Dileedakal 15

Ituun iluli nì falaajoolkaa

1 Ní m gíti ká kudaaŋŋu kubɔ yilpu, ku náaǹ ki cáá maamaaci. M ká ituun iluli ŋúb́ falaabi biluli. Bíǹ di sá bifalaajoolkaabi bin Unimbɔti làá dūú tɔ̄ binib pu ní u-ŋuul ń nín sɔ̀ŋkèe.

2 Ní m ká tiba an náań nì tiŋku ní ki wāĺ kílkil kii digitilee ní ki ŋmàl̄ nì ŋŋmi, ní m ká bin jáń ki pɔ́ɔkiǹ upeelee nì u-naŋku nì namba un sá u-yindee yú tiŋku un wāĺ kílkil kii digitilee cee ki ŋúb́ tibati tin Unimbɔti tīī-bee, 3 ní bi bí ki gà Mooyiisi Unimbɔti tɔntɔnliu nì Dipibil laŋyi yii:

«Ti-Dindaan Unimbɔti Mpɔŋkɔdaan,

a-tuuŋŋi wīikí ki sá amɔnti,

sii di sá atimbun bɔtiu.

A nín lēē nsàmbiyaamu muŋyee bí deedee

ní ki sá mbaamɔn.

4 Ti-Dindaan, ŋma di kaa làá fàŋkì-si?

Ŋma di làá yíí, kaa làá tīī-si tinyool?

Kun puee sii baba di sá circirdaan,

atimbun kɔkɔ làá dāan̄ ní kí gbàan̄ a-nimbiin kí nyɔ̄ŋkì-si,

kun puee báà ŋma ká a-tuuŋŋi, ŋi bí deedee^a.»

5 Míǹ boonee m ká kunimbɔtidii kun bí yilpuee cúu pīitì, ní Unimbɔti tantiu un dàkà u-bítamee yú poon^b, 6 ní ituun iluli in ŋúb́ falaabi bilulee nyánní kunimbɔtidiiyee poon ki pēē tiwampin káŋkaŋ ki jìl̀, ní ki dū sindaariya dambalau ki cúú i-biŋŋi. 7 Tiwan tinaa tin cáá kufoouee kubɔ tīī ituun ilulee sindaariya sambiyaamu mululi, Unimbɔti un bí jaanjaanee ŋuul gbí poon. 8 Niinee ní Unimbɔti nyooti nì u-pɔŋŋu yāntì nnyiim yíkì ki gbí kunimbɔtidiin^c, ní ubɔ kaa ti ŋūǹ kí kɔ́ niin, see falaabi bin bi tīī ituun ilulee nín dāa jítèe.