Kuu-uunchinii :Yēēsu kiineetanichiich kēēlyēn
13
1 Kii nēē riiku tuum nyēpō *Pasaka, kusōwu :Yēēsu kilē kiikiiku-itu :saayitiinyiin kuwēērō ng'wēny kuwaraka wōloo mii :Apoonyiin. Kiichāmēy :Yēēsu piichiich choo kiimii nkōō inyeentee, akicham ākōy pērēētuu nyēpō lēt. 2 Kii nēē mii /kēēchēpēy āmiisyō nyēpō kosoliny, ku kiikiiku-ir *:Syeetaani Chuutaas Iskaryoot wēēroo Siimnyōn siku-alta Yēēsu. 3 Kiinkēt :Yēēsu kilē kiikuutē inyeentee :Paapa kaamuuka nyoo kiimii :kir aka tōkōl ēēruunēchiich. Kiinkēt mpō kilē kiichōōnō :inyeentee wōli mii :Iriin akuwārākēē wōli mii :Iriin. 4 Nkōō yoonēē, kung'eetee yi kyoomiisyēērēē akung'usta sireenyiin nyēpō saang'. Kunam siree aka nyoo lēē anka akukārmēn. 5 Kuroonchi pēr kaaraayiit akutoowu kuu-uun kēēlyēēpō kiineetanichiich. Kuupuukō kēēlyēēchoochēē ankaani kiikārmēn. 6 Paani ka-it :Yēēsu yoo kiimii :Siimnyōn Pēētērō, kumwoochi :Siimnyōn Yēēsu kilē, “Kiptaayaan, imārēy i-uun kēēlyēēchuuch?” 7 Kuwālchi :Yēēsu kilē, “Mēēnkēt :inyēēn kilē ā-iraa nee paannyēēnyi. Isōwuuy lētuun.” 8 Kutay :Pēētērō akumwoochi kilē, “Acha! Mēē-uunoon kēēlyēn pēsyēēt.” Kumwoochi :Yēēsu Pēētērō kilē, “Nēē moo-uun :aneen kēēlyēēkuuk ku maakuumuukēē ilēku kiineetaneenyuun.” 9 Kumwoochi :Pēētērō kilē, “Kiptaayaan, nēē lēē nyoonēē nyuun, ku mēē-uun kēēlyēēchuuch kipaat, uunō mpō mētinyuun ākōō ēēruunēchuuch.” 10 Kuwālchi :Yēēsu Pēētērō kilē, “Chiich nyoo kaakuu-uun keey, ku tiliil :chiichoonēē. Mārēy kipaat kuu-uun kēēlyēēchiich. Ātiliilō :akwaan tōkōl kung'ētu :chiich ākoong'o nkōō akwaan nyoo mā tiliil.” 11 Kiikiikusōwu :Yēēsu chiichi kiiwō ku-āltooy inyeentee, nkanyi kiimwa kilē, “Ātiliilō :akwaan tōkōl kung'ētu :akoong'o nyoo mā tiliil.”12 Paani keewaang' :Yēēsu kuu-uunēy kēēlyēēpō kiineetanichoochēē, kuulaak sireenyiin akutēpō ng'wēny. Kuteep :Yēēsu kiineetanik kilē, “Ara, koosōwuukwaan kiyi kaa-ir :aneen? 13 Ākuuroon kilē, ‘Koonēētiin’ ntā kilē ‘Kiptaayaan’ man kilēē nyoonēē āmu aneen nyoonēē. 14 Aneen Kiptaayaantēēng'woong' aku koonēētiintēēng'woong' nyi koo-uunwook kēēlyēn. Kunyuun mārēy ā-uunchinii keey kēēlyēn. 15 Kaa-ir :aneen kir nyoo koong'uutuunēēnook si nēē ng'at a-ir kiyi kaa-irwaak. 16 Āmwoorwook man kilē, mā ōōw :kipāyityoon kusiir mōkōryoontēēnyiin ama ōōw :nyoo /kiiyooytooy kusiir chiichi kēēyooytooy. 17 Āmu ānkēt :akwaan nyuun paannyēēnyi ng'aleechu pō man koomwoorwook, ku pēēruurook nyuun :Iriin nēē a-ir kilēē nyoonēē. 18 Moong'āloolēēnook akwaan tōkōl, ānkēt choo kyoolēwēn. Aku mārēy nyuun kilēku :siruut chēpō Iriin man :chu mwoorēy kilē, ‘Kaparan :chiichi kākyoomiisyēy :tōkōl.’† 19 Koosip āmwoorwook ng'aleechu ku toomō /ku-iriisyō, si nēē iriisyō aran kilē aneen *Meesaaya. 20 Koomwoorwook man kilē, chiich aka tōkōl nyoo tookēy chiich nyoo āyooytooy, ku kataakan. Ku :chiich nyoo kataakan ku kaataak inyeentee nyi kiiyookwoon.”
King'ōōrēy :Yēēsu kilē /ku-āltooy inyeentee
21 Kii nēē waang' :Yēēsu kumwa ng'aleechoochēē, kung'woonchi ākōy kumwa nyoo maawung' kilē, “Āmwoorwook man man kilē, mii :akoong'o nkōō akwaan nyoo āltooyoon.” 22 Kuuro keey :kiineetanik āmu kiinam kuut :ng'aleechoochēē. 23 Kiimii :kiineetanee ākoong'o nyoo kiichāmēy :Yēēsu kutēpēē yoo kiilēēkitēē Yēēsu. 24 Kumwoochi :Pēētērō kiineetanaanoonēē kilē, “Teepa kilē ng'oo :nyoonēē mii kung'āloolēē :inyeentee.” 25 Kuriichi :kiineetanoonēē Yēēsu akuteep kilē, “Kiptaayaan, ng'oo :nyoonēē?” 26 Kumwoochi :Yēēsu kilē, “Ānōnōōktooy makatyaan suut ākootō. Inyeentee :nyoonēē.” Kunam :Yēēsu makatyaan akuunōnōōktō suut akuukoorchi Chuutaas wēēroo Siimnyōn Iskaryōōt. 27 Paani kanam :Chuutaas makatyaantaanoonēē kuchuut *:Syeetaani kilē weel. Kumwoochi :Yēēsu kilē, “Choochii kiyi imārēy ira kilē weel.” 28 Kimoosōwu :piichoochēē kiimii ku-āmiisyēy nkōō Yēēsu āmu nee sikumwoochi :Yēēsu Chuutaas kilēē nyoonēē. 29 Āmu kiināmuuy :Chuutaas saapaa rōōpiyō, ku kiipkootēy :kiineetanik walak kilē ālēē kāmwoochi :Yēēsu inyeentee kuwō ku-al tukun choo kiikumārēy chēpō tuum ntā kuwō kuutē piich choo lēē mēēy tukun. 30 Paani kanam :Chuutaas makatyaantaanoonēē, kuchaayta kuchuut saang' kilē weel. Kiikiikutuuriit :kōōrēē paanoonēē.
Ng'ātuut nyoo rēēl
31 Kii nēē kaakuchuut :Chuutaas saang', kumwa :Yēēsu kilē, “Tookuuy aniinee :tōrōōrin nyēpō *Wēēroo Chiich akutooku :tōrōōrin nyēpō Iriin kupunuunō inyeentee. 32 Nēē tooku :tōrōōrin nyēpō Iriin kupunuunō *Wēēroo Chiich, kuutēnii :Iriin tōrōōrin nyoo ting'ēy aku-iriisōōt :ng'aleechoochēē kilē weel. 33 Murēchu, maakēētēpiisōōt tōkōl nyoo lōōw. Āwāsoon, ākoomwoorwook nyuun paannyēēnyi kir nyoo kyoomwoochi kāāntōōy chēpō Yāwuutik kilē, ‘Moopēētii wōli āwēētii.’ 34 Ng'ātuut nyoo rēēl nyoo ākōōnook ku nyi: Āchoomnyēē. Kulēē paani kyaachamaak, ku karaam āchoomnyēē. 35 Nēē āchoomnyō, kusōwuuy :piich tōkōl kilē akwaan kiineetanichuuch.”
King'ōōrēy :Yēēsu kilē tāyēy :Pēētērō inyeentee
36 Kuteep :Pēētērō Yēēsu kilē, “Kiptaayaan, imārēy iwō ānō?” Kuwālchi :Yēēsu Pēētērō kilē, “Mēēmuukēē ituupaan wōli āwēētyaa paannyēēnyi, aku tēētuupkoon nyuun lētuun.” 37 Kuteep :Pēētērō Yēēsu kilē, “Kiptaayaan, āmu nee simēēmuukēē atuupin paannyēēnyi? Āchāmēy mpō ameer akipō inyēēn.” 38 Kuwālchi :Yēēsu Pēētērō kilē, “Keecham :inyēēn man imeer akipō aneen? Āmwooruun man man kilē, kutoomō kuchēr :nkōkyō, itayēy āsip sōmōk kilē mēēnkētoon.”