Amaang'alaalee piich nkōō oor nyaa ra
7
1 Kitas taay :Yēēsu kumwa kilē, “Amaang'alaalee chiich nkōō oor nyaa ra, /tamakung'alaaleenaak. 2 Āmu nēē ang'alaalee chiich, /kēēng'āloolēēnook. Ku-irwook kilēē wōloo ā-irchinii piich walak.3 Āmu nee teeroo uutēnwō nyoo mii koontaa wēēriing'woong' ameeroo kuntul nyoo mii koontong'uung'? 4 Muukēē kilē nee imwoochi wēēriing'woong' kilē, ‘Kanya āmooluun uutēnwō nyoo mii koontong'uung',’ kumii :kuntulyō koontong'uung'? 5 Ng'uuriintooni! Mooluu kupōk kuntulyooni mii koontong'uung' si nēē ng'at imuuk iroo kukaraam a-imoolu uutēnwooni mii koontaa wēēriing'woong'.
6 Mēētō piich choo mātiliilō tukun choo tiliilēēn āmu nēē ir kilēē nyoonēē, kuwārākiisōōt akupooryēērēēniin. Āmēēwiirchi sanayēēkuuk taayuu nkurwēētiin āmu nēē ir kilēē nyoonēē, kuumuukēy kuutyaartyaar.”
Chiich nyoo soomēy /kēētēnii
7 “Āsoomō, /tākēēkōōnook; awasa, toonyōōruu; ākōnkōōng'ō kurkee /tākēēyootwook. 8 Āmu chiich nyoo soomēy, /kēētēnii, nyoo wāsēy, kunyōōruuy, ku nyoo kōnkōōng'ēy kurkat, /kēēyootinii. 9 Mii :chiich nkōō akwaan nyoo nēē soom :laakweenyiin makatyaan kuutē kor? 10 Ntā nee soom koorookwō, kuutē kipaang'wa? 11 Kunyuun oo, nēē ātēniikwaan kipng'ōōkiis laakōōkwook tukun choo kāroomēēn oo, kutēp nee nyuun Apoong'woong' nyoo mii kipsēnkwēt? Tēnii :inyeentee tukun choo kāroomēēn piich choo soomēy!”
Ng'ātuut nyēpō koomānuut
12 “Ā-irchii nyuun piich kilēē wōloo āmārtooy /kee-irwaak. Rumēy :ng'aleechu siruutēpō *Muusa ākōō chēpō *ōōrkooyiipō Iriin.”
Mariik :kurkat nyoo wēētii kipsēnkwēt
13 Kitas taay :Yēēsu kumwa kilē, “Āpuntoorēē kurkat nyaa mariik, āmu pārō :kurkat akutapees :aree nyoo wēētii ma nyēpō ākōy aku chaang' piich choo pēētii araanoonēē. 14 Mariik :kurkee aku kōrōōm :aree nyoo wēētii *sopoon nyēpō ākōy. Ng'ērin :piich choo nyōōruuy araanoonēē.”
Keet ākōō lokoreechiich
15 Kitas taay Yēēsu kumwa kilē, “Āriipēē keey *ōōrkooy choo ma pō man. Karkeey :pichu ākōō kēēchiir choo tālooyēēn akutuurō nyuun moontinēy pichoochēē kilēē rēēlwēy. 16 Āsōwuunēē pichoochēē ng'al choo irēy. Mānāmēy :katooyi maakany aku mānāmēy :seesya siimaat. 17 Keet aka tōkōl nyaa karaam kunāmēy lokor choo kāroomēēn. Ku keet nyaa ra kunāmēy lokor chaa raacheen. 18 Mēēmuukēy :keet nyaa karaam kunam lokor chaa raacheen, amēēmuukēy keet nyaa ra kunam lokor choo kāroomēēn. 19 Keet aka tōkōl nyoo nāmēy lokor chaa raacheen /kēēyāpēy /ākēēwiirchi ma. 20 Kunyuun, āsōwuunēē akwaaneek lokoreekwaak.”
Māpēētii :piich tōkōl Kaa Paapa
21 Kitas taay :Yēēsu kumwoochi kiineetanichiich kilē, “Mā :chiitōkōl nyoo kuuroon kilē ‘Kiptaayaan, Kiptaayaan!’ nyoo wēētii pāyuunātoo Iriin, aku inyeentee kipaat nyoo irēy kiyoo mārēy Apoonyuun nyoo mii kipsēnkwēt. 22 Nkōō pērēētuu lēt, ku chaang' :piich choo kuuroon kilē, ‘Kiptaayaan, Kiptaayaan! Maaku-amtaata lōkōōy choo kāroomēēn nkōō kaarineeng'uung', akeekar koong' mpō *toomirmiirēy chaa raacheen akee-ir mpō tukun chēpō kwōng'uut nkōō kaarinēēng'uung'?’ 23 Āmwoochinii nyuun pichoochēē kutooku kilē, ‘Moonkētook. Apeeree yi āmii, akwaan kipng'ōōkiis.’ ”
Tēēk choo lēē ārēēny
24 Kitas taay :Yēēsu kumwa kilē. “Chiich aka tōkōl nyoo tēērēy ng'aleechuuch akutuup, ku karkeey ākōō chiich nyaa ng'oroom nyoo kiiteek koonyiin raat parak. 25 Paani kiirōōpēn, kunyir ēēnwēy, akuutimtiim yōōmēt kōyoonēē, ku maakuruul āmu /kiikitēēchi raat parak. 26 Chiich aka tōkōl nyoo tēērēy ng'aleechuuch amatuup ku karkeey ākōō chiich nyoo lēē sālwō nyoo kiitēēchi koonyiin asyaak. 27 Paani kiirōōpēn, kunyir ēēnwēy, akuutimtiim yōōmēt kōyoonēē. Kuruulō :kōyoonēē nyēpō kwōng'uut.”
Kaamuukaa Yēēsu