Yeesaya 55

Dāam̄maan, báà ni yaa kaa cáá animbil

55

1 Nimbi bin nnyinnyoo cááyee,

dāam̄maan, nnyim bí doo!

Báà ni yaa kaa cáá animbil, dāam̄maan!

Dāmaan tijin kí jī, an sá faalaa ní^a!

Dāam̄maan kí dā ndaam nì nnaabiim

kí taa pà tiba.

2 Ba pu ní ni jīǹ animbil

tiwan tin kaa kpīintée pu?

Ba pu ní ni gì digìńdi fám

tiwan tin kaa díkèe pu?

Ní pīlifìmaan, pīlifìmaan-mi,

ní kí ká tijimmɔntiil kí jī,

ní kí jī tijin tin mɔ̄ee.

3 Ní kpòon̄ ni-tafal kí pīlifì

ní kí dāan̄ m-cee,

ní pīlifì ní kí dāá ká dimaŋfal.

M làá pòon̄-ni dipoondi din

làá nīn bí ki cá jaanjaanee,

m làá ŋá-ni tiŋan tin m nìn

pōoǹ Daafiidee^b.

4 Kpèè, m nìn yāntì u kpántì

anibul seeradaaŋwu,

ki nìn kāaǹ-u ú nīn sá

atimbun bɔtiu nì ŋi-kpiliu.

5 Kpèè, a làá kúuǹ kí yíiń

ditimbundi din ní saa nyée,

ditimbundi din kaa nyí-see

làá sāǹní kí dāan̄ a-cee.

Di làá sāǹní kí dāan̄ a-Dindaan a-Nimbɔtiu

un sá Isirayeel Circir Nimbɔtiuee pu,

di sá yii úǹ di tīī-si tinyool.

Ti-Dindaan ŋáań tin u pōoǹee ní

6 Nyàab̀maan ti-Dindaan,

ŋyunti ŋun u ŋūǹ kí yàntī ní ká-uee.

Ní yíiḿmaan-u

ŋyunti ŋun ní u bí ki pìlīǹ-nee.

7 Unikpiti ń fá u-saŋkpitii,

ukpitiŋal ń fá u-landɔkɔkpitii.

Bí gítiń ti-Dindaan cee,

di sá yii u làá sɔ̄ bi-saai!

Bí gítiń ti-Nimbɔtiu cee,

di sá yii u pūǹ ikpiti nì dipɔbil diba ní!

8 Di sá yii ni-landɔkɔi nyáń i-ba

nì man landɔkɔi,

ní man saŋyi nyáń i-ba nì ni-yai,

ti-Dindaan di lī míǹ.

9 Kii kutagbɔŋu nín bíń yilpu

ki dátì nì kitiŋ puee,

míǹ ní m-saŋyi dátì nì ni-saŋyi,

ní m-landɔkɔi dátì nì ni-yai.

10 Utaa nyēeń yilpu ní ki nì

ní ntaayim nyēeń yilpu ki lítí.

Bi yaa kaa sɔ̄ŋkì kitiŋ,

kaa tīī kitiŋ ntiŋkpam,

kaa yāntì iwambool nyánnée,

baa fàtīí gítí yilpu.

Míǹ ní bi tìì iwambool nì tijikaal^c.

11 Míǹ mbaantiim ní

dinyɔɔbundi din nyēē m-nyɔkɔnee

kaa fàtīí gítiń m-cee kaa túń

ditundi din pu dì nyáńee.

Dì ŋáań tin m lèe

ní ki tūǹ ditundi din

m dūu ŋúbiǹ-dèe.

12 Tiŋman, nì dipɔɔpindi ní ni làá nyā Babiloon tiŋkin,

ní bí fàtīí gíiǹní-ni

ni-tiŋkin nì ŋgbansɔŋfi.

Ni yaa láa jītée, ajoon nì ŋgbantamu

dāa kūuntí nì dipɔɔpindi

ní tisatin sufii kɔkɔ dāa kpáafí abaal.

13 Laakin bàà sá kukuŋkuncikuu ń nyēe,

siipreesi subu di dāa nyēē niin,

laakin bàà sá ŋkuŋkumbɔmu ń nyēe,

miirti subu di dāa nyēē niin.

Án dāa sá diyiŋkpaandi ní

ki tīī ti-Dindaan,

kudaaŋkpaaŋŋu kun làá nīn pée bí

ki cá jaanjaanee.