2 M-nabineeŋkaaki, m mèé yii tikɔkɔ ń còom̀-si tiŋan á nīn cáá ŋgbampɔn kii a-naŋki nín cáá ŋgbampɔn puee. 3 An mɔ́ɔkiǹ-mi tikpil nnabiyaamu nín bāań ki tùkū-mi a nín ŋúb́ ibaamɔn an píkí puee, kii a nín pée còom̄ ibaamɔn poon puee. 4 Tiba kaa ti bí ki mɔ̄ǹ-mi ki bàn̄ ḿ gbìl̄ yii m-biyaamu bí ki còom̄ ibaamɔn saŋŋu poon, án mɔ́ɔkíǹ-mi tikpil ní.

5 Kinabineeŋkaai, a nín tūǹ atummɔnti ŋin ki tìì nnabiyaamu ki kpáaǹ bin sá-si binicambee gbee, a lafun dàkā yii a fōō ki kíí tiŋman pu. 6 Bi bāańee, bi máafì a-neendi gbanti pu Kriisitoo nikitil kɔkɔ nimbiin. Mimmee, m mèé-si, á tūtuǹ-bi bi-saŋŋu gbanti poon min làá fáatíǹ Unimbɔtee. 7 Di sá yii Yeesu tundi pu ní bi còom̄ nsan, kaa fōō tiba bin kaa nyí Unimbɔtee cee. 8 An puee, bi yaa bāań ti-ceeyee, ti máaǹ kí tūtuǹ binib gbanti. Mimmee, ti mun kútì bi-pu ki cáá ibaamɔn tundi ki cáǹ nyɔkɔpu dee.

9 M nìn ŋmàn̄ kugbɔŋu ki tīī Kriisitoo nikitil ki sòon̄ nì bi kibɔgiŋ, ama Diyootreefi là kí nīn sá bi-kpiliu ní kaa là kí pīlifì tin man sòoǹee. 10 U gífí inyimɔn nì tibɔkpitil ki tūntí ti-pu. Míǹ kɔkɔ kaa yá ki kɔ́-u, kun puee u yíití kaa fòol̄ nnabiyaamu mun jītí u-ceeyee mun, ní bin yaa bàà là kí fōō-bee, u pìintí-bi nsan ki là kí nyāntí-bi Kriisitoo nikitil kansikin. Míǹ puee, m yaa láa bāańee, m làá dāá kàaǹ tin kɔkɔwoooo u ŋáańee binib nimbiin.

11 M-nabineeŋkaaki, á taa nóó binib bin ŋáań tikpitilee tabɔbiliŋ, ama nín̄ nóó bin ŋáań tiŋanee tabɔbiliŋ. Un ŋáań tiŋanee di sá Unimbɔti niliu, un ŋáań tikpitilee kaa nyí Unimbɔti. 12 Ama Deemeetriyusi ní báà ŋma pàkà, ní ibaamɔn bɔti tin tin u bí ki sòoǹee mun pàkà-u, ní ti mun pàkà-u. Sii a-ba nyí yii tin ti yaa lēe sá ibaamɔn ní.

13 M bàà cáá tibɔti tikpil kí sòoǹ nì si, ama maa là kí dū ŋgbaŋŋmamɔɔn kí ŋmà. 14 Kun puee m là kí dāan̄ a-cee iwiin ili nee poon, niin ní ti dāa ŋūǹ kí kàl̄ kí sòoǹ tikɔkɔ.

15 Unimbɔti ń tīī-si ŋgbansɔŋfi.

A-bɔɔbi jáaḿ-si. Á jāam̀ ti-bɔɔbi kɔkɔ kí tīī-mi.