1 Yoowaneesi 4

Unimbɔti Fam nì arasiniibi

1 M-nabineeŋkaamu, ní taa nín̄ máká bin kɔkɔ lì yii bi cáá Ŋfamee, ama ní cɔ̄ŋkì kí dáań kí kpèè yii an sá Unimbɔti Famaaa^a, an kaa sá. Di sá yii nnyimɔn bɔnaatiliibi gbóotì duulinyan tikpil. 2 Kun di làá yàntī ní béé un Unimbɔti Fam kpòotēe di sá un di yaa lì nì ibaamɔn yii Yeesu Kriisitoo kpántì unil ki dɔ́miń duulinyanee, mimmee Unimbɔti Fam di yāntì udaan sòon̄. 3 Un yaa yíì ki bí yii Yeesu kaa kpántì unil ki dɔ́miń duulinyanee, an kaa sá Unimbɔti Fam di yāntì udaan sòon̄, an sá Kriisitoo nannanliu fam. Ni nìn pée gbìl̄ yii unannanli gbanti làá dāan̄, ama u pūtì kpáàa bāań ki bí duulinyan.

4 M-biyaamu, nimbi sá Unimbɔti yab ní, an pu ní ni jáń ki pɔ́ɔkiǹ bin mɔ́ntí yii bi sá Unimbɔti bɔnaatiliibee. Kun puee Unimbɔti Fam min bí ni-nee pɔ̄ɔ̄ ki jítiǹ Sitaan un bí duulinyanee. 5 Binyimɔndambi gbantee, bíǹ sá duulinya yab ní. Bi sòoǹ tin duulinya nyée ní, míǹ pu ní an mɔ̄ǹ duulinya yab pílifíǹ-bi. 6 Ama timbi sá Unimbɔti yab ní. Un yaa nyí Unimbɔtee di pílifíǹ-ti. Un kaa là kí pīlifiǹ-tee kaa sá Unimbɔti yɔu. An di yì-tì ní ti ŋūǹ kí gàntī Unimbɔti Fam min sá ibaamɔnee nì Sitaan yam min mɔ́ntée.

Unimbɔti di sá dineendi

7 M-nabineeŋkaamu, tí nīn néeń tɔb, kun puee dineendi nyēeń Unimbɔti cee ní. Mimmee, sii un yaa cáá dineendee di sá un Unimbɔti fātìi màl̄ mpɔmee, ki nyí Unimbɔti mun. 8 Sii un yaa kaa cáá dineendee kaa nyí Unimbɔti, kun puee Unimbɔti di sá dineendi. 9 Kun yāntì ti ká dineendi din u cáá ti-puee di sá u dū u-Jipɔmbaabil ki túnní duulinyan, tí ŋmā kí ká dimaŋfal u-pu^b. 10 Kaa sá timbi di péé ki néeń Unimbɔti, an sá Unimbɔti di péé ki néeń timbi, ní ki dū u-Jipɔɔn ki túnní ú kpú tí ká ti-kpitii pɔ̄tam, míǹ di dàkà dineendi.

11 M-nabineeŋkaamu, Unimbɔti yaa néeń-ti míǹ bulifee, ti mun máaǹ kí nīn néeń tɔb. 12 Ubɔ kaa pée ká Unimbɔti dalba^c, ama ti yaa néeń tɔbee, Unimbɔti bí ti-ni, ní u-neendee bí ti-ni tiŋman.

13 Kun di yì-tì ti béè yii ti ŋá ubaanti nì Unimbɔti, ní Unimbɔti bí ti-nee, di sá u-Fam min u tīī-tee pu, 14 ní ti ká ki béè, ki kíǹ ki tùkù binib yii ti-Baa Unimbɔti dū u-Jipɔɔn ki túnní ú dāan̄ kí nīn sá duulinya Fiiliu^d. 15 Sii un di yaa lì nì ibaamɔn yii Yeesu sá Unimbɔti Jipɔɔnee, Unimbɔti bí a-ni ní si nì u ŋá ubaanti. 16 Timbi béè dineendi din Unimbɔti cáá ti-puee ní ki fōō-dì ki kíí.

Di sá yii Unimbɔti di sá dineendi, un yaa cáá dineendee, udaan nì Unimbɔti ŋá ubaanti, ní Unimbɔti bí udaanni. 17 Kun di dàkà yii a néeń-u tiŋmanee di sá, daliŋkin Yeesu làá dāá sòoǹ binib bɔtee, sii dāa cáá dimákal u-nimbiin ní, kun puee a-bimbim min a bí duulinya nee nee nì u-yam náań. 18 Sii un cáá dineendee kaa fàŋkí, kun puee dineembaamɔndi jì tifaandi ní. Ditafadaaldi di cāabìń tifaandi, míǹ puee, sii un cáá tifaandi a-nee kaa cáá dineembaamɔndi dee. 19 Kun pu timbi cáá dineendee di sá úǹ di péé ki néeń timbi. 20 Ubɔ yaa bí yii: «M néeń Unimbɔti», ní ki yaa ná u-nabikee, udaan sá unyimɔndaan. A yaa kaa néeń a-nabiki kin a wāĺee, a làá ŋá mana ní kí nīn néeń Unimbɔti un saa wāĺee? 21 Mara un Yeesu tīī-tee sèé yii, sii un yaa néeń Unimbɔtee máaǹ kí nīn néeń a-nabiki mun^e.