Jeerusaleem, fìntim̄
52
1 Fìntim̄, Siiyɔn,fìntī malaa!
Fàtīí ká a-pɔŋkpaaŋŋu!
Circir tiŋki Jeerusaleem,
dū a-wannyaanti kí pèen̄.
Di sá yii kí yòon̄ díǹ kí nīn cée,
bin kaa gíí dikpancandee,
bin di kaa bí circiree
pée gíti kpá kí kɔ́ a-nia.
2 Gbāfì kukpɔŋkpɔŋu a-wunti pu kí fá.
Jeerusaleem usarkadaan,
yīkì kí fàtīí fōō a-paaŋŋu!
Sii Siiyɔn tiŋki uyumbu,
léetí a-neen kpancikiliu.
3 Di sá ti-Dindaan di lī yii: «Bi dū-ni ki nyáfì kaa fōō tiba, míǹ mbaantiim ní bi làá fàtīí dā-ni kí taa pà báà gboo.» 4 Ti-Dindaan Unimbɔti gíti lī yii: «Ŋkilkaaminee, Eejipiti tiŋkin ní m-nibul nìn cūtìi kɔ́. Kí kúntée, Asuur yab wɔ́b́-bi. 5 Too, kɔŋkɔnnee ba ní m páatì? Ti-Dindaan di lī míǹ! Bi cúú m-nibul ki cūnnì kuyuŋu kaa pàn̄ báà tiba. Bin jíń bi-pu dinyandee kūuntí nì dijajil, ní baabadalee, bi bí ki sòoǹ ki bíiĺ m-yindi. Ti-Dindaan di lī míǹb! 6 An puee m-nibul làá dāá béé ŋwindal un ní m baasii sée. Yaadalee bi làá dāá béé yii man di sòon̄ ki bí yii: <M dòoń!>»
Ti-Dindaan fātìi gítìń Jeerusaleem
7 Kpèè an nín ŋān̄ á ká ntuun ŋun
sòoǹ ŋgbansɔŋfi bɔtee
ń páanní ajoon pu pueec!
Ŋu sòoǹ ŋgbansɔŋfi nì dipɔɔpindi nì difiil pu.
Ntuun ŋun di nàatī-ti difiil bɔtee,
Jeerusaleem, ŋu bí ki tùkù-si yii:
«A-Nimbɔtiu sá ubɔti!»
8 Pīlifì binib bin a yóoǹ sintilee.
Bi kpáfì dicilpu ki tátí mpɔn mpɔn,
di sá yii bíǹ bi-ba nimbil ká
ti-Dindaan nín fàtīi gítiń Siiyɔn tiŋkinee.
9 Jeerusaleem digbuŋŋi,
ni-kɔkɔ ń kpāfì dicilpu
kí nīn tátí mpɔn ki fàal̀!
Di sá yii ti-Dindaan bíi sɔ̀ŋkī u-nibul pɔbil,
u bíi fìil̄ Jeerusaleem tiŋki.
10 Ti-Dindaan làá lēē u-circir pɔŋŋu
kí páań mpaampiin pu atimbun kɔkɔ ń ká.
Ní kitiŋ kúntilaŋki yab kɔkɔ
ń dāá ká ti-Nimbɔtiu fiil.
Ní yīkìmaan Babiloon tiŋkin
11 Nín̄ cámaan! Nín̄ cámaan! Nyāmaan niin!
Ní taa gbēēmaan tin kaa bí circireed.
Nimbi bin tú ti-Dindaan diikun wantee,
ní ŋámaan ni-ba circir
kí nyā Babiloon tiŋkin.
12 Min bí neeyee, naa làá nīn sáń
kii ni sáń kukunsaŋuee,
àá kii bi jì-nee,
di sá yii ti-Dindaan di làá nīn līī ni-nyɔkɔpu,
Isirayeel Nimbɔtiu di làá nīn pá ni-boon.
Ti-Dindaan tɔntɔnliu (nlannanaati)
13 «Kpèè, án làá bútí m-tɔntɔnliu.
U làá yīkì kí kàl̄ mpaan ŋun jítiǹ ipaan kɔkɔee pu,
ní kí fōō tinyool.
14 Binib tikpil nín ká-uee,
an nìn kɔ́-bi tiwool,
di sá yii u-nimbiin nìn cúu kpántì,
ní waa nìn pée gíti náań nì nisaal.
15 Míǹ mbaantiim u-puee,
án làá ŋá atimbun tikpil bitii,
ní bibɔtiibi kaa dāa gíti nyí tin bi làá lèe.
Di sá yii bi làá ká tin baa láá máafì-bi ki kée,
ní kí dāá wāl̀ tin baa gbìl̄ dalba dalbeee.»