1 Yoowaneesi 3

Unimbɔti biyaamu

1 Ní kpèèmaan ti-Baa Unimbɔti nín cáá ti-pu dineeŋkpaandi diŋyee! Di sá yii u yíì-ti u-biyaamu^a. Míǹ ní tiŋman ti lafun sá u-biyaamu. Kun pu duulinya kaa nyí-tee di sá waa béè Unimbɔti. 2 M-nabineeŋkaamu, kí yòon̄ díǹ kí nīn cée, ti kpántì Unimbɔti biyaamu. Ti nín làá dāá nīn bí miŋyee kaa láá nyáń mpaampiin pu. Ama ti nyí yii ŋyunti ŋun ti-Dindaan yaa láa páaǹnée, ti làá dāá nīn bí kii u nín bí puee ní, kun puee ti làá dāá ká-u kí béé un ní u baasii sée. 3 Sii un di yaa cáá dimákal gbanti Yeesunee bɔ́ntí a-pɔbil circir, kii a-Dindaan u-ba nín bí pu circiree ní.

4 Un yaa ŋá ikpitee yīntì marab dee, di sá yii marab yìntitam di sá ikpiti. 5 Ni nyí yii Kriisitoo dɔ́miń kí lēē binib kpitii ní, ní úǹ u-ba kaa cáá ikpiti. 6 Sii un nì Kriisitoo yaa ŋá ubaantee kaa ti ŋáań ikpiti, ama sii un di yaa ŋáań ikpitee kaa ká-uaaa, kaa nyí-u mun.

7 M-biyaamu, ní taa yàntī ubɔ ń ŋmàtiǹ-ni. Un yaa ŋáań min bí deedeeyee sá deedeedaan, kii ti-Dindaan u-ba nín bí deedee puee. 8 Ama un yaa ŋáań ikpitee sá Sitaan yɔu, kun puee Sitaan pée sá ikpitidaan ní doooo ŋkilkaamin. An pu ní Unimbɔti Jipɔɔn dɔ́miń ki kpītì Sitaan tuuŋŋi.

9 Sii un Unimbɔti yaa fātìi màl̄ mpɔmee kaa ti ŋáań ikpiti, kun puee a náań nì a-Baa un màl̄-see. Aa ti ŋūǹ kí nīn ŋáań ikpiti, kun puee Unimbɔti di fātìi màl̄-si mpɔm. 10 Kun gàntī Unimbɔti biyaamu nì Sitaan yɔmuee di sá, sii un yaa kaa ŋáań tin bí deedeeyee nì sii un yaa kaa néeń a-nabikee kaa sá Unimbɔti yɔu.

Tí nīn néeń tɔb

11 Dinyɔɔbundi din ni nìn gbìl̄ doooo ŋkilkaaminee tùkū-ti yii tí nīn néeń tɔb^b. 12 Tí taa nín̄ bí kii Kayeen nín nìn bí puee. Úǹ nìn sá Sitaan niliu ní, ní ki kūū u-naal. Ba pu ní u nìn kūū u-naal míǹ? Kun pu u nìn kūū-uee di sá Kayeen tuuŋŋi sá akpiti, ní u-naal tuuŋŋi sá deedee yaŋ^c.

13 Nnabiyaamu, duulinya yaa ná-nee, an taa bàkatīǹ-ni^d. 14 Ti nyí yii ti nyáń ŋkúmin ki póotì dimaŋfalin^e, kun puee ti néeń ti-nabiyaamu. Un yaa kaa néeń u-nabikee dáá gbíntìi bí ŋkúmin. 15 Un yaa kaa néeń u-nabikee sá unikpɔl ní, ní ni nyí yii unikpɔl báà ubɔ kaa cáá dimaŋfal din kaa cáá dikúntilee u-ni. 16 Kun di yì-tì ti béè dineendi nín sá kuŋyee di sá Yeesu nín dū u-maŋfal ki tīī ti-puee. Míǹ mun mbaantiim ní ti mun máaǹ kí dū ti-maŋfal kí tīī ti-nabiyaamu pu. 17 Ubɔ yaa cáá ŋŋmam duulinya nee poon, ní ki ká u-nabiki bí falaani, ní u ŋmí, kaa tīī-u tibee^f, mimmee ba di dàkà yii Unimbɔti neendi bí udaan ni? 18 M-biyaamu, tí taa nín̄ lì nì ti-nyɔmmun fám yii ti néeń tɔb, ama tí yàntī ti-tuuŋŋi ń dàkà ibaamɔn yii ti lafun cáá dineendi.

Min ní ti làá ká dimákalee

19 Míǹ ní ti dùú béé yii ti sá ibaamɔn nib, ní ki kāntí dipɔɔsɔŋkil Unimbɔti nimbiin. 20 Báà ti-pɔbiliŋ yaa máfí yii ti sá binikpitibee, Unimbɔti jítiǹ ti-pɔbiliŋ ki nyí tikɔkɔ mun. 21 M-nabineeŋkaamu, sii un pɔbil yaa kaa tí máfí yii a ŋá tibee, mimmee a cáá dimákal Unimbɔti nimbiin dee. 22 Báà tin sá kamaa ní a yaa mēē-uee u làá tīī-si kudɔŋu, kun puee a kpáafí u-marab ki ŋáań min fáatì-uee. 23 Mara un u tīī-tee di sá tí fōō u-Jipɔɔn Yeesu Kriisitoo kí kíí, kí nīn néeń tɔb, kii Yeesu u-ba nín bí yii tí nīn néeń tɔb puee^g. 24 Un di yaa kpáafí u-marab gbantee, udaan ŋá ubaanti nì Unimbɔti, ní Unimbɔti bí udaanni. Kun pu ní ti nyí yii u bí ti-nee di sá u-Fam min u tīī-tee pu.