Yeesaya 57

1 Bi kù deedeedambi

ní an kaa ká báà ubɔ.

Bibulcinnib wáŋkí

ní báà ubɔ kaa kpáà béetí gba.

Tiŋman, bin tɔ́ Unimbɔtee wáŋkí

binikpitib toonam pu.

2 Ama ŋgbansɔŋfi làá dāan̄,

ní bin nóó deedee saŋŋuee

ń dòon̄ kí gèeǹ kí taa fàŋkì tiba.

Ti-Dindaan bíi wòoǹ biwaatootiliibi

3 Sútiḿmaan doo nee,

nimbi usoopu biyaamu.

Ni sá bilaakpaadambi nì nlaakpaamu^a.

4 Ŋma ní ni bèel̄ ní?

Ŋma ní ni dɔ̀tī kinyɔkɔ

ki nyāntí dilimbil ní?

Ni lafun sá pɔɔgaatib ní,

inyimɔn nibooliŋu.

5 Ni mɔ̀nnì tɔb teereebinti sufii caŋin,

nì busubu bun kamaa faati

yaa múkúee taapu.

Ni cáá mbiyaamu ki tòotī

ibun nì itaŋkpalɔkɔn.

6 Mbun poon taŋkpeeŋi

ŋin jɔ̀m̀ pɔ́lpɔlee ní a là,

ŋíǹ di sá a-gaajawammɔntiiti, Isirayeel.

Ŋíǹ ní a féeń ndaam,

ní ki tòotī!

Ní ní bí yii tin bí nee ń sɔ̀ŋkì man pɔbilaaa?

7 A bɔ́ntì a-dooŋu dijoofɔŋfɔkɔl pu.

Niin ní a jɔ́ḿ ki tòotī.

8 A dū a-waal ki kúĺ ki lúntì

dikampiil dɔŋu boon.

A bāal̀-mi ní kí cúú a-wanti kí pèetī,

kí jɔ̄m̀ a-dooŋu ŋun wāāyee pu.

Sii nì a-bɔmbi pūtì ki pōoǹ tɔb,

a-bɔmbi bin a néeń bi dɔ̀ nì si,

ní a kpèé bi-ninjatee!

9 A ŋúb́ ŋkpam ki cūnnì

ki pú diwaal Mooleeki,

ki pú-dì talaalub mun.

A tú ituun i cūtì ntindandatimun,

a sīntì taapu ki tin bàn̄ ditaŋkpiilin.

10 A pɔ́ɔǹ tikpil ní a-pɔ́ɔǹtam

yāntì a gīī.

Ama aa lī yii:

A fātìi ká mpɔn mpɔmin,

ní kaa yɔ̄tì a-wunti.

11 Ŋma di yāntì dinyoondi kɔ́-si

ní a fāŋkì ki mɔ́ntì nnyimɔn,

ki súntì m-pu,

ní kaa ti dàkafī m-pu ní?

M kāl̀ diŋmiŋŋmil an yúntì.

An pu ní aa nìn gíti fàŋkí-mi.

12 Ama m làá bìitī a-bɔɔŋŋi pu.

Aa làá ká ipaati iba tin a ŋáańee poon.

Án kaa làá kèetī-si.

13 A yaa láa kúuǹ ki nyàab̀ dijòońdee,

a-waaŋi ŋin a kóoǹ ki kpúkuǹee

ń dāá fīī-si!

Kubuŋu làá yòon̄ ŋi-kɔkɔ kí fá,

kufoou làá kpáaǹ ŋi-kɔkɔ.

Ama un kamaa di yaa sáǹ ki kɔ́-mee

làá dāá fōō kitiŋ nee kí nīn kíǹ ki yì,

ní kí dāá fōō m-circir jool mun.

Unimbɔti nibul làá ká dicáaǹdi

14 Ti-Dindaan bí yii:

«Ní gbīŋkìmaan didandi,

ní cátímaan nsan malaa,

ní lēēmaan aganlaka ŋin dɔ̄

m-nibul saŋŋu puee.»

15 Di sá yii circir Nimbɔtiu

un bí yilpu fɔ́ŋŋŋ

ní u-kɔŋkooŋŋu bí kí nīn cá jaanjaanee,

nín lī puee sèé:

«Man Unimbɔti un bí circiree,

m kóò yilpu fɔ́ŋŋŋ ní.

Ama m bí bin bi wɔ́b́

bi sīntiǹ bi-ba taapuee cee.

M làá tīī bin sīntiǹ bi-ba taapuee dimaŋfal,

m làá tīī bin bi wɔ́b́ee dimaŋfal^b.

16 Maa làá nīn kɔ́kɔĺ m-nibul

kí nīn cá jaanjaan,

maa làá gíí di-pu diŋuul

kí nīn cáa cá talku.

M yaa ŋá míǹ, binib bin m náańee

kaa làá nīn gíti cáá dimaŋfal.

17 Isirayeel nimbiliŋ nín máǹ

tiwan kɔkɔ pu puee yāntì u yīntì.

An yāntì m gíí diŋuul,

ní m-ŋuul poonee m fáá-u.

M-nimbil kaa nìn gíti là kí wāl̀-u.

Ama ní waa pée fātìi tɔ́

ní ki ŋá u nín là puee.

18 M ká u-bimbim, ama man làá cáaǹ-u.

M làá kpòotī-u, ní kí sɔ̀ŋkì u-pɔbil.

Bin kā dikpoolee,

19 m làá dū inyɔŋki laŋyi kí ŋá bi-nyɔmmun.

Bin bínní ndandatee ń nīn bí ŋgbansɔŋfin,

bin bí kɔŋkɔmee ń nīn bí dipɔɔsɔŋkilin^c.»

Ti-Dindaan di lī míǹ.

«Tiŋman, m làá cáaǹ m-nibul!»

20 Ama binikpitib bíǹ sá kii

an nín yòontí tiŋku nyim pu

waa ŋūǹ kí dòon̄ soooo puee ní,

ní u-nyiŋgbanti kùtī ki nyāntí

tikpati nì tijɔkɔndi kɔkɔ.

21 M-Nimbɔtiu bí yii:

«Binikpitib kpá kí ká ŋgbansɔŋfi!»