Kuusoopēy :Yēēsu chiich nyoo kyaam :kōōnchōryoontō
Maarkō 1:40-45; Luuka 5:12-16
8
1 Kii nēē rēkuunō :Yēēsu lakamee, kutuup :piich chaa chaang'. 2 Nyoo matyaan, kuchō :chiitō aka nyoo kyaam :kōōnchōryoontō. Kukutung' nkōō taayuu Yēēsu akilē, “Kiptaayaan, nēē ichāmēy, isoopoon akiitiliiloon.” 3 Kuukoortō :Yēēsu ēēruunyiin kitiing' chiichoonēē akilēēchi, “Āchāmēy, sopō!” Kusop :chiichoonēē kilē weel. 4 Paani kaakusop, kumwoochi :Yēēsu chiichoonēē kilē, “Āmēēmwoochi chiich aka tōkōl ng'aleechu. Wiyō akiiwēēng'uuti keey tisiin akii-āp tukun choo /ki-irēē kōrōs kilēē paani kiimwoorēy *:Muusa nkōō ng'ātuut tākēēsōwu kilē kaa-itililiitu.”Kaarana nyēpō kāāntōōyiintoo luk nyēpō Rooma
5 Kimii kuwēētii :Yēēsu Kaaparnaam, kuchō :chiitō aka nyoo kii kāāntōōyiintoo lukoo pooryoot nyēpō Rooma akumwoochi Yēēsu kilē, 6 “Kiptaayaan, mii :kipāyityoontēēnyuun kaaw nyoo mnyaanaat kitya, aku mii nyaril nyēpō kwōng'uut, kiimeerta pōōr.” 7 Kumwoochi :Yēēsu chiichoonēē kilē, “Āwēētii āsoopēy chiichoonēē.” 8 Kuwālchi :kāāntōōyiintoonoonēē Yēēsu kilē, “Kiptaayaan, mēērookēē ataakin nkōō katanyuun, aku mwaara ng'ālyoon kipaat kusop :kipāyityoontēēnyuun. 9 Kaamwaa kilēē nyoonēē āmu mii :piich choo ēēchēēn kusiir aneen akimii :piich choo āpāytooy mpō. Nēē āmwoochi chiich kilē ‘Wiyō,’ kuwēētii ntā nēē āmwoochi aka kilē ‘Chōōnō’ kuchōōnēy. Ku nēē āmwoochi mpō kipāyityoontēēnyuun kilē ‘Ira kiyi’ ku-irēy.”
10 Paani kateer :Yēēsu ng'alēēpō chiichoonēē, kukwōng' akumwoochi piich choo kiituupēy inyeentee kilē, “Āmwoorwook man kilē toomō aroo chiich mu *Israayeel tōkōl nyoo ting'ēy kaarana nyoo lēē nyēpō chiichi. 11 Āmwoorwook nyuun kilē, pkoonēē :piich chaa chaang' kāmōōs tōkōl chēpō ng'wēny pākutēpi aku-āmiisyō ākōō *Apraam, Isaka ākōō Chaakōp mu pāyuunātoo :Iriin. 12 /Kuwiirchinii nyuun piich choo kātāpāyiituuy Iriin saang' wōloo tuur kipa kuriiryō akunyar keelat.”
13 Paani keewaang' :Yēēsu kumwa kilēē nyoonēē, kumwoochi kāāntōōyiintoonoonēē kiipō luk kilē, “Warakee kaaw. Irēē kilēē wōloo keeranta.” Kusop :kipāyityoontoo kāāntōōyiintoonoonēē kilē weel.
Kuusoopēy :Yēēsu piich chaa chaang'
Maarkō 1:29-34; Luuka 4:38-41
14 Paani kāwo :Yēēsu kaa Pēētērō, kunyōōru pookēr pō Pēētērō mii rwoon akumnyaanaat. 15 Kunam :Yēēsu ēēruu cheepyoosoonoonēē, kusop akung'eet kupay mpō Yēēsu.
16 Nēē mii pērēētuunoonēē ku kaakurēytō asiis, /kēēmuti Yēēsu piich chaa chaang' choo kii-iimēy *:toomirmiirēy chaa raacheen. Paani kang'alaal :Yēēsu, kupeera :toomirmiirōōchoochēē raacheen piich. Kusopyō :piich tōkōl choo kimnyoonchootēēn. 17 Kuusilta nyuun :kiyoo kiimwoorēy *:ōōrkooyoon *Isaaya kilē,
“Kiikasan mnyoonwēyiichooch
akuusoopēēch nkōō kōrōōytiin tōkōl.”†
Mānyumnyum /keetuup Yēēsu
18 Kii nēē ro :Yēēsu piich chaa chaang' choo kēēruruuchi keey yoo kiimii inyeentee, kumwoochi kiineetanichiich kutilta araaray nyēpō Kalilaaya kupa kamasta nyiinō aka. 19 Kuchōōnchi :koonēētiin nyēpō ng'ātuut Yēēsu akilēēchi, “Koonēētiin, ātuupiin woltō tōkōl yoo kēēwō!” 20 Kuwālchi :Yēēsu chiichoonēē kilē, “Ting'ēy rēēlwēy kēpēnoot choo māng'ēy, akuting'ēy :tāriit kooriikwaak, wōloo nyuun māting'ēy *:Wēēroo Chiich wōloo muung'ēē.”
21 Kumwoochi :tuupiintēē aka Yēēsu kilē, “Kiptaayaan, āmārēy atuupin wōloo nyuun kanyaan āwootup apoonyuun kupōk saatuupin.” 22 Kuwālchi :Yēēsu chiichoonēē kilē, “Mētii piich choo mēērootēēn kutup choo mēērsōōt ākiichōōn ituupaan.”
Kuupkoong'ēy :Yēēsu yoomēt nyoo ōōw kusiis
Maarkō 4:35-41; Luuka 8:22-25
23 Paani kaakulaang' :Yēēsu ākōō kiineetanichiich mēēli kupēēchi keey. 24 Nyoo matyaan, kuchō :yoomēt nyoo nyikiis nyoo kiipaanta ku-ir mēēlii kuchuut pēr. Kiimii :Yēēsu rwoon. 25 Kupa :kiineetanik yoo kiimii :Yēēsu akuung'eet kilē, “Kiptaayaan, sārwēēch. Kimii kēērookēy.” 26 Kuwālchi :Yēēsu kiineetanichoochēē kilē, “Āmu nee soowāriisyēē nyoo tēēnō nyi tōkōl? Muutyō akwaan choo āting'ēy kaarana nyoo mining'!” Paani keewaang' :Yēēsu kumwoorēy kilēē nyoonēē, kung'eet akuupkoong' yoomēē ākōō pērēēk kusiisyō. 27 Kukwōng'yō :kiineetanik akuteep keey kilē, “Chiich nee :chiichi? Nku tēērēy iit mpō :yoomēt ākōō pēr.”
Kuusoopēy :Yēēsu piich ārēēny choo kiiting'ēy toomirmiirēy chaa raacheen.
Maarkō 5:1-20; Luuka 8:26-39
28 Kii nēē it :Yēēsu kōōr aka nyoo /kiikikuurēē Keeraasa,a mu kamasta nyiinō aka pō araaray, kutuuyēērō piich ārēēny choo kiiting'ēy *toomirmiirēy chaa raacheen kipkoonēē wōloo /kiikutupchinii piich. Kiimoomii :chiich nyoo kiimuukēy kuwō araanoonēē. 29 Kuunchōōyō toomirmiirōōchoochēē raacheen kilē, “Wēēroo Iriin, imārēēnēēch nee? Kēēchōōn inyariileech kutoomō ku-itu :pērēētuunyoon?”
30 Kiimii :nkurwēētiin chaa chaang' choo kiilēēkitēē yoonēē choo kiimii kwookēētēy. 31 Kusoom :toomirmiirōōchoochēē raacheen Yēēsu kilē, “Nēē mārēy ooneech, ikanyeech keepa keechuuta nkurwēētiinēchuuchō.” 32 Kumwoochi :Yēēsu kilē, “Apee.” Kupa nyuun :toomirmiirōōchoochēē raacheen akupa kuchuut nkurwēētiinēchoochēē. Kuutuultēērō keey :nkurwēētiinēchoochēē tōkōl lakamee akupa kutakus keey mu araaray.
33 Paani keero :māsowēēpō nkurwēētiinēchoochēē kiyoo kii-ira, kumwēr ākōy kōōroonoonēē akupa kumwoochi piich ng'al tōkōl choo ki-iriisyō kupootō mpō chēpō piich choo kiiting'ēy *toomirmiirēy chaa raacheen. 34 Paani kateer :piichoochēē ng'aleechoochēē, kupa :tōkōl pākunyōōru Yēēsu, akusaarsaar kuwēērō kōōrēēng'waang'.