Yeesaya 53

53

1 Ŋma di fōō tibɔti tin

ti gbìl̄ee ki kíí?

Ŋma ní ti-Dindaan lēē

u-pɔŋŋu ki dàkā^a?

2 Ti-Dindaan nimbiin

ní u wíiǹ kii disupɔmbilee,

kii nsunyaan ŋun nyáń

kitiŋkuliŋŋi pu ki túkúee.

Waa nìn cáá kunyaaŋŋu

àá jilma ubɔ

kí ŋmā kí dáaĺ ti-nimbikpeeŋu.

Tiba kaa nìn bí u-ni

kí ŋmā kí fáatíǹ-ti.

3 Binib nìn kpēē ki sīŋkiǹ-u

ní ki nìn fātì bi-boon ki tīī-u.

U nìn sá unil un jíń falaayee,

ki nìn mántiǹ iyaliŋki.

Kii unil un ní báà ubɔ

kaa là kí wāl̀ee,

ti nìn kpēē-u fám,

kaa nìn dū-u ki yíiń tiba.

4 Ama an sá ti-weeŋyi ní u nìn fōō,

timbi falaau ní u nìn yōoǹ ki túǹ^b.

Ní timbi nìn dàkafī yii

Unimbɔti di bíi dátí u-tafal míǹ,

Unimbɔti di fáá-u ki sīntiǹ-u taapu.

5 Ama timbi yìntitam pu ní u nìn fōō tiweendi,

timbi kpitii pu ní bi nìn sāaǹ-u.

Ditafadaaldi din tìì ŋgbansɔŋfee

jéetì u-pu.

Tiweendi tin u nìn fōōyee

di tìì-ti dicáaǹdi.

6 Ti-kɔkɔ nìn tú ki yìiǹ kii ipiiyee,

ní báà ŋma túĺ u-saŋŋu^c.

Ama ní ti-Dindaan dū ti-kɔkɔ yìntitam

tafadaaldi ki túǹ-u.

7 Bi sāaǹ-u, ama ní u sīntiǹ u-ba taapu

kaa wāaǹ kinyɔkɔ.

Kii bi nín cáǹ upii

kí kpɔ̀ puee^d,

àá kii bi nín cēē dipibil kuti

di ŋmí kaa sūǹ puee,

míǹ ní u nìn ŋmí kaa wāaǹ kinyɔkɔ.

8 Bi nìn cúú-u mpɔn,

ki sòon̄ u-bɔti, ki cáá-u ki búntì.

U-yuntiŋu yab ŋma di nìn súń u-pu?

Bi lēē u-maŋfal binifoobi tiŋkin.

Bi gbáń-u u fōō tiweendi

u-nibul yìntitam pu^e.

9 Bi síb́-u binikpitib kansikin.

U-kaakul bí bigaajab yaŋ kansikin.

Ama waa ŋá tipɔmbɔti tibaaa,

nnyimɔn ŋubɔ mun kaa nyáń u-nyɔkɔn^f.

10 Ti-Dindaan di nìn yāntì

falaa bàn̄-u.

Min kamaa sii Unimbɔti dū u-maŋfal

ki ŋá dibɔkpil saraau bin kíǹee puee,

u làá ká u-naantiibi

ní kí kàl̄ kí yúntí.

Ti-Dindaan làá dī u-pu

kí ŋá u nín là puee.

11 U nín jíń falaa uŋyee puee,

u làá dāá ká ŋwalifi ní kí nīn bí nnaamin.

M-tɔntɔnliu, deedeedaan tiŋman pu yɔuee,

làá yàntī binib tikpil

ń kpántí deedeedambi^g,

kun puee úǹ u-ba di fōō

bi-yìntitam ki túǹ.

12 An puee ní m làá kàaǹ-u

kí kūtì binikpaambi pu^h.

U nì mpɔndambi di làá yàkatī

tiwan tin ní bi jáń ki fōōyee.

Di sá yii u dū u-maŋfal ki sú ki kpíì,

ní ki kíí bi kàan̄-u ki tɔ́ binikpitibin.

Tiŋman, u kíí ki túǹ binib tikpil kpitii,

ní ki mēē binib bin di ŋá ikpitee yil pu.