Yēēsu ku araa Kaa Paapa
14
1 Kuureer kumwoochi :Yēēsu kiineetanichoochēē kilē, “Amaa-iim keey. Ātiirēē keey Iriin, ākootiirēēnoon keey mpō. 2 Mii :koorin chaa chaang' Kaa Paapa. Āwēētii āwoochēpkook wōloo āpoomāng'ēy. Kātāmoomwoorwook ng'aleechu ntā kāmālēē nyoonēē. 3 Paani koowoochēpkook wōli āpoomāng'ēy, awaraka achaamutaak sikeepa kēēmāng'iisyēē tōkōl. 4 Ānkēt :akwaan aree nyoo wēētii wōli āwēētyaa.” 5 Kumwoochi :Toomaas Yēēsu kilē, “Kiptaayaantaani, mākuunkēt wōli iwēētii, ara kisōwuuntooy ānō araanoonēē?” 6 Kiwālchi :Yēēsu kilē, “Aneen :aree, :man ākōō :sopoon. Moomii :chiich nyoo wēētii Kaa Paapa kumoopunuunēēnoon. 7 Ntā kyoonkētoon man, ntā kyoonkēt mpō Paapeenyuun. Aku kung'eetee aniinee ku koosōwu inyeentee akaarootee koonyiikwook.” 8 Kumwoochi :Pilip Yēēsu kilē, “Kiptaayaan, ng'uutwēēch Paapa. Kir nyoonēē nyoo yāmēēch.” 9 Kuwālchi :Yēēsu kilē, “Pilip, kiikēētēpi yoo lōōw nkōō akwaan tōkōl, akiimwoorēy kilē toomō isōwoon? Chiich nyoo kaakuurootan ku kaakuuro Paapa. Āmu nee nyuun siimwaara kilē, ‘Ng'uutwēēch Paapa?’ 10 Pilip, mēērānēy sōō kilē āmii :aneen wōloo mii :Paapaan akimii :Paapaan wōloo āmii :aneen? Māpkoonēē :ng'aleechu kyoomwoorwook koopkootuutēchuuch, pkoonēē wōloo mii :Paapaan aku-irēy pāyiisyeenyiin kupunuunēēnoon. 11 Aranaan kilē aneen kir ākoong'o nkōō Paapa. Ntā ku nēē moorānēy, aran akipō ng'aleechu pō kwōng'uut chu iriisōōt.Kuuyoomiisēy :Yēēsu piichiich Toomirmiir nyoo Tiliil
12 Āmwoorwook man kilē, chiich nyoo tiirēēnoon keey ku-irēy pāyit nyoo ā-iraa. Irēy mpō tukun choo ēēchēēn kusiir chu, āmu āmii āwēētii Kaa Paapa. 13 Ā-iraa kir aka tōkōl nyoo koosoom nkōō kaarineenyuun, sikutōrōriit Paapaan kupunuunō Wēēriinyiin. 14 Nēē āsoom kir aka tōkōl nkōō kaarineenyuun ā-irēy. 15 Nēē āchāmoon, a-ir kiyoo koomwoorwook a-ir.
16 Āsoomaa Paapa sikukōōnook Toomirmiiryeenyiin nyoo toorētook pērēētuus tōkōl. 17 Toomirmiir nyoonēē nyēpō man nyoo ng'uutwook kir nyēpō man. Mānyōōruuy :piich chēpō ng'wēny Toomirmiiryoonoonēē āmu mēēnkēt aku māsōwuuy inyeentee. Āpēētiiy āsōwuuy nyuun Toomirmiiryoonoonēē lētuun akuchō kumāng'iisyēy nkōō akwaan. 18 Moomētooyook āmāng'iisyēē kilēē pānoon. Āwārākēē wōli āmiikwaan. 19 Nyoo maatyaan kimaakuurōōtoon :piich chēpō ng'wēny kuureer. Aku toorōōtaakwaan nyuun. Āmu āting'aa sopoon, ānyōōruukwaan sopoon. 20 Pērēētuuni /kuung'ēētēēnoon meerat, āsōwu kilē aneen kir ākoong'o nkōō Paapeenyuun, akaakwaan kir ākoong'o nkōō aneen. 21 Chiich nyoo tēērēy ng'aleechuuch akutuup, kuchāmoon :chiichoonēē. Chāmēy :Paapeenyuun chiich nyoo chāmoon. Āchāmaa :mpō chiichoonēē ākoong'uutinii keey.”
Chiich nyoo chāmēy Iriin kuukoonyitēy ng'aleechiich
22 Kuteep :Chuutaas (kii mā Chuutaas Iskaryoot) Yēēsu kilē, “Kiptaayaan, āmu nee si nēē ng'at ing'uutwēēch keey amēēmārēy ing'uuti keey piich chēpō ng'wēny?” 23 Kuwālchi :Yēēsu kilē, “Chiich nyoo chāmoon kuukoonyitēy ng'al choo ānēētēy. Chāmēy :Paapaan chiichoonēē ākoochōōnēy ākōō Paapa wōli mii :chiichoonēē keepa kēēmāng'iisyēē tōkōl. 24 Chiich nyoo māchāmoon kumēēkoonyitēy kiyi ānēētēy. Mā chaachuuch :ng'aleechu kaateer akwaan. Pkoonēē wōloo mii :Paapaan nyoo kiiyookwoon.
25 Āmwoorwook ng'aleechu kutoomii nkōō akwaan. 26 Yookwook :Iriin Toomirmiiryeenyiin sikuchō kuutoorētook nkōō kir aka tōkōl. Nēētook akuupkootwook ng'al tōkōl choo kyoomwoorwook. 27 Lēyyē, koomētwook ātēpi nkōō kaalya. Kaalyaani ākōōnook ku mēēlē karkeey nkōō nyoo kōōnook :piich chēpō ng'wēny. Moomuyō āmoowāriisyō. 28 Kaateer :akwaan āmwoorwook kilē, ‘Āwēētiiy ākoowārākēē wōli āmii :akwaan kuureer.’ Nēē āchāmoon, āpāypāyiitu āmu āmii āwēētiiy Kaa Paapa nyoo tōrōōr kusiir :aneen. 29 Kāāsip āmwoorwook ng'aleechu kutoomō /ku-iriisyō, si nēē pāku-iriisyō aran. 30 Moong'āloolaa nkōō akwaan nyoo lōōw āmu mii kuchōōnēy :pāytooyiintoo ng'wēny. Māting'ēy :pāytooyiintoonoonēē kaamuuka kupaytaan. 31 Ākoo-iraa nyuun kir aka tōkōl nyoo mwoorwoon Paapaan sikusōwu :piich tōkōl kilē āchāmēy Paapa. Lēyyē, keepeeree yēēnyi.”