Dileedakal 14

Dipibil nì bin u dū u-fatikuu ki dée

1 Niinee ní m ká Dipibil yú Siiyɔn jool pu, u nì binib kutukub dilaataal nì imuŋku ili nì binaa bin yigbeeŋi pu bi ŋmàn̄ u nì u-Baa yiŋŋee^a. 2 M gbìl̄ nneen ŋubɔ nyánní yilpu a lì kii mbuŋkpaan nyim nín sìtī puee, ní ki gíti bí kii utaa nín tátí pu mpɔn mpɔnee, ní nneen ŋun pu m gbìl̄ee bí kii bibeebɔɔliibi di bɔ̀ɔ́ bi-bati ki gà ilanee. 3 Binib gbantee nìn yú dibeejal nì tiwan tinaa tin cáá kufoouee nì bikpilibee nimbiin ki gà nlampɔɔn, ubɔ kaa ŋūǹ kí bīfì-ŋu, asee binib kutukub dilaataal nì imuŋku ili nì binaa bin bi dá ki nyántìń duulinyanee baba di ŋūǹ kí gāā an laŋŋu.

4 An nibee kaa dōoǹ nì binimpoobi ki kɔ́ǹ bi-ba tijɔkɔndi, bi ŋúb́ bi-ba circir ní. Bi dī Dipibil boon ki cá laakin dì yaa cée. Unimbɔti dá-bi ki nyántì binib kansikin bí nīn sá bin bi làá péé péé kí dūú sú Unimbɔti nì Dipibilee. 5 Baa gbìl̄ an nibee mɔ́ntì nnyimɔn^b dalba ki ká, kaa ti kāntí ikpiti iba bi-pu kí lì.

Ituun ita bɔti

6 Boonee ní m ká ntuun ŋubɔ ŋàaǹ kutagbɔŋu pu yilpu yilpu ki cáá Tibɔmɔntiil tin kaa cáá dikúntilee ki tùkù binib bin kóò duulinyanee, ntimu kɔkɔ nib nì atimbun kɔkɔ nì isoon kɔkɔ nib nì anibul kɔkɔ. 7 Ŋu nìn tátí mpɔn yii: «Fàŋkìmaan Unimbɔti kí tīī-u tinyool, kun puee ŋyunti bāań ú sòoǹ nnibiyaamu bɔti. Nyɔ̄ŋkìmaan Unimbɔti un náań yilpu nì taapuee, nì tiŋku nì inyimbul kɔkɔee.»

8 Ní ntuun nliliiti páaǹní ní ki lī yii: «Babilooŋkpaan lítì! Kitiŋkpaaŋŋi lítì! U nyūntì atimbun kɔkɔ u-daam min sá u-laakpaati tin u ŋáań an lákatèe^c!»

9 Ní ntuun ntataati páaǹní ki lī mpɔn yii: «Un di yaa gbāaǹ ki jáam̀ upeelee nì u-naŋku, ní ki yāntì bi dáań u-yigbeel nì u-ŋalee, 10 Unimbɔti làá dāá nyùntī udaan ndaam min sá u-ŋuulee. U làá dāá fōō bidambi pu diŋuukpaandi din kaa cáá jutee kí dū-bi kí tɔ̄ farwata ŋmiŋun bí jī falaakpaan, u-tuuŋyi circirdambi nì Dipibil nimbiin^d. 11 Ŋŋmi ŋun poon bi làá nīn bí ki jīǹ falaayee làá nīn pée dùkù ní kaa cáá dikúntil^e. Baa dāa cáá diŋuŋfil ŋwiimpu nì kunyeeu, bíǹ bin kɔkɔ gbāaǹ ki jáam̀ upeel nì u-naŋkuee, nì bin yāntì bi dū upeelee yindi ki dáań-bee.»

12 Ŋyunti nee di máaǹ Unimbɔti yab bin ŋúb́ u-marab tiŋan ki máká Yeesu puee ń pɔ́ɔǹ bi-ba, kí nīn cáá kimɔtii.

13 Ní m gbìl̄ nneen ŋubɔ sòon̄ní yilpu yii: «Ŋmà yii: <Bin nóó ti-Dindaan ki kúù kɔŋkɔnneeyee bí mmɔnneeee!> Unimbɔti Fam lī yii: <An sá mbaamɔn, bi làá cùú kàl̄ kí ŋùŋfì, kun puee atunnyaan ŋin bi túńee dī-bi!>»

Tijin bīń bí cā

14 M kpēēyee, ní ki ká ditagbampindi diba, ní ubɔ kā di-pu ki náań nì unil^f, ní ki cíkí sindaariya beefuuliiki ki ŋúb́ ugɔti un jītée u-ŋaan. 15 Ní ntuun ŋubɔ nyánní kunimbɔtidiin ki téeń mpɔn ki tùkū un kā ditagbampindi puee yii: «Dū a-gɔtiuee kí cā tijikaal, kun puee kudiceeu ŋmāntì. Duulinya bīń ki ŋmāntì bí cā^g!» 16 Niinee ní un kā ditagbandi puee dū u-gɔtiu ki bɔ́ duulinyan ní ki cáń duulinya.

17 Ní ntuun ŋubɔ mun gíti nyánní yilpu Nimbɔtidiikun ki mun ŋúb́ ugɔti un jītée.

18 Ní ntuun ŋubɔ gíti tí nyánní nsaraafanni, ŋúǹ di ŋúb́ ŋŋmi pɔŋŋu, ki téeń mpɔn ki tùkū ŋun ŋúb́ ugɔti an jītée yii: «Dū a-gɔtiu un jītée kí bɔ̄ fiinyi sufii in sí kitiŋ puee sakaŋi poon kí kìtī, kun puee abil bīń.» 19 Ní ntuunee dū ŋu-gɔtiu ki bɔ́ fiinyi sufiin ní ki kītì duulinya fiinyi biliŋ ki gbéeǹ mbookpaan ŋun ni bi ŋmāam̀ ki lèekī ndaamee, an dàkà yii bi cáa kɔ́ǹ Unimbɔti ŋuulin dee. 20 Ní bi ŋmáaḿ fiinyi biliŋee mbookpaanee ni kitiŋ kpaanceetiŋu nnyim ń nyā. Kun nyáńee di sá fatiku, ki pùub̀ ki tin sāā ataŋkpee alaataa ata. Ní fatikuee nín dɔ̄ ki jɔ́m̀ puee tin sāā itaamu nyɔɔkpaaŋi^h.