Mākuut chēpō Iriin ākōō ng'ātuut chēpō piich
Maarkō 7:1-13
15
1 Kipkaana nyuun Chēērusālēēm *:Parisaay walak ākōō koonēēt chēpō ng'ātuut akuteep Yēēsu kilē, 2 “Āmu nee simātuupēy :kiineetanikuuk koonēētuut chēpō mpō kuukō? Nku āmiisyēy kutoomō kuutiliil ēēruunēkwaak?” 3 Kumwoochi :Yēēsu kilē, “Āmu nee sooputō ng'ātuut chēpō Iriin akaatuup ātēpuut chēpō mpō kuukōng'woong'? 4 Kiimwa :Iriin kilē, ‘Ikoonyit āpoong'uung' ākōō eeyēēng'uung'.’ † Akimwa kilē, ‘Nyoo muulēy apoonyiin ntā ku eeyeenyiin, /kēēkēētēy.’† 5 Aku āmwoorēy kilē, nēē mwoochi :chiich apoonyiin ntā ku eeyeenyiin kilē, ‘Kir nyoo kātookōōniin, ku /kaakēētō Iriin,’ 6 ku mā maraat kuukoonyit apoonyiin ākōō eeyeenyiin. Kyaareeng' :akwaan nyuun ng'ālyoontoo Iriin akaatuup chēpō paapatiinēkwook. 7 Akwaan ng'uuriichu! Kiipō man :ng'alēēpō *ōōrkooyoon *Isaaya paani kiimwoorēy kilē:8 ‘Koonyitēēnoon :pichu ng'ālyēēpikwaak,
aku lōōwō :mukuuliiriikwaak nkōō wōloo āmii.
9 Looswoon kilēēn,
aku ng'ātuut choo koonyitēy ku ng'ātuut choo nēētēy :piich kipaat.’† ”
Tukun choo irēy chiich kumātililiit
Maarkō 7:14-23
10 Kukuur :Yēēsu piich chaa chaang' akumwoochi kilē, “Āyāpchii iit ng'aleechu āmwoorēy, ākoosōwu. 11 Ma kir nyoo wēētii kuut nyoo irēy chiich ku mātililiit, aku ng'al choo pkoonēē kuut.”
12 Paani keewaang' :Yēēsu kumwoorēy kilēē nyoonēē, kupkoonchi :kiineetanichiich, akumwoochi kilē, “Inkēt :inyēēn kēny kilē kāng'woonchi *Parisaay :ng'aleechoochēē keemwaa?” 13 Kuwālchi :Yēēsu kilē, “/Kumiltooy keet aka tōkōl nyoo maatoot :Apoonyuun nyoo mii kipsēnkwēt. 14 Kunyuun amaa-iim keey akipō Parisaayichoochēē. Kōryootēēn :pichoochēē. Aku nēē rēētō keey :kipkorootiin kuchinchinii :tōkōl kēpēn.”
15 Kumwoochi :Pēētērō Yēēsu kilē, “Rārwēēch kee ng'aleechoochēē pō tiliilin.” 16 Kuwālchi :Yēēsu kilē, “Ara kōō toomō āsōwu ng'alēēchu koong'āloolēē mpō? 17 Moosōwu kilē kir aka tōkōl nyoo wēētii kuut kurēytooy moo /akeelayta kupa saang'? 18 Wōloo nyuun tukun choo pkoonēē kuutii chiich kupkoonēē mukulēr aku-irēy :choochēē chiich kumātililiit. 19 Āmu pkoonēē kaapkootuut chaa raacheen mukulēr nyēpō chiich. Irēy kaapkootuutēchoochēē piich kurumiisyō, kusiir karwa, ku-ir takal kutoomō ku-āp keey, kuchōōrsyō, kung'uurnaan, akung'alaala piich nkōō oor nyaa ra. 20 Tukuuchoochēē choo irēy chiich kumātililiit. Nēē āmiisyō :chiich amaatiliil ēēr, kimā-irēy :nyoonēē chiich kumātililiit.”
Kaarana nyēpō cheepyooso nyoo kiima Yāwuutyoon
Maarkō 7:24-30
21 Kii nēē ng'eeta :Yēēsu yoonēē, kuwō ākōō kiineetanichiich ākōy kōōroo Tiirō ākōō Siitōn. 22 Paani ka-it, kuchōōnchi Yēēsu :cheepyooso nyēpō Kaanan. Kichō kuunchwoonuuy kilē, “Kiptaayaan, *Wēēroo Tāwuti, riireenaan! Ting'ēy :chēētanyuun *toomirmiir nyaa ra nyoo iimēy.”
23 Kumaakuwālchi :Yēēsu cheepyoosoonoonēē ng'ālyoon aka tōkōl. Kupēēchi :kiineetanichiich Yēēsu akusaarsaar kilēēchi, “Mwoochii cheepyoosooni kuwēēchi keey. Nku tuupootēēch akuunchōōchinootēēch.”
24 Kuwālchi :Yēēsu kilē, “/Kiikiiyookwoon kipaat āchō wōloo mii :piich chēpō *Israayeel choo lēē kēēchiir choo kiikupētyō.” 25 Kuchō :cheepyoosoonoonēē akukutung'ēē taayuu Yēēsu akimwa kilē, “Kiptaayaan, toorētoon!” 26 Kuwālchi :Yēēsu kilē, “Makaraam /keenam āmiisyō nyēpō laakōōy /ākēētē sukōyēy.” 27 Kuwālchi :cheepyoosoonoonēē Yēēsu kilē, “Lēē nyoonēē, Kiptaayaan, aku nyuun oo, kwārēy mpō :sukōyēy rarakan choo chintooy nēē mii ku-āmiisyēy :mōkōrēēkwaak.” 28 Kii nēē mwa :cheepyoosoonoonēē kilēē nyoonēē, kuwālchi :Yēēsu kilē, “Cheepyoosooni, āmu keeranaan, ku irēē kilēē wōli imārtooy.” Kusop :chēpō cheepyoosoonoonēē kilē weel.
/Kēēsoopēy piich chaa chaang' choo mā Yāwuutik
29 Kung'eeta :Yēēsu yoonēē akuwō araa tapan nyēpō araaray pō Kalilaaya. Kulaang' tul parak akutēpō ng'wēny. 30 Kupkoonchi :piich chaa chaang' choo kiimutuuy piich choo lēē kimukuung'tiin, choo kōryootēēn, choo ng'woolsōōt, choo mēēmuukēy kung'alaal ākōō walak chaa chaang' choo kimnyoonchootēēn. /Kiikiimutu pichoochēē /ākēētē kēēlyēēpō Yēēsu. Kuusoop :Yēēsu pichoochēē. 31 Paani keero :piich kilē kang'alaal :piich choo kii māng'āloolēy, kupa :choo king'woolsōōt, kusopyō :kimukuung'tiin akimararta :choo kikōryootēēn, kukwōng'yō akuuloosu Iriin nyēpō *Israayeel.
Kipāyēy :Yēēsu piich ēlup ang'wan
Maarkō 8:1-10
32 Kukuur :Yēēsu kiineetanichiich akumwoochi kilē, “Man āriirēē pichu. Kaakēētēpi ākōō akwaaneek pērēētuus sōmōk āmoomii :kir nyoo kaa-am. Moomārēy āmwoochi kupa ku-āmēy :piri āmu muukēy kumistō nkōō aree.”
33 Kumwoochi :kiineetanichiich kilē, “Kōōrooni ku suur kwēēn. Kunyōōrchinii ānō āmiisyō choo yāmēy piich choo tēēnō chu tōkōl?” 34 Kuteep :Yēēsu kiineetanichiich kilē, “Āting'ēy makatiin ata?” Kuwālchi kilē, “Kiting'ēy choo lēē tisap ākōō kaaraak choo ng'ērin.” 35 Kumwoochi :Yēēsu kiineetanichiich kumwoochi piich kutēpi ng'wēny, 36 akunam makatiinachoochēē lēē tisap ākōō kaaraakik akumwoochi Iriin kōōnkēy. Kupuutil akuutē kiineetanik kuchārchinootō piich. 37 Kwoomiisyō :piich tōkōl kupiryoonchō. Kuurum :kiineetanik kiituukaanik, kunyiri kitaseen tisap. 38 Piich choo kyoomiisyō ku kii murēn choo lēē ēlup ang'wan kimaa-iit chiich chēēpyōōsōōy ākōō laakōōy. 39 Kumwoochi nyuun :Yēēsu piich kupēēchi keey akulaang' :inyeentee mēēli kuwō kōōrēē aka nyoo /kiikikuurēē Makataani.