1 Peetroo 1

Kugbɔmpeepeekaau kun

Peetroo

ŋmàn̄ee

Ijaam

1 Man Peetroo un sá Yeesu Kriisitoo kpambalee di jáaḿ-ni. M ŋmàn̄ kugbɔŋu nee kí tīī nimbi bin Unimbɔti lútì ni yàl̄ ki bíń kunicaŋu Pɔnti nì Galaati nì Kapadoosi nì Asii nì Bitinii timmunee ní. 2 Ti-Baa Unimbɔti lútì-ni ní nīn sá u-yab u-Fam pu. U nìn pée lī míǹ ki yóoǹ dooooyee ní. Kun puee u là ní nīn tɔ́ Yeesu Kriisitoo u-fatikuu ń fíntí-ni ní nyā.

Unimbɔti ń ŋá-ni tiŋan kí tīī-ni ŋgbansɔŋfi tikpil.

Dimákal tiŋman pu yal

3 Tí nyɔ̄ŋkì Unimbɔti ti-Dindaan Yeesu Kriisitoo Baa, kun puee u súń ti-saai tikpil. U nín fīkitì Yeesu Kriisitoo ditaŋkpiilinee ní u pú-ti nsan tí kɔ́ dimaŋfapɔndin. Kɔŋkɔnnee ti cáá dimákal tiŋman pu yal. 4 An pu ní ti cí ú tīī-ti difakal din u yóoǹ kí dāá tīī bin sá u-yabee. Difakal gbantee kaa bíiĺ, kaa jòontí, kaa dóotí. Unimbɔti dū-dì ki kpáafì yilpu ki yóoǹ nimbi ní. 5 Ni nín fōō Unimbɔti bɔti ki kííyee ní u ŋúb́-ni taapu doo nì u-pɔŋŋu, án nín làá ŋá pu ŋwindalee, ú dāá tīī-ni difiil din u bɔ́ntì ki yóoǹee, báà ŋma ń dāá wāl̀.

6 Míǹ puee ní yàntī án nīn mɔ̄ǹ-ni báà ŋyunti fiii ŋun poon ti bí nee gba ní icɔŋki nín bí puee nì i-nyɔkɔm yaa cāabìń-ni kunimbaau. 7 An falaabee sá kí cɔ̄ŋkì kí kpèè yii ni-fookiiu pɔ̄ɔ̄yaaa, waa pɔ̄ɔ̄ ní. Kpèèmaan, sindaariya un bí ki làá wāŋkì ŋwindalee. Bi ŋáań-u ŋŋmin ní kí kpèè yii u sá umɔntaaa, waa sá. Míǹ mbaantiimin ní falaa sá kí cɔ̄ŋkì ni-fookiiu un jítiǹ sindaariya pu kpataaayee kí kpèè yii u pɔ̄ɔ̄yaaa, waa pɔ̄ɔ̄. Ni-fookiiuee cáá kudapɔɔu ki jítiǹ sindaariya pu kpataaa. Ni yaa jáń ki nyáń icɔŋki poonee ní Yeesu Kriisitoo ń dāá pàkà-ni kí tīī-ni tinyool nì jilma u-gítintam dal. 8 Yeesu Kriisitoo gbantee, naa ká-u nì ni-nimbiliŋ, ama ni néeń-u. Ni fōō-u ki kíí kaa wāĺ-u^a, ki fàal̀ nì dipɔɔpiŋkpaandi din baa ŋūǹ kí māafèe. 9 Kun puee ni làá dāá fōō ni-fookiiu paati tin sá ni-nammu fīitamee.

10 Bibɔnaatiliibi nìn nyàab̄ mmɔntiim kí béé difiil bɔti tiŋan. Bi nìn sòon̄ dipɔl din ni làá fōō nee pu ki síiǹ. 11 Kriisitoo Fam di nìn bí bi-ni ní ki dàkā-bi falaa un u làá dāá jēe nì tinyool tin làá dāá páanní falaayee boonee^b. Unimbɔti bɔnaatiliibi nìn nyàab̄ kí béé ŋyunti nì min ní tíǹ gbanti kɔkɔ làá bàńee. 12 Unimbɔti nìn lēē ki dàkā u-bɔnaatiliibi yii tibɔti tin bi bí ki sòoǹee, bíǹ kaa làá ká ti-poon tiba, ama nimbi di dāa yì. Kɔŋkɔnnee bin sòoǹ Kriisitoo Bɔmɔntiitee sòon̄ nì ni tibɔbaantiil gbanti ní, kun puee Unimbɔti Fam min nyánní yilpuee di dàkā-bi. Áli gba Unimbɔti tuuŋyi mun bàà là kí béé min ní an bɔtee làá jītée.

Unimbɔti yíiń-ti tí nīn bí circir

13 Míǹ puee, ní bɔ́ntí ni-ba ni-nimbiliŋ ń nīn cɔ́ tiŋan tin pu ni máká yii Yeesu Kriisitoo yaa láa gítìń ni làá dāá fōōyee pu, kí nīn ŋúb́ ni-ba. 14 Ní nīn tɔ́ Unimbɔti, kí taa nín̄ gíti nóó ni-bimbikpitim min naa nìn dáá nyí ki ŋáańee. 15 Ní nīn bí circir ni-bimbim kɔkɔ poon kii Unimbɔti un yíiń-nee nín bí circir puee. 16 A lì kii Unimbɔti nín lī u-gbɔŋku poon puee yii: «Nín̄ bímaan circir kun puee man bí circir ní^c.»

17 Ni-wimmeem poonee ni yíì Unimbɔti yii ni-Baa. Ama ní téetí yii úǹ di sòoǹ báà ŋma bɔti ki nóó nì min udaan ŋée, kaa gàntī, an puee iyunti in kíǹ ní dū kí kàl̄ duulinyanee, dàkàmaan-u ni-bimbim poon ni nín tɔ́-u puee. 18 Nimbi ni-ba nyí Unimbɔti nín dī min ki nyántìń-ni ni-naanjab saŋyi in ni nìn nóó fám tiba kpá poonee. An kaa sá tiwan tin bíiĺ kii animbilee àá kii sindaariyee ní u dū ki nyántì-ni. 19 Ama an sá nì Kriisitoo fatikuu un jítiǹ tikɔkɔ nì tikɔkɔee ní u dū ki nyántì-ni. Kriisitoo di sá kii dipibimɔntiil din pu baa kāntí tikpitil tiba nì tibee. 20 Unimbɔti lēē Kriisitoo ki wāatì ní ki nín náań duulinya. Ni-puee ní u nyántì-u ŋyuntijoolkaa nee poon. 21 U-pu ní ni fōō Unimbɔti un fīkitì-u ditaŋkpiilin ki tīī-u tinyoolee ki kíí, án nín làá ŋá pu ni-fookiiu nì ni-mákal ń nīn cɔ́ Unimbɔti puee.

22 Ni nín nóó mbaamɔn saŋŋuee ní ni kpántì circirdambi, ní ki néeń ni-nabiyaamu bin mun fōō ki kííyee mbaamɔmin. Míǹ puee nín̄ gbíntì ki néeḿmaan tɔb tikpil nì dipɔbil diba. 23 Di sá yii Unimbɔti di tīī-ni dimaŋfapɔndi. Dinyɔɔbundi gbantee kaa sá kii ŋwambool ŋun kúùyee cee. Dinyɔɔbundee kaa kúù, di bí ní ki cá jaanjaan. 24 Kii Unimbɔti gbɔŋku poon nín lī puee yii:

«Binib kɔkɔ bí kii kumoouee ní,

ní bi-nyooti bí kii mpumpukumee,

kumoou kōō

ní mpumpukum ń gbátí.

25 Ama ti-Dindaan bɔti tíǹ pée bí ní

kí nīn cá jaanjaan^d.»

Tibɔti gbanti di sá Kriisitoo Bɔmɔntiiti tin bi cáań ki sòon̄ nì ni nee.