2 Yoowaneesi 1

Kugbɔnliliitiiu kun

Yoowaneesi

ŋmàn̄ee

Ijaam

1 An sá man Ukpil di jáaḿ sii ti-Na^a un Unimbɔti lútèe nì a-biyaamu. Ibaamɔn, m néeń ni-kɔkɔ. An kaa sá man baba di néeń-ni, an sá ki kpáaǹ bin kɔkɔ béè ibaamɔnee, 2 kun puee ibaamɔn bí ti-ni ki làá nīn pée bí kí nīn cá jaanjaan.

3 Ti-Baa Unimbɔti nì Yeesu Kriisitoo, Ubaati Jipɔɔn ń ŋá-ti tiŋan, kí sɔ̄ ti-saai, kí tīī-ti ŋgbansɔŋfi, tí nīn cáá ibaamɔn kí nīn néeń tɔb.

Ibaamɔn nì dineendi

4 An mɔ́ɔkiǹ-mi tikpil m nín ká a-biyaamu mubɔ nóó ibaamɔnee, kii ti-Baa Unimbɔti nín tīī-ti mara uŋyee. 5 Kɔŋkɔnnee, ti-Na, m gbàam̄-si, tí nīn néeḿmaan tɔb. Dinyɔɔbundi gbanti kaa sá marapɔɔn, an sá mara un ti nìn pée fōō doooo ŋkilkaaminee ní^b. 6 Dineendi taapu di sá tí nóó Unimbɔti marab. Kii ni nín gbìl̄ doooo ŋkilkaamin puee, mara gbanti di sá tí nīn cáá dineendi.

7 Kun puee biŋmatinliibi gbóotì duulinyan ki yíì, kaa fōō ki kíí yii Yeesu Kriisitoo kpántì unil ki dɔ́miń duulinyan. Un néè mimmee di sá uŋmatinli ki sá Kriisitoo nannanliu. 8 Míǹ puee, ní nīn nyí nì ni-ba, ní taa fá ti-tundi nín cáań ipaati iŋyee, án nín làá ŋá pu ní dāá ŋmā kí fōō ni-paati kɔkɔee.

9 Un di yaa lákatì, kaa là kí nīn ŋúb́ Kriisitoo bɔtee, kaa nyí Unimbɔti, ama un yaa ŋúb́ tibɔti gbantee, úǹ di nyí ti-Baa Unimbɔti nì u-Jipɔɔn. 10 Míǹ puee, un yaa dɔ́miń kaa cáań-ni tibɔti gbantee, ní taa fōō-u ni-dumpu kí taa jāam̀-u gba, 11 kun puee, un yaa jáam̀-uee mun ŋmàl̄ atuŋkpiti ŋin udaan tūǹee ni dee.

Tibɔkuntikaal

12 Tibɔti tikpil bàà bí ḿ sòoǹ nì ni, ama maa là kí dūú ŋmà kugbɔŋu poon, kun puee m là kí dāan̄ ni-cee niin kí sòoǹ nì ni ní, án mɔ̀tīí mɔ̄ɔkiǹ man nì ni.

13 A-Naal^c un Unimbɔti lútèe biyaamu mun jáaḿ-si.