Yeesaya 54

Jeerusaleem kaa ti sá kitiŋ kin bi dūu fée

1 Unimpuŋmaŋŋmanti un kaa màl̄ ki kée,

nín̄ kūuntí nì dipɔɔpindi.

Sii un kaa nyí imatiŋween ki kée,

nín̄ fátí iwiliili kí nīn fàal̀,

di sá yii sii unimpu un a-cal cāntèe

làá màal̀ mbiyaamu kí jītíǹ un cáá calee.

Ti-Dindaan di lī míǹ^a.

2 Wàan̄ tanti un poon ní a kóòyee,

mɔ̀tīí kpátí a-tantiu satab mpaan ń wàan̄.

Taa yàntī laaba ń kíń fám!

Dáaĺ a-tantiu ŋmiii í mɔ̀tīí dàntī tiŋan,

kí mɔ̀tīí kpáá u-kpakpaaŋi ŋí báań tiŋan.

3 Di sá yii a làá wàan̄ a-tiŋki ŋŋaŋgan pú nì ŋŋaŋgiil pú,

a-nibooliŋu làá fōō atimbun kí nīn kíǹ ki yì.

Bi làá dāá kàl̄ ntimu mun bi dūu fée poon.

4 Taa fàŋkì tiba,

icoo kaa làá ti cúú-si.

Taa yàntī yári yari ń kɔ́-si,

baa làá ti kpèè kí sìŋkīǹ-si.

A làá súntí a-pɔnti cooi,

aa ti làá téetí bi nín sīī-si pu

ŋyunti ŋun a sá ukpiipuee.

5 Di sá yii un náań-see,

úǹ di sá a-cal.

U-yindi di sá

<Ti-Dindaan Mpɔŋkɔdaan>.

Un dá-si ki líìyee

di sá Isirayeel Circir Nimbɔtiu,

úǹ ní bi yíì yii

<Kitiŋ kɔkɔ Nimbɔtiu>.

6 Kii unimpu un u-cal cāntèe,

a nìn kɔ́ kunimbaakpaaŋŋun.

Ama ti-Dindaan fātìi yíiń-si.

A-Nimbɔtiu bí yii:

«Unil kíikí kí fá unimpu

un u cáá u-naacimpɔntineeee?»

7 M nìn dū-si ki fá ŋyunti ŋubɔ poon fiii,

ama m-neeŋkpaandi puee,

m làá fàtīí gíiǹní-si.

8 M nìn gíí a-pu diŋuul ŋkpitim pu,

ní ki nìn fātì m-kpaŋkpamboon ki tīī-si.

Ama m-neendi din kaa cáá dikúntilee puee,

m làá dàkà-si m-saasɔl.

Man a-Dindaan un dá-si ki líìyee di lī míǹ.

9 «M làá ŋá kii Noowa yuntiŋuee ní.

M nìn pōoǹ yii m kpá kí gíti yàntī

nnyiŋgbeen ń dāan̄ kitiŋ pu^b.

Míǹ mbaantiim ní díǹ nee m tí pūtì yii

maa làá ti gíí diŋuul a-pu

ní kaa nín kpìl̄-si.

10 Báà ajoon yaa kpīkitì,

ní ŋgbantamu yaa cīŋkì,

dineendi din m cáá a-puee

kpá kí kpántí,

ní dipoondi din m pōoǹ-si

kí yàntī á nīn bí ŋgbansɔŋfinee

kpá kí kpìtī.

Man a-Dindaan un dàkà-si

u-saasɔlee

di lī míǹ.»

Jeerusaleempɔɔn

11 Jeerusaleem tiŋki unandaan,

sii un ní kubuŋkpaaŋŋu cīŋkì

ní ubɔ kpá kí ŋméeǹ-see.

Man a-Dindaan di lī-si yii:

«Kpèè, m làá fàtīí mā-si kí tɔ́kɔń

ataŋkpamɔnti ŋin máǹee pu.

A-nyeel làá nīn sá ataŋkpamɔnti

abɔn ŋin bi yíì yii safiiree ní.

12 M làá dū ataŋkpamɔnti

ŋin bi yíì yii rubiisee

kí mā a-guŋŋi yilpu,

ní kí dū ataŋkpamɔnti

ŋin jìl̀ee kí mā a-punyɔmmu^c.

13 M làá dāá dàkà a-biyaamu kɔkɔ^d,

ní bí dāá nīn bí ŋgbansɔŋfin.

14 Deedee poon ní a làá dāá nīn bá kaa cìŋkī.

Ubɔ kaa ti làá wɔ́b́-si jaanjaan,

ní aa ti làá fàŋkì tiba mun.

Ubɔ kaa ti làá fàaǹ-si,

dinyoondi kaa làá ti cúú-si dalba dalba.

15 Ubɔ di yaa táká-see,

an kaa nyánní man cee.

Un kamaa di yaa táká-see,

see udaan ń lítí a-nimbiin.

16 Kpèè, man di náań ucaa

un di fùkum̄ amɔsiŋkoon ŋmiŋu

kí mɔ́ɔ́ tijanjawan tin kamaayee.

Man di tí nāantí unil un ŋūǹ kí bīil̀-tèe.

17 Tijanjawan tin kamaa ní

bi yaa mɔ́ɔ́ kí dūú já nì see,

án kaa làá ŋá-si báà tiba.

Ní ubɔ yaa cūnnì-si ibɔsoonee,

a làá sòoǹ kí líí-u.

«Difakal din man ni-Dindaan

bɔ́ntì ki yóoǹ m-tɔntɔnliibee dee,

m nín làá sòoǹ kí pɔ̀-bi puee dee.

Man ni-Dindaan di lī míǹ.»