Nì min kamaa Yoowaneesi yindi kaa bí tigbɔn tita nee poonee, bi dūu tīī yii úǹ di ŋmàn̄-tì. Kugbɔmpeekaau nee poonee, baa sòoǹ un ŋmàn̄-kuee pu, kaa ti sòoǹ bin bi ŋmàn̄ ki tīīyee mun pu. Ama ku sòoǹ Kriisitoo nikitiŋ gìŋ́ŋi aba pu ní. Ŋyunti gbantee, akiti tikpil nìn kākatì ŋi-ba ki wāatì fookii baamɔn, ní ki nìn jáà nì Kriisitoo nikitiŋ tikpil. An pu ní un ŋmàn̄ kugbɔŋu nee tɔ́kɔ́ abɔtaa ali pu:

Kugbɔŋu bɔkilkaati (1.1-4) dàkà kun pu ní bi ŋmàn̄ kugbɔŋu neeyee. Kriisitoo yab nì Unimbɔti nì Yeesu Kriisitoo máaǹ kí nīn cáá mpèémɔnti. Mpèé gbanti máaǹ kí nīn bí bi nì bi-nabiyaamu kansikin. Kí ŋmā kí ŋá mimmee, see bí nīn yú deedee nì seera un bin ká Yeesu Kriisitoo ki gbìl̄ tin u sòon̄ee lēē u-puee. An pu ní Yoowaneesi bíi tìì bin làá kàaǹ kugbɔŋu nee kunyannyaau bí nīn bí ŋwalifin, di sá yii Unimbɔti sá ŋwalifi ní. An pu ní bi máaǹ kí nīn ŋúb́ dineendi marau (1.5–2.17). Míǹ boonee ní u sòon̄ Kriisitoo nannanliibi di làá nyā ki wīikí tikpil puee. An nibee sá binyimɔndambi ní ki néè yii Yeesu kaa sá Meesiya (2.18-29). U gíti sòon̄ kun ti dūú béé Unimbɔti biyaamu tiŋman pu yabee. An di sá deedee maŋfal din poon bi bée, dineendi din bi cáá tɔb puee nì bi nín yú Yeesu Kriisitoo deedee puee (3.1-24). U nín dàkā ti nín máaǹ kí ŋá pu kí gàntì tinyimɔmbɔti nì ibaamɔnee ki dóòyee (4.1-6), Yoowaneesi fātìi gítìń dineendi pu. A yaa néeń Unimbɔtee di dàkà yii a sá Unimbɔti yɔu, di sá yii Unimbɔti sá dineendi ní (4.7-21). Kí kúntée, u dàkā kun di sá fookii un jáà ki jīǹee ní ki kúlifì abɔjal ŋin bɔti páb́ u-gbɔŋku poonee (5.1-21).

Kugbɔŋu nee yàntī tí béé un di baasii sá Kriisitoo yɔu tiŋman puee. Ku yàntī Kriisitoo yab ń dàkafì ní ki tútúǹ-bi bí kàkatī bi-ba kí wàatī tinyimɔmbɔti ní ki tìì-bi kunyannyaau bí béé yii mpèé ŋubɔ bí fookii un bi cáá Yeesu Kriisitoo puee nì dineendi din bi cáá bi-juti puee.