiyɔn tiŋki saai,

u làá sɔ̄ ki-digbuŋkatiŋ saai.

U làá yàntī kitiŋ kin kpántì kii kuteeuee

ń kpántí kii Eedeen kpaabuee.

U làá dū kitiŋkuliŋŋi gbanti

kí kpántí kii ti-Dindaan kpaabuee.

Dipɔɔpindi nì ifaal làá nīn bí ki-poon,

bi làá nīn gà ipampakalan

ní ki bɔ̀ɔ́ tiwambɔɔkaal ki-poon.

4 «Ní pīlifìmaan-mi tiŋan, m-nibul.

M-timbundin yab, kpòom̄maan ni-tafal kí pīlifì-mi.

Di sá yii man di làá nyāntí mara,

ní ibaamɔn in m làá cáańee

làá nīn ŋmíntí anibul kɔkɔ.

5 M-deedeeu tóobiń,

m-fiil nyáń ki páaǹní.

M làá dū mpɔŋkpaan

ní kí sòoǹ anibul bɔti.

Ntimu mun nnyim māntìi túee

làá nīn máká m-pu,

ní kí nīn cɔ́tí m-pɔŋkpaaŋŋu pu.

6 Wáaǹ kí kpèè kutaa,

ní kí tìntī kí kpèè kitiŋ.

Kutagbɔŋu làá wāŋkì kii nnyiimee,

kitiŋ làá sátí kii tiwampeeŋkaalee,

ní ki-nib ń kpú kpú kii isiiyee.

Ama man fiil làá nīn bí ní ki cá jaanjaan,

m-deedeeu pée kpá kí kúntí dalba dalba.

7 «Pīlifìmaan-mi, nimbi bin nyí tin bí deedeeyee,

nimbi dinibul din ŋúb́ m-marau di-pɔbilinee.

Ní taa fàŋkìmaan nisaaleen siibiliŋ,

kí taa yàntī binib beelii ń yɔ̀tī ni-wunti.

8 Dikɔtuul làá mɔ́-bi

kii tiwampeeŋkaalee,

akoosibil làá ŋmɔ́-bi

kii ipii kuti wampeeŋkaatee.

Ama man deedeeu làá nīn bí ki cá jaanjaan,

m-fiil làá nīn bí ní ki cá abin abin.»

Ti-Dindaan, fìntim̄

9 Fìntim̄, ti-Dindaan fìntim̄!

Dàkà a-pɔŋkpaaŋŋu!

Fìntim̄ kii a nín nìn ŋá pu cannaakuee,

kii a nín nìn ŋá pu njaminee!

Sii di nāaǹ Raab,

ki sāā ki pūutì tiŋkun peebiliŋku^a.

10 Sii di tí yāntì tiŋku nyim fóotì,

ki yāntì tiŋkukpaŋkpaan nyim kūń.

Sii di tɔ́ nsan tiŋku poon,

ní ki yāntì binib bin a fīī ki líìyee

cōom̀ ki jítì.

11 Binib bin ti-Dindaan dá ki líìyee

làá dāá fàtīí gítiń.

Bi làá dāá kɔ́nní Siiyɔn tiŋkin ki fàal̀,

ní dipɔɔpindi din kaa cáá dikúntilee

dāa ŋmíntí bi-nimbiiŋyi.

Mmɔŋkpaan làá dāá gbí-bi,

ní falaa nì iyaliŋki ń dāá wāŋkì.

12 Ti-Dindaan bí yii:

«An sá man di bíi sɔ̀ŋkī ni-pɔbil.

M-nibul, ba pu ní a fàŋkí

nisaaleen un kúùyee ní?

U nì kumoou kúntitam sá mbaantiim ní.

13 A súntì a-Dindaan un náań-see pu,

úǹ di kpátì kutagbɔŋu ki dāntì yilpu,

ní ki náań kitiŋ.

Baabadalee, a kā ki fàŋkí yɔ́kɔ́ yɔkɔ

uwɔ́bil ŋuul pu,

kii u bɔ́ntì ki làá nàan̄-see!

Uwɔ́bil ŋuul gbantee baasii bí la ní?

14 Án kaa làá sūŋkì usarkadaan

un kaa ti cáá dimákalee làá tɔ̄ u-ba.

Waa làá kpú u-sarkaun,

ní tijikaal kpá kí lóó-u dalba dalba.

15 Man di sá a-Dindaan a-Nimbɔtiu.

Man di kùtī tiŋku ní ki yàntī u-nyiŋgbanti wòoǹ.

M-yindi di sá ni-Dindaan Mpɔŋkɔdaan.

16 Man di kpátì kutagbɔŋu ní ki náań kitiŋ,

ní ki bí Siiyɔn yii:

<Sii di sá m-nibul!

M dū m-nyɔɔbuŋŋi ki ŋá a-nyɔkɔn,

ní ki dū m-ŋal booŋŋu ki līkiǹ a-pu.»

Jeerusaleem, fìntī!

17 Jeerusaleem, fìntī,

fìntī kí yīkì kí yūĺ!

Ti-Dindaan yāntì a nyùn̄

u-ŋuul kii ndaamee.

A nyùn̄-dì ki tin dóò kɔkɔ,

ní a-nimbiliŋ kíǹ ki bɔ̀ntī^b.

18 A-jipɔmbi bin a màl̄ee kansikinee,

báà ubɔ kaa dàkā-si nsan.

A-jipɔmbi bin a kpēē bi cíkitèe,

báà ubɔ kaa cúú a-ŋal kí tíkiń-si.

19 Ibɔl nee táá tɔb ili ili ki bāań-si:

difukuldi nì dinàandi,

ŋkùm nì kujaau.

Ama ŋma di làá yāliŋkì a-pu?

Ŋma di làá sɔ̀ŋkì a-pɔbil?

20 A-jipɔmbi dɔ̄ an kɔkɔ fìlfil

asaŋkaŋkpil pu.

Kii kutaliŋŋu nín sàtī mpeewumu puee,

míǹ ní bi dɔ̄ kaa ti cáá mpɔn.

Ti-Dindaan ŋuul di fáá-bi,

a-Nimbɔtiu di kpìl̄-bi.

21 «Kɔŋkɔnnee, pīlifì tin bí nee,

sii Jeerusaleem un gbí inimɔɔnee:

A gbí,

ama an kaa sá ndaam ní a nyùn̄.

22 Ti-Dindaan, a-kpiliu, a-Nimbɔtiu

un mɔ́tí a-nibul puee nín lī puee sɔ̀.

M làá fàtīí fōō m-ŋuul kɔŋkɔŋwu

un yàntī a-nimbiliŋ bɔ̀ntēe.

Aa ti làá pée nyɔ̀ m-ŋuul dalba dalba.

23 M làá dū di-kɔŋkɔŋwu gbanti kí ŋúbiǹ bin nìn sàantí-see ní.

Bíǹ bin nìn lì-si yii: <Tàtīí dòon̄ kitiŋ

timbi ń tāā a-pu kí còom̀ee!>,

A nìn lafun dū a-boon ki tīī

bi dūu kpántì nsan,

kii didandi din pu bi nìn còom̄ee.»