1 Peetroo 2

1 Míǹ puee, ní fá tibɔkpitil kɔkɔ nì inyimɔn kɔkɔ nì mpoonnyoon nì ipoompoon nì tibɔfan disoondi. 2 Ní nīn néeń Unimbɔti bɔti kii mbipɔmu nín néeń mbiim puee kí ŋmā kí cù nyɔkɔpu Unimbɔti saŋŋu poon kí tin kátí-ku. 3 An bí kii Unimbɔti gbɔŋku poon nín lī puee yii: «Ni dáká ki ká ti-Dindaan nín mɔ̄ puee^a.»

4 Sútiń kí pìl̄maan ti-Dindaan Yeesu un tìì dimaŋfalee. U sá kii ditaŋkpal din bí dimaŋfalin ní binib dūu fée, ama Unimbɔti ká yii dì cáá kudapɔɔuee ní u lēē-dì. 5 Nimbi bin mun ká u-cee dimaŋfalee, sútiḿmaan kí nīn sá kii ataŋkpeeyee Unimbɔti ń dūú mā u-kɔŋkooŋŋu. Ní yàntī Unimbɔti Fam ń dū-ni kí kpántí bisaraaŋaliibi bin bí circiree, kí dū ni-ba kí tīī Unimbɔti. Yeesu Kriisitoo puee ní nīn sá saraa un fáatì-uee. 6 Kpèèmaan Unimbɔti nín lī u-gbɔŋku poon puee yii:

«M lēē ditaŋkpal din cáá kudapɔɔuee

ki dū-dì ki tíĺ kii ditampinjalee m-diiku

kun bí Siiyɔn jool puee.

Un kamaa di yaa fōō-dì ki kííyee,

icoo kpá kí jī udaan.»

7 Dipoondi gbantee sá ki tīī nimbi bin fōō ki kííyee ní, nimbi bin nyí yii ditaŋkpalee sá-ni tiwaŋkpaandi ki jítiǹ tikɔkɔ nì tikɔkɔee. Ama bin kaa fōō ki kííyee pu ní Unimbɔti gbɔŋku sòon̄ ditaŋkpalee pu yii:

«Ditaŋkpal din bidimaliibi nìn dūu fée

di dāa kpántì ditaŋkpal din ŋúb́ kudii pɔŋŋuee.»

8 An gíti lī laaba yii:

«Ditaŋkpal din binib gbéetée dee,

díǹ di yàntī binib lítí^b.»

Kun pu bi lítée di sá baa là kí pīlifì Unimbɔti bɔti. An di yì-tì ní Unimbɔti yóoǹ yii an bàń-bi míǹ.

9 Ama nimbee, ni sá dinibul din Unimbɔti lútì dí nīn sá u-yalee ní. Nimbi di sá u-Beelin saraaŋaliibi ní ki sá Unimbɔti bindi pu timbundi. U yíiń-ni ní nyānní dibɔmbɔndin kí kɔ́ u-walifimɔntiŋun, kí ŋmā kí lēē u-tunnyaaŋŋi pu seera^c. 10 Dooooyee, naa nìn sá Unimbɔti nibul, ama kɔŋkɔnnee ni kpántì u-nibul. Dooooyee, naa nìn nyí yii Unimbɔti sūǹ binib saai, ama kɔŋkɔnnee u súń ni-saai ni béè^d.

Ní nīn cáá Unimbɔti tɔntɔnliibi bimbim

11 M-nabineeŋkaamu, m mèé-ni kii ni nín sá binicambi duulinya nee poon puee, ní cúúmaan ni-ba nì bikɔdeekpitib, kun puee an di jáaǹ kinaŋ. 12 Ní nīn cáá mbimbimɔntiim bin kaa nyí Unimbɔtee kansikin. Báà biba yaa bàà bíi kúŋfí ni-boon yii ni sá binikpitibaaa, bi yaa ká ni-tunnyaaŋŋee, Unimbɔti ń yàntī bí béé yii an tunnyaaŋŋi nyánní úǹ cee ní, ní bí pàkà-u ŋyunti ŋun u yaa láa dɔ́mińee.

13 Ti-Dindaan puee, nín̄ tɔ́maan biyidambi, kí nīn tɔ́ gɔmina un cáá mpɔn ki kpèé kitiŋ kɔkɔee, 14 kí nīn tɔ́ bibɔtiibi bin bi kāaǹ bí nīn dátí digaŋgandambi tafal, kí nīn pàkà bin ŋáań tiŋanee^e. 15 Unimbɔti nín là puee di sá ní nīn ŋáań tiŋan án pìin̄ bigbaambi bin kaa nyí tibee nyɔmmu, bí taa ká tiba kí sòoǹ ni-pu. 16 Ní nīn bímaan kii binib bin Kriisitoo tīī dibatɔlee. Ní taa nín̄ sá binib bin dì dibatɔl pu ki kāntí inaakpal ki ŋáań ikpitee. Ama dūmaan ni-batɔlee kí nīn ŋáań kii Unimbɔti tɔntɔnliibee. 17 Nín̄ tɔ́maan binib kɔkɔ, kí nīn néeń Kriisitoo yab, kí fàŋkìmaan Unimbɔti, kí nīn tɔ́ gɔmina.

Tí nóó Kriisitoo tabɔbiliŋ kí jī falaa

18 Nimbi bin kā binib ceeyee, ní sìntīǹ ni-ba taapu kɔkɔ kí tīī ni-kpilib kí nīn tɔ́-bi mmɔntiimin. An kaa sá bidambi yaa sá binib ki mɔ̄ee baba ní ní nīn tɔ́-bi, báà bidambi bɔti yaa pɔ̄ɔ̄yaaa, ní nīn tɔ́-bi. 19 Ni nín ŋáań Unimbɔti lammee puee ní bidambi yaa bíi sàantí-ni fámee, an ŋān̄. Unimbɔti làá bìin̄ ni-boon. 20 Bi yaa bíi gbáà-si digaŋgam pu ní a jīǹ kimɔtiiyee, ipaati ilai ní a làá ká poon? Ama a yaa ŋá tin ŋān̄ee ní bi yaa bíi sàantí-si ní a jīǹ kimɔtiiyee, míǹ di ŋān̄ Unimbɔti nimbiin. 21 Kun pu Unimbɔti là ní nīn bí mimmee di sá Kriisitoo u-ba jíń falaa míǹ ni-pu, ní ki bí yii ni mun ń nóó u-tabɔbiliŋ kí jī falaa gbanti. 22 Waa ŋá ikpiti báà iba, baa gbìl̄ u-nyɔkɔn nnyimɔn ŋubɔ^f. 23 Bi nín bí ki sìí-uee, waa sīī ubɔ ki téeǹ. Bi nín sāaǹ-uee waa tɔ́-bi mbusu, ama u dū ki ŋá Unimbɔti un sòoǹ tibɔti nì deedeeyee ŋaan ní. 24 Úǹ Kriisitoo di fōō ti-kpitii ki ŋá u-ba pu ní ki fōō ti-kpitii tafadaaldi ndɔpuntikaa pu, án nín làá ŋá pu tí nyā ikpiti poon kí nīn kíǹ ki bí deedee maŋfal poonee. Bi nín gbáń-u u-wunti léetì puee di cāantí ni-weeŋyi. 25 Kun puee dooooyee ni nìn wáŋkì kii ipii in kaa cáá ukpaalee ní. Ama ní kɔŋkɔnnee ni fātìi gítìń un sá upikpaal ki sá un cí ni-nammuee cee.