Sakari 10

Awaa kaa bí tiban

1 Mèèmaan ti-Dindaan

ú yàntī ukpaasiitaa ń nì.

Ti-Dindaan di yàntī utaa nì

ki yàntī utaa ŋmóò ki tátí nì kubuŋu.

U làá yàntī utaaja ń nì,

ní báà ŋma saaku ń sɔ̀ŋkì timool ń nyā.

2 Di sá yii awaa sòoǹ tinyimɔmbɔti ní,

ní bibɔɔbi wāĺ tin kaa sá ibaamɔnee.

Bi nín lèekī tidamintiil taapu puee sá inyimɔn ní,

ní bi ŋmēentí binib fám.

An pu ní dinibul nee yíkìi búntì nì falaa

kii ipii in kaa cáá ukpaalee.

Ti-Dindaan pōoǹ kí fīī u-nibul

3 «Bipikpaaliibi pu ní m fōō diŋuul,

iŋɔjaa tafal ní m làá dáaĺ^a.

Tiŋman, man ni-Dindaan Mpɔŋkɔdaan làá dāan̄

kí kpàà m-picaŋkpuŋku, Juuda nibul.

M làá dū-bi kí kpántí tinyool taamuu

kí cáá-bi kí cùnnì dikɔ̀ndi.

4 Juuda naakookun ní ditaŋkpal din tíkí kudiiyee,

nì tanti kpakpaal

nì bujanjatɔbu làá nyānní.

Kunaakoou gbantin ní bibɔtiibi kɔkɔ làá nyānní.

5 Bi làá dāá nīn bí kii bibaatandambee.

Bi làá dāá nīn tà bi-nannanliibi ki múl̀

kii adan pu kpatee.

Bi làá dāá nīn jáà míǹ,

kun puee man bi-Dindaan bí bi-cee.

Icoo làá cúú bi-nannanliibi bitanjakaliibi.

6 M làá tīī Juuda yab mpɔn,

m làá fīī Isirayeel yab.

M làá fàtīí gíiǹ-bi bi-tiŋkin,

kun puee bi kɔ́-mi falaa.

Bi làá dāá nīn bí kii

maa pée dū-bi ki fá ki kée.

Di sá yii man di sá bi-Dindaan bi-Nimbɔtiu,

ní m làá fōō bi-wimmeem.

7 Eefiraayiim yab làá dāá nīn cáá dipɔbil

kii bibaatandambee.

Bi làá dāá nīn bí dipɔɔpindin kii

bi nyùn̄ ndaamee.

Bi-jipɔmbi yaa láa ká mimmee,

bi làá dāá nīn fàal̀,

ní kí nīn bí mmɔŋkpaanni ti-Dindaan pu.

8 M làá búń ŋfoon kí yíiń m-nibul yab

kí kóoǹ-bi kí kpāfì,

di sá yii m fōō-bi ki líì.

Bi làá dāá bùtī kii njaminee.

9 M yāaǹ-bi atimbun kansikin,

kii bi nín yàantí iwambool puee.

Ama ndandati timmu gbanti poonee,

bi làá téetí m-pu.

Bi làá dāá nīn bí niin dimaŋfalin nì bi-biyaamu

ní kí fàtīí gítiń.

10 M làá dāá nyāntiń-bi Eejipiti nì

Asuur timmun, ní kí kóoǹ-bi kí kpāfì.

M làá dāá cáá-bi kí kɔ́ǹ Galaadi

nì Leebanɔn timmun.

Nì míǹ kɔkɔee, an kaa làá dāá bà-bi.

11 Bi làá dāá dùtī dinimbinaamandi mɔɔl^b.

Man ni-Dindaan làá dāá fáá dimɔɔl nyiŋgbanti.

Niil mɔɔl làá kpā kí tin sāā taapu.

Asuur ulambidaan làá lítí,

ní Eejipiti kaa ti làá nīn cáá mpɔn.

12 M làá dāá tīī m-nibul yab mpɔn,

ní bí nīn ŋáań min man lèe.

Man bi-Dindaan di lī míǹ.»