Yeesaya 56

DIJANTATAATIIL

Baa làá ti gàntī ubɔ

56

1 Ti-Dindaan nín lī puee sèé:

«Nín̄ nóómaan mara

kí nīn ŋáań tin bí deedeeyee.

Di sá yii difiil din m làá cáańee

tóob́ kí bàń dee.

Án làá lēē kí dàkà-ni yii

m là kí fīī-ni ní.

2 Unil un di ŋáań tin m lēe,

kinibiki kin di ŋúb́ an bɔti tiŋanee,

un di tɔ́ ŋwiŋŋuŋfikaa kaa bíiĺ-ŋuee,

un di cútí u-ba kí taa ŋá ikpitee

bí mmɔnneeee!»

3 Unicaan un di dū u-ba

ki nákáǹ ti-Dindaanee

ń taa dàkafì kí lì yii:

«Báà án ŋá pu, ti-Dindaan làá

nyāntí-mi u-nibul kansikin!»

Ufaal mun ń taa dàkafì kí lì yii:

«Man pée sá busukulimbu ní!»

4 Di sá yii ti-Dindaan nín lī puee sèé:

«Bifaabi bin di tɔ́ m-wiŋŋuŋfikaai,

ki lēē kí nīn ŋáań tin di fáatì-mi,

ní ki ŋúb́ m-poondi marab tiŋanee,

5 m làá cóoń-bi ditaŋkpal

m-Diiku nì m-cindi poon,

bí nīn cáa téetí bi-yiŋŋi pu.

Án di dāa cáá kudapɔɔu

ki jítiǹ jipɔmbi nì bisalib.

M làá dāá tīī-bi diyindi

din làá nīn pée bí

ki cá jaanjaan,

kaa làá kpìtī dalba dalbee.»

6 Binicambi bin di dū bi-ba

ki nákáǹ ti-Dindaan

ki tɔ́-u, ki néeń-u,

ki sá u-tɔntɔnliibee,

ti-Dindaan nín sòon̄ bi-pu puee sɔ̀.

Bi yaa tɔ́ ŋwiŋŋuŋfikaa kaa bíil̀-ŋu,

ní ki ŋúb́ m-poondee,

7 m làá dāá yàntī bí dāan̄

m-circir jool pu,

ní kí dāá yàntī bí fàal̀

m-wimmeem Diikun.

M làá dāá fōō saraabi nì tiwampɔkaal

tin bi cāabìń ki pāantí

m-saraafaŋŋu puee.

Di sá yii bi làá dāá nīn yíì m-Diiku yii:

<Anibul kɔkɔ wimmeem Diiku ní^a.>

8 Ti-Dindaan Unimbɔti un

kóoǹ Isirayeel yab ki kpáfèe

nín lī puee sɔ̀.

M nìn pée kóoǹ biba ki kpáfì bi-cee,

m làá fàtīí kóoǹ biba mun kí kūtì.

Bin kaa máaǹ kí nīn sá bikpilibee

9 Nimbi ipeel in kɔkɔ kóò tisatinee,

nimbi ipeel in kɔkɔ kóò kubambaŋŋunee,

dāá jīmaan tijineeee!

10 Binib bin cí Isirayeel tiŋkee

kɔkɔ sá bijɔfub ní,

baa pée kāntí tiba.

Bi-kɔkɔ sá iboo in sá imuunee ní,

iaa ŋūǹ kí gbōol̀.

I tātìi dɔ̄ ki dámintí,

ní ki néeń ŋgeem.

11 Bi sá kii iboo in cáá mpooyee ní,

bi jīǹ kaa díkì.

Ama bíǹ di bàà sá bipikpaaliibi!

Baa pée gbìl̀ tibɔti taapu báà fiii.

Bi pée ŋáań tin fáatiǹ-bee ní,

báà ŋma pée dàkafī

u-jandi ŋmaniŋma pu ní.

12 Bi lì yii:

«Dāam̄maan tí cùú nyàab̀ ndaam!

Ti làá nyɔ̀ ndaam min pɔ̄ɔ̄yee kí gbí.

Fool mun làá fu nín̄ bí kii díǹ nee ní,

ndaam kíǹ ki wīikí tikpil!»