Kuusoopēy :Yēēsu chiich nkōō pērēētuu Sapaato
14
1 Nēē mii pērēētuu aka, nyoo kii pērēētuu *Sapaato, kuwō :Yēēsu kataa chiitō aka nyoo kii ākoong'o nkōō *Parisaayiik choo ēēchēēn. Kiimii *:Parisaayiik walak kaayoonēē. Kiimii :Parisaayiichoochēē kuriipēy Yēēsu nēē mwoorēy kir nyaa ra akipō ng'ātuutēkwaak. 2 Kiimii :chiich yoonēē nyoo kiipkoonchō :kēēlyēn ākōō ēēruun.3 Kuteep :Yēēsu koonēēt chēpō ng'ātuut ākōō Parisaayiichoochēē kilē, “Chāmwēēch :ng'ātuutēchooch /kēēsoop chiich nkōō pērēētuu *Sapaato, ntā acha?” 4 Kimaawalta kir :pichoochēē. Kunam :Yēēsu chiichoonēē mnyaanaat, kuusoop akumwoochi kuwēēchi keey.
5 Paani kaakuwēēchi keey :chiichoonēē, kuwārāchi keey :Yēēsu Parisaayiichoochēē akuteep kilē, “Nēē chinchi :laakwēēng'uung' ntā ku tēēng'uung' kēpēn nkōō pērēētuu *Sapaato, ing'usuuy sōō kilē weel kuchō saang'?” 6 Kumaawālu nyuun :pichoochēē kir aka tōkōl.
Ā-āpēy keey ng'wēny
7 Kii nēē ro :Yēēsu wōloo kiilēwēntooy :piich ng'achareen chēpō taay chēpō too choo koonyitootēēn, kumwoochi :Yēēsu pichoochēē siiyō kilē, 8 “Nēē /kukuurook apee kaaptuum aka tōkōl, āmoomooymooyō ātēpi ng'achareen chēpō taay chēpō too choo koonyitootēēn. Āmwoorēy kilēē nyoonēē, āmu muukēy ku-itu :toontee nyoo koonyitoot kusiir inyēēn. 9 Mutuuy :chiitaa kata nyi kiikuurook toontonoonēē kuchō wōli imii akilēēchiin, ‘Kanya kutēpō ng'acharaanoonēē toontooni.’ Kitoowu nyuun kuuliilin kir akiiwō lēt itēpēē ng'achar aka tōkōl.” 10 Kumwoochi :Yēēsu pichoochēē kilē, “Nēēkuurin chiich katanyiin, iwō itēpi ng'achar nyoo māpō piich choo koonyitootēēn. Nēē chō :chiitaa kata akuurootin imii itēpēē ng'acharaanoonēē, kuchō akilēēchiin, ‘Choorweenyuun chōōnō wiyō tēpēē ng'acharaani pō piich choo koonyitootēēn.’ /Kēēkoonyitin nkōō taayuu too tōkōl.
11 Kunyuun, chiich aka tōkōl nyoo āpēy keey im /kēēmining'iitēy. Nyoo āpēy keey ng'wēny, /kēētōrōōrēy.”
12 Nēē mii lētuun, kilēēchi :Yēēsu chiitaa kata, “Nēē mārēy ikuur piich kupka katang'uung', ku mēēkuur choorweeyiikuuk, wēēchiikwook, tilyayiikuuk ākōō piikuuk chēpō saang' choo lēē mōkōrō choo ipkootēy kilē kuuriin :akwaaneek pērēētuu aka. 13 Ku nēē kuur piich kipka ku-āmiisyō nkōō katang'uung', kumārēy ikuur mpō piich choo lēē mēēy, choo ng'woolsōōt, choo lēē kimukuung'tiin ākōō choo kōryootēēn. 14 Nēē ir kilēē nyoonēē kēēpēēruurin āmu mēēmuukēy :pichoochēē kukuurin pērēētuu aka. Pēēruuriin :Iriin paani kapa kung'ēētyēērō meerat piich choo tiliilēēn.”
Tuum nyoo ōōw
15 Paani kateer ng'aleechoochēē :chiich nyoo kiimii ku-āmiisyēy nkōō Yēēsu, kumwa kilē, “Pēēruurootēēn :piich choo pāku-āmiisyēy nkōō Kaa Iriin nkōō pāytooyiinteeng'waang'.”
16 Kilēēchi :Yēēsu chiichoonēē, “Kii-ir :chiich pēērēētuu aka tuum nyoo ōōw. Kukuur piich chaa chaang' kupka tuumoonēē. 17 Paani ka-it :pērēētuuni pō tuum, kuuyooytō kipāyityoonteenyiin kuwō kumwoochinootō pichu /kiikukuur kupka āmu /kiikuchēpō tuum. 18 Paani /kāpākēēmwoochi, kitoowu :chiich aka tōkōl kirāru ng'aleechiich akusoom /kēēnyōōchi kaat, āmu kimēēmuukēy kupka. Kimwa nyēpō taay kilē, ‘Kātoo-ālēy par ākoomārēy awaaro. Nyōōwoon kaat.’ 19 Kumwa nyēpō ārēēny kilē, ‘Kātoo-ālēy eeyiin taman nkanyi āmārēy awaatyamta. Nyōōwoon kaat.’ 20 Kumwa nyēpō sōmōk kilē, ‘Kātoo-āpiisyēy, moomuukēy kutoochōōn.’
21 Kuwaraka :kipāyityoontoonoonēē kaaw, akuwō kumwoochi mōkōryoontēēnyiin ng'aleechoochēē. Paani kateer :mōkōryoontēē, kinyala akilēēchi kipāyityoontēēnyiin, ‘Wiyō araa oortin choo ēēchēēn ākōō choo mānkēēchēēn chēpō kōōrēē, akiimutu piich tōkōl choo lēē mēēy, kimwaaltiin, kipkorootiin, nkōō kimukuung'tiin.’ 22 Nyoo matyaan, kuwaraka kipāyityoontēē akilēēchi mōkōryoontēē, ‘Kaakee-ir kilēē paani keemwaa akutākumii :pārooyin koot.’ 23 Kumwoochi :mōkōryoontēē kipāyityoontēēnyiin kilē, ‘Reera wiyō mwoochinootēē piich walak akii-ir piich tōkōl kupka. Āmārēy kupka :piich ākōy kunyir kōyi. 24 Āmwoorēy kilēē nyoonēē, āmu moomii :chiich mpō ākoong'o nkōō pichu pō taay kyookuur nyoo churēē kuut āmiisyooni.’ ”
Mā nyumnyum /keetuup Yēēsu
25 Paani kimii kituupēy :piich chaa chaang' Yēēsu, kuwarak keey :Yēēsu kuuro pichoochēē akumwoochi kilē, 26 “Chiich aka tōkōl nyoo mārēy kutuupan, kuurookēē kuchaman kusiir wōloo chāmtooy apoonyiin, eeyeenyiin, cheepyooseenyiin ākōō laakōōchiich, wēēchiikwaak ākōō tiipiikwaak. Mārēy mpō kuchamta kuutētō sopoontanyiin akipō aneen. Nēē mee-ir kilēē nyoonēē, kimēēlēkuuy tuupiinteenyuun. 27 Chiich nyoo maacham kuutētō sopoontanyiin akipō aneen ku mēēmuukēy kilēku kiineetaneenyuun.
28 Ng'oo nkōō akwaan nyoo muukēy kuteek kō nēē toomō kutēpō ng'wēny akuuro rōōpiyō choo ting'ēy nēē yāmēy kuteeka koot? 29 Nēē ma-ir kilēē nyoonēē, kuumuukēy kutoowu kutēēsyō, nēē mii kwēēn kurārchi :tukun. Kutoowu nyuun :piich kuroorēchi inyeentee 30 kumwoorēy kilē, ‘Kaaro murooniinō, kiityam kutēēsyō, kusip kurārchi :tukuuk choo tēēytooy kutoomō kuuwoonyō :koot.’
31 Moomii :pāytooyiin nyoo muukēy kurat keey akuwō pooryoot nēē toomō kutēpō ng'wēny nkōō lukeenyiin. Mārēy kupōk kuuro nēē yāmēy :lukeenyiin nyēpō pooryoot nyēpō piich choo lēē ēlup taman, kupooryō nkōō luk nyēpō puun choo lēē ēlup tiptēm. 32 Nēē rōōtēy kilē mēēmuukēē, kuuyooytō piich kusip kupa kung'alaal nkōō puunik kutākumii wōloo lōōw kusoom kaalya.
33 Chiich nyuun nyoo mārēy kilēku tuupiinteenyuun, kumārēy kimētō kir aka tōkōl nyoo ting'ēy akituupan.”